ശൈഖുനാ കെ. അലവി മുസ്ലിയാർ - ഓർമ്മയുടെ തിളക്കം

വീണ്ടും അവിടുത്തെ തിരുജീവിതത്തിന്റെ ഓർമ്മപ്പെടുത്തലുകൾ തഴുകി ഉണർത്തുന്ന വിശുദ്ധ മുഹർറം മാസം വന്നണഞ്ഞു. മൂന്നു വർഷങ്ങൾക്ക് മുമ്പ് മുഹർറം 14 ന്റെ അന്നാണ് ആ പുണ്യവെളിച്ചം ഭൗതികമായ നിറപ്രകാശത്തിന്റെ തിരി അണച്ചത്.

ഒരു മനുഷ്യന്റെ ജീവിതം എന്തായിരുന്നു എന്ന് മനസ്സിലാക്കാൻ ഒരായുഷ്ക്കാലം കൂടെ നടക്കണം എന്നില്ല, മറിച്ച്‌ അവരുടെ ജീവിതത്തിന്റെ ഛായമടിക്കാത്ത സ്വകാര്യ നിമിഷങ്ങളെ പറ്റി അർഹരും വിശ്വസ്തരുമായ ആളുകൾ വിവരിക്കുന്ന കേവലം ചില നിമിഷങ്ങളുടെ അനുഭവം മതിയാകും..

ഇമാമീങ്ങളായി മുസ്ലിം ലോകം അംഗീകരിക്കുന്ന സകല മഹാന്മാരുടെ ജീവിതവും അങ്ങനെ തന്നെയാണ്‌. ഒരു നിമിഷം അല്ലെങ്കിൽ ഒരു നിമിഷത്തെ അനുഭവം തന്നെ അവരുടെ ആയുഷ്ക്കാലം വിവരിക്കാൻ പര്യാപ്തമാകും. പളുങ്ക്‌ സമാനം ശുഭ്രമായ മനസ്സുമായി ജീവിതം മുഴുക്കെ അല്ലാഹുവിന്റെ ദീനിന്റെ ഉലൂമുകളുമായി ജോലിയായി ബർസഖിന്റെ മറക്കപ്പുറത്തേക്ക്‌ നീങ്ങിയ എത്ര എത്ര വിശുദ്ധ നക്ഷത്രങ്ങൾ..!

കേരള സംസ്ഥാന ജംഇയ്യത്തുൽ ഉലമയുടെ അഭിവന്ദ്യ നേതാവും വണ്ടൂർ ജാമിഅ വഹബിയ്യയുടെ പ്രിൻസിപ്പാളും ആയിരുന്ന ശൈഖുനാ കെ. അലവി മൗലവി അവർകളുടെ (വഫാത്ത്‌: 2012 നവംബർ) പുണ്യജീവിതത്തിന്റെ സകല മാധുര്യവും ചീന്തിയെടുത്ത്‌ ഒട്ടിച്ച പോലെയുള്ള, ഒരൽപ്പം നിറകണ്ണുകളോടെ വായിക്കാവുന്ന ചെറുകുറിപ്പ്‌ അവിടുത്തെ മകൻ മുഹമ്മദ്‌ ശരീഫ്‌ എഴുതിയത്‌ നുസ്രത്തിൽ വായിച്ചത്‌ ഓർക്കുന്നു.

മകന്റെ ഓർമ്മക്കുറിപ്പ്‌ തീരുന്നത്‌ ഇങ്ങനെ:

"രാവിലെ മൂന്നു മണിക്കോ നാലു മണിക്കോ മൂത്രമൊഴിക്കാൻ ഉറക്കച്ചവടോടെ എഴുന്നേൽക്കുന്ന എന്റെ കാതുകളെ വരവേറ്റിരുന്നത്‌ 'അല്ലാഹുവേ, നീ എന്നെ സ്വീകരിക്കില്ലേ ! നിന്റെ ഇഷ്ടക്കാരിൽ എന്നെ പെടുത്തില്ലേ' തുടങ്ങി നിസ്ക്കാരപ്പായയിലിരുന്ന് ഉപ്പ നടത്തിയ ഗദ്ഗദങ്ങളായിരുന്നു'..!!!"

(നുസ്രത്തുൽ അനാം 2013 ജനുവരി)

ദേഹസുഖത്തിന്റെ പരിപാലനത്തിന്‌ ഉറക്കത്തിന്റെ പിടി വിട്ടു പോകാതെ മൂത്രമൊഴിച്ച്‌ തിരിച്ച്‌ കിടക്കയിലേക്ക്‌ മലർന്നടിച്ചു വീഴാൻ തത്രപ്പെടുന്ന നാം ഓരോരുത്തരുടെയും പുലർച്ച നേരത്തെ മൂന്നു മണികളും നാലു മണികളും, ആരുമാരും ഇടയിലില്ലാതെ ഇലാഹീ സവിധത്തിലേക്ക്‌ സർവ്വ സുഖങ്ങളും മറന്ന്, ശരീരവും മനസ്സും സമർപ്പിച്ച്‌ കണ്ണുനീർ വീഴ്ത്താനുള്ളതായിരുന്നു അവർക്ക്‌..

നൂറ്റാണ്ടുകളുടെ ഇന്നലേകളിലെ വിശുദ്ധ താരകങ്ങളുടെ ജീവിതത്തെ അവിശ്വസനീയതയുടെ കണ്ണോടെ നോക്കുന്ന നമുക്ക്‌ ചുറ്റും ഇന്നുമുണ്ട്‌ ഈമാനിന്റെ പ്രകാശം തുളുംബുന്ന ഹൃദയവും ഉള്ളിലെ വേളിച്ചം അപ്പടി തെളിഞ്ഞു കാണുന്ന ജീവിത ശുദ്ധിയുമുള്ള താരകങ്ങൾ. കുറ്റിയറ്റു പോകാത്ത നന്മയുടെ വന്മരങ്ങളായി..

എല്ലാത്തിലും വലുത്‌ അവന്റെ സ്വീകരണമാണ്‌, അവന്റെ പൊരുത്തമാണ്‌ എന്ന് വിശ്വസിച്ചുറപ്പിച്ച്‌ ഋജുവായ മാർഗ്ഗത്തിലൂടെ തഖ്‌വായുടെ ഉദാത്ത മാതൃകകളായി ജീവിച്ചവർ തന്നെയാണ്‌ അവന്റെ ഇഷ്ടക്കാർ.

الذين آمنوا وكانوا يتقون

എന്നെന്നും ഉപകരിക്കുന്ന അറിവ്‌ എന്ന ദിവ്യവെളിച്ചം ആയിരുന്നു അവരുടെ സമ്പാദ്യം. അതാകട്ടെ നിലക്കാത്ത സമ്മാനങ്ങൾ അവന്റെ മണ്ണറയിലേക്ക്‌ എത്തിക്കുന്നു..

ആ തിരുനാവിൽ നിന്നും ഒഴുകിയിരുന്ന ഐഹിക വിരക്തിയുടെയും പരലോകമോഹത്തിന്റെയും സമർപ്പണ മനോഭാവത്തിന്റെയും ഉണർത്തുപാട്ടുകളായ സുന്ദര ശൈലിയിലെ പ്രസംഗങ്ങൾ എത്രയെത്ര വഅള് സദസുകളിലാണ് വിചിന്തനത്തിന്റെയും തിരിഞ്ഞു നടക്കലിന്റെയും തീപ്പൊരി ആളുകളുടെ മനസ്സുകളിൽ കോരിയിട്ടത്..!

കേരളീയ മുസ്ലിം സമൂഹത്തിനാകമാനം നേരായ വഴിയുടെ വെളിച്ചമായി പ്രഭാഷണ, പ്രസാധന, ദർസീ രംഗത്തെ ഉജ്വലപ്രഭാവമായ മൗലാനാ നജീബ് മൗലവി എന്ന ഒരേ ഒരു ശിഷ്യർ മാത്രം മതിയാകും കഥാപുരുഷനായ ശൈഖുനാ അലവി ഉസ്താദിന്റെ പ്രഭാവവും ഇരുത്തം വന്ന വിജ്ഞാന സാമ്രാജ്യത്തിന്റെ അധിപനായിരുന്നു എന്നതിന്റെ സാക്ഷ്യവും. അങ്ങനെ അറിയപ്പെട്ടതും അറിയപ്പെടാത്തതും ആയ ഒട്ടനേകം പ്രതിഭാധനരായ ശിഷ്യന്മാർ. അവരിലൂടെ കേരളത്തിന്റെ മണ്ണിൽ നിറയുന്ന വൈജ്ഞാനിക മുത്തുമണികൾ മുറിയാത്ത ധാരയായി അവിടുത്തെ തിരു ഖബ്'റിലേക്ക് അനുഗ്രഹത്തിന്റെ തെളിനീരോഴുക്ക് സൃഷ്ടിക്കും എന്നത് ഉടയാത്ത പ്രതീക്ഷയാണ്.

ان الإله واهل كل سمائه

والارض حتى الحوت مع نمل الفلا

كل يصلي يا حبيب على الذي

قد علًم الخير الأناس محصلا

നാഥന്റെ പൊരുത്തത്തെ മാത്രം മോഹിച്ച, നല്ല നല്ല ദീനീ വിജ്ഞാനീയങ്ങൾ ജനങ്ങൾക്ക്‌ പഠിപ്പിച്ച ശരിയായ ഉലമാക്കൾക്ക്‌ വേണ്ടി സമുദ്രത്തിലെ മൽസ്യങ്ങൾ, കരയിലെ ഉറുംബുകൾ എന്ന് വേണ്ട ആകാശഭൂമി ലോകത്തെ സകലതും പോറുക്കലിനെ തേടുകയും അല്ലാഹുവിന്റെ റഹ്മത്‌ അവർക്ക്‌ മേൽ സദാ വർഷിക്കപ്പെടുകയും ചെയ്യുക തന്നെ ചെയ്യുമെന്നത്‌ മഹത്‌ വചനങ്ങളിൽ വന്നത്‌ മഹാനരിൽ പുലർന്ന് കാണട്ടെ എന്ന് പ്രാർത്ഥിക്കുകയല്ലാതെ അവരോടുള്ള കടപ്പാടുകൾ തീർക്കാൻ നമുക്കെന്ത്‌ ചെയ്യാൻ കഴിയും..!

അർഹമായതിലേറെ ജസാ അവിടുത്തേക്ക് നീ നൽകണേ അല്ലാഹ് - അവിടുത്തെ പിന്നിലായി ദുനിയാവിൽ എങ്ങനെ അണിനിരന്നോ അത് പോലെ നിന്റെ പരീക്ഷണങ്ങളുടെ ലോകത്തും അവരുടെ പിന്നിലായി വിജയിച്ചവരുടെ കൂട്ടത്തിലേക്ക് ഞങ്ങളെ നീ ചേർക്കണേ നാഥാ..ആമീൻ

ബിദ്അത്തുകളെ സൂക്ഷിക്കുക - വിശ്വാസപരമായത് അതികഠിനമാണ്..!

വഹ്ഹാബികൾ ബിദ്അതുകാർ ആണ് എന്ന് പറയുമ്പോൾ പാവപ്പെട്ട ജനങ്ങളെ വസ്വാസാക്കാൻ വേണ്ടി പല പല കർമ്മങ്ങൾ കാണിച്ച് 'ഇതൊന്നും നബിതങ്ങൾ ചെയ്യാത്ത കർമ്മങ്ങൾ ആണ് - അതിനാൽ അത് ചെയ്യുന്ന സുന്നികൾ ആണ് ബിദ്അത്തുകാർ' എന്നും ഇക്കൂട്ടർ പറയുക സാധാരണമാണ്. എന്ത് പറഞ്ഞാലും സുന്നികൾ 'ചെയ്യുന്ന' അത് ബിദ്അതല്ലേ, ഇത് ബിദ്അതല്ലേ എന്ന് ചോദിക്കും സാധുക്കൾ.

അപ്പറയുന്ന കർമ്മങ്ങൾ ഏതെടുത്തു നോക്കിയാലും മദ്ഹബിലെ ഇമാമീങ്ങൾ വിലയിരുത്തിയതും പ്രമാണങ്ങൾ വെച്ച് വിധി വ്യക്തമാക്കിയതും ആയിരിക്കും എന്നത് മറ്റൊരു വശം..

വഹ്ഹാബികൾ ബിദ്അതുകാർ എന്ന് പറയുന്നത് കൊണ്ട് ഉദ്ദേശിക്കുന്ന ബിദ്അത്ത് എന്താണ് എന്നും എന്ത് കൊണ്ടാണ് അത് പറയുന്നത് എന്നും മനസ്സിലാക്കാത്തത് കൊണ്ടാണ് ഇമ്മാതിരി പോഴത്തങ്ങൾക്കൊക്കെ കാരണം.

യാതൊരു സല്ക്കർമ്മങ്ങളും സ്വീകരിക്കപ്പെടാത്ത ബിദ്അതുകാരൻ എന്നാൽ ആരാണ് എന്നും അറിയണം. അത്‌ കേവലം പ്രവർത്തിയിൽ വരുന്ന ചില കാര്യങ്ങൾ മാത്രമാണോ അതല്ല വിശ്വാസത്തിനു തന്നെ ബാധിക്കുന്ന പുഴുക്കുത്താണോ എന്നും നാം അറിയണം.

ആദ്യം എന്താണ് ഈ പറഞ്ഞ ഗുരുതരമായ ബിദ്അത് എന്ന് ഇവിടെ പറഞ്ഞത് കൊണ്ട് ഉദ്ദേശ്യം എന്ന് മനസ്സിലാക്കണം.

കർമ്മത്തിൽ ബിദ്അത്ത് എന്ന് പറയുന്നത് പല വിധത്തിൽ നല്ലതും ചീത്തയും ഉണ്ട് എന്ന് എല്ലാ ഇമാമീങ്ങളും പറഞ്ഞിട്ടുള്ള പരമാർത്ഥം ആണ്. ബിദ്അത്ത് എന്താണ് എന്ന് പറയുന്ന ഹദീസുകൾ നമുക്ക് എത്തിച്ചു തന്ന എല്ലാ ഇമാമീങ്ങളും, ഒരാളും ഒഴിയാതെ കർമ്മത്തിലെ ബിദ്അത്ത് നല്ലതും ചീത്തയും ഉണ്ട് എന്ന് പറഞ്ഞവരാണ്.

എന്നാൽ വിശ്വാസം ഒരിക്കലും തിരുത്തപ്പെടാനോ കൂട്ടിചേർക്കപ്പെടാനോ ഉള്ളതല്ല, ആദരവായ നബിതങ്ങൾ പഠിപ്പിച്ച, അവിടുത്തെ ജീവിതത്തെ പകർത്തിയ സ്വഹാബത്തും പിൽക്കാലക്കാരും അപ്പടി തുടർന്നു വന്ന വിശ്വാസകാര്യങ്ങൾ ഒരുകാലത്തും മാറ്റമില്ലാത്തതാണ്. അതിൽ മായം ചേർക്കുന്ന വിശ്വാസങ്ങൾ നല്ലതും ചീത്തയും എന്ന വ്യത്യാസമില്ലാതെ എല്ലാം പിഴച്ച ബിദ്അത് തന്നെ.

വിശ്വാസപരമായ ബിദ്അത്ത് എന്നത് വൻദോഷമാണ്. അത് കര്മ്മപരമായ പാപങ്ങൾ പോലെയല്ല മറിച്ച് അതിലേറെ ഗൌരവകരമാണ്‌. സത്യവിശ്വാസികൾക്ക് എല്ലാം പൊറുക്കുമെന്ന് പറയപ്പെട്ട മഹത് ദിവസങ്ങളിൽ പോലും പൊറുക്കപ്പെടാത്ത കൂട്ടരാണ് വിശ്വാസപരമായ ബിദ്അതുകാർ. സൂഉൽ ഖാത്വിമത്തിനെ ഭയപ്പെടേണ്ട കുറ്റം.

മൂന്നു പാപങ്ങൾ പൊറുക്കപ്പെടുകയില്ല എന്ന് നബിതങ്ങൾ പറഞ്ഞ ഹദീസിൽ മൂന്നാമതായി പറയുന്നതാണ് 'തർക്കുസ്സുന്ന'. (ترك السنة)

എന്താണ് തർക്കുസ്സുന്ന എന്നും നബിതങ്ങൾ വിവരിച്ചു -

ترك السنة الخروج من الجماعة

"തർക്കുസ്സുന്ന എന്നാൽ ജമാഅത്തിൽ നിന്ന് വിട്ടു നിൽക്കുക തന്നെ". (മുസ്തദ്രക് - ഇമാം ഹാക്കിം)

ഈ ഹദീസിൽ പറയുന്ന 'തർക്കുസ്സുന്ന' എന്നാൽ 'ബിദ്അത്ത്' ആണെന്ന് ഇമാമീങ്ങൾ പഠിപ്പിക്കുന്നു.

والمراد بذلك اتباع البدع

"ജമാഅത്തുമായി വിട്ടുപിരിയുകയെന്നാൽ ബിദ്അത്തിനോട് പിൻപറ്റുകയാണ് ഉദ്ദേശ്യം"

കാലാകാലങ്ങളായി ഇജ്മാഉള്ളതും ഇസ്ലാമിലെ വിശ്വാസ കാര്യങ്ങളിൽ പെട്ടതുമായ വിഷയങ്ങളിൽ നിന്നും ളറൂറത് കൊണ്ട് അറിയപ്പെടാത്തവ വെടിയുകയും നിരാകരിക്കുകയും ചെയ്യുന്നതാണ് ബിദ്അത്. അത്തരം മുസ്ലിമീങ്ങൾ ഒരുമിച്ചംഗീകരിക്കുന്ന കാര്യങ്ങളെ നിഷേധിക്കുകയും നിരാകരിക്കുകയും ചെയ്യുന്നതാണ് മാപ്പ് ലഭിക്കാത്ത ബിദ്അത്ത് കൊണ്ട് ഉദ്ദേശ്യം.

ഈ വിശ്വാസ കാര്യങ്ങൾ ഇമാം അബുൽ ഹസനിൽ അഷ്അരി(റ) തങ്ങളും അബൂ മൻസൂരിനിൽ മാതുരീദി(റ) തങ്ങളും വിസ്തരിച്ചു വിവരിച്ചു ക്രോഡീകരിച്ചു വെച്ചതാണ്. തിരുനബിതങ്ങളുടെയും സ്വഹാബത്തിന്റെയും എല്ലാം വിശ്വാസ വഴി അപ്പടി വിവരിച്ചു പഠിപ്പിച്ചവരാണ് അവർ. അവരും അനുഗാമികളും നിലകൊള്ളുന്ന വിശ്വാസ വഴി എന്താണോ അതാണ്‌ അഹ്ലുസ്സുന്നതി വൽ ജമാഅത്ത് എന്നതിലെ സുന്നത്ത് കൊണ്ട് ഉദ്ദേശ്യം. അശ്അരീ, മാതുരീദീ വിശ്വാസങ്ങൾക്ക് എതിരായുള്ള വിശ്വാസങ്ങൾ ആണ് ബിദ്അത്ത് (അഹ്ലുസ്സുന്നക്ക് വിരുദ്ധമായ ബിദ്അത്ത്) എന്നത് കൊണ്ട് ഉദ്ദേശ്യം..

المـراد بالسنة ما عليه إماما أهل السنة والجمـاعة الشيخ أبو الحسن الأشعري وأبو منصور الماتريدي والبدعة ما عليه فرقة من فرق المبتدعة المخالفة الاعتقاد هذين الامامين وجميع اتباعهما

الزواجر

"സുന്നത്ത് കൊണ്ടുദ്ദേശ്യം, അഹ്ലുസ്സുന്നത്തി വൽ ജമാഅത്തിന്റെ രണ്ടു ഇമാമുകൾ, ശൈഖ് അഷ്അരിയും മാതുരീദിയും എതൊന്നിൻമേൽ നിലകൊണ്ടുവോ ആ വിശ്വാസ കാര്യങ്ങളാണ്. ബിദ്അത്ത് എന്നാൽ ഇവർ രണ്ടുപേരുടെയും അവരുടെ മുഴുവൻ അനുഗാമികളുടെയും വിശ്വാസത്തിന് എതിരായി നിലകൊള്ളുന്ന ബിദ്അത്തിന്റെ സംഘങ്ങളിൽ നിന്ന് ഏതെങ്കിലും സംഘം വെച്ചു പുലർത്തുന്ന വിശ്വാസങ്ങളുമാണ്."
(സവാജിർ - ഇമാം ഇബ്നു ഹജർ(റ)).

അല്ലാഹു എന്ന സ്രഷ്ടാവിനെ കുറിച്ചുള്ള വിശ്വാസത്തിൽ അടക്കം എന്തെല്ലാം മായങ്ങൾ ഇവർ ചേർത്തു..! സ്ഥലകാലാതീതനായ അവനു സ്ഥലം നിശ്ച്ചയിചും അവയവങ്ങളെ തൊട്ട്‌ പരിശുദ്ധനായ അല്ലാഹുവിനു കയ്യും മുഖവുമെല്ലാം ഉണ്ടെന്ന് വാദിച്ച്‌, ഇലാഹിനെ പറ്റിയുള്ള മുസ്‌ലിമിന്റെ വിശ്വാസത്തെ പോലും തിരുത്തിയ കക്ഷികളാണിവർ..!

അല്ലാഹുവിന്റെ വാജിബായതും മുസ്തഹീലായതുമായ സ്വിഫത്തുകളെ പറ്റി പറയുമ്പോൾ "അല്ലാഹുവിന്‌ വാജിബാക്കാൻ ഇവർ ആരാ" എന്ന് ചോദിച്ച കറതീർന്ന ബിദഈ വിശ്വാസക്കാർ.

ഇങ്ങനെ മുസ്ലിം ലോകത്തിന്‌ കേട്ടുകേൾവി ഇല്ലാത്ത എന്തെല്ലാം പിഴച്ച വിശ്വാസങ്ങൾ ഇവർക്കുണ്ട്‌..! ഇജ്മാ ഇനു വിരുദ്ധമായ എന്തൊക്കെ വാദങ്ങൾ..!

എന്നാൽ സുന്നികൾ ആയിരത്തി നാനൂറു വർഷമായി യാതൊരു മാറ്റവുമില്ലാത്ത അടിയുറച്ച വിശ്വാസത്തിന്റെ മേൽ ഏകോപിച്ചിരിക്കുന്നവരാണ്‌. അല്ലാഹുവിലുള്ള വിശ്വാസത്തിലോ ഖദ്രിലുള്ള വിശ്വാസത്തിലോ ഈമാൻ കാര്യങ്ങളിൽ ഒന്നിലുമോ തിരുത്തില്ലാത്ത നേരായ വിശ്വാസം.

ബിദ്അത്ത് എന്നാൽ കേവലം കർമ്മത്തിൽ ഒതുങ്ങി നിൽക്കുന്ന ചിലതിലേക്ക് തളച്ച്, പിഴച്ച വിശ്വാസത്തെ ആണ് യഥാർത്ഥത്തിൽ സുന്നത്തിനു വിരുദ്ധമായ ബിദ്അത്ത് എന്ന പ്രയോഗത്തിലെ ഏറ്റവും മർമ്മമായ ഭാഗമായി പറയേണ്ടത് എന്നുള്ള അടിസ്ഥാന ഭാഗം തന്നെ മുക്കി പാവപ്പെട്ട അണികളെ പിഴപ്പിക്കുന്നതാണ് വഹ്ഹാബീ നേതാക്കൾ.

തിരുനബിതങ്ങളും സ്വഹാബത്തും നിലകൊണ്ട വിശ്വാസത്തിൽ ആരു ജീവിക്കുന്നോ അവരാണ്‌ അഹ്ലുസ്സുന്ന. നൂറ്റാണ്ടുകൾ എത്രയോ ആയി മാറ്റമില്ലാതെ മുസ്ലിം ലോകം തുടർന്നു പോരുന്ന അടിസ്ഥാന വിശ്വാസമായ തൗഹീദിൽ പോലും തീരാത്ത ഇജ്തിഹാദുകൾ തുടരുന്ന വഹ്ഹാബീ വിഭാഗത്തിന്റെ ഇന്നത്തെ അവസ്ഥ കണ്ടിട്ടും നിങ്ങൾക്ക് മനസ്സിലാകുന്നില്ലേ ഇത് മുഅ്തസിലത്, ഖവാരിജ്, ഷീഅത്ത്, മുർജിഅ, മുശബ്ബിഹ..അങ്ങനെ പോകുന്ന ബിദ്അത്തിന്റെ കക്ഷികളിൽ പെട്ടത് തന്നെയെന്ന്..!!!

(അവലംബം: മൗലാനാ നജീബ് മൌലവിയുടെ പഴയ ഒരു ലേഖനം )

ഉച്ചഭാഷിണി ഉപയോഗവും തഖ്'വായുടെ വഴിയും..

ലോകത്തെ സ്വധീനിച്ച 500 പേരുടെ ലിസ്റ്റിൽ ഇന്ത്യയിൽ നിന്നുള്ളവരിൽ 2 ആമത്തെ പേരുള്ള മുഫ്തി അഖ്തർ റസാ ഖാൻ ഖാദിരി അവർകൾ 'അഅലാ ഹസ്രത്ത്‌' ഇമാം അഹ്‌മദ്‌ റസാ ഖാൻ ബറേൽവിയുടെ (ന:മ) പേരക്കുട്ടിയും നിരവധി ബൃഹദ്‌ ഗ്രന്ഥങ്ങളുടെ രചയിതാവും 'താജുശ്ശരീഅ' എന്ന പേരിൽ വിഖ്യാതനുമാണ്‌.

പള്ളികളിലെ ഉച്ചഭാഷിണി ഉപയോഗം ചർച്ചയായി വന്നിരിക്കുന്ന കേരളീയ സാഹചര്യത്തിൽ അദ്ദേഹം നിസ്ക്കാരത്തിൽ ഉച്ചഭാഷിണി ഉപയോഗിക്കുന്നതിന്റെ നിയമസാധുതയെ കുറിച്ചുള്ള ചോദ്യത്തിന്‌ നൽകിയ മറുപടി ശ്രദ്ധേയമാണ്‌. അദ്ദേഹം ഹനഫീ മദ്‌ഹബുകാരൻ ആണെങ്കിൽ കൂടി ഇവ്വിഷയകമായി സൂക്ഷ്മതയുടെയും പ്രഗൽഭരായ ഉലമാക്കളെ പിൻപറ്റുന്നതിന്റെയും വഴിയിൽ ഏവർക്കും മാതൃകാ യോഗ്യമാണീ വിശകലനം.

സുന്നിയായ ഇമാമിന്റെ പുറകിൽ ലൗഡ്‌ സ്പീക്കർ ഉപയോഗിക്കുന്ന പള്ളിയിൽ നിസ്ക്കാരത്തിൽ പങ്കെടുക്കുന്നവർക്ക്‌ ഉലമാക്കൾക്ക്‌ നൽകാനുള്ള ഉപദേശം എന്താണെന്ന ചോദ്യത്തിന്‌ അദ്ദേഹം നൽകിയ മറുപടി അദ്ദേഹത്തിന്റെ പേരിലുള്ള വെബ്‌സൈറ്റിൽ 2000 മെയ്‌ 5 നു നൽകിയ ഫത്‌വായായി ഇംഗ്ലീഷിൽ ഉള്ളതിന്റെ ആശയം ചുവടെ കൊടുക്കുന്നു:

"നിസ്ക്കാരത്തിന്‌ മൈക്ക്‌ ഉപയോഗിക്കുന്ന വിഷയകമായി എനിക്ക്‌ പറയാനുള്ളത്‌ എന്തെന്നാൽ 'നിസ്ക്കാരത്തിന്‌ മൈക്രോഫോൺ ഉപയോഗിക്കുന്നത്‌ നിയമവിരുദ്ധമാണെ'ന്നാണ്‌. കാരണം മഅമൂമുകൾ ഇമാമിന്റെ ഒറിജിനൽ ശബ്ദം തന്നെ കേൾക്കേണ്ടതുണ്ട്‌.

മൈക്രോഫോണിൽ കൂടെ പുറത്തു വരുന്ന ശബ്ദം ഇമാമിന്റെ ശബ്ദത്തെ തോന്നിപ്പിക്കുന്നുവെങ്കിൽ കൂടെ അത്‌ ഇമാമിന്റെ ശബ്ദമല്ല, വ്യത്യസ്തമായ മറ്റൊരു ശബ്ദമാണ്‌. അത്‌ കൊണ്ടാണ്‌ സജദയുടെ ആയത്തുകൾ ഒരു പക്ഷിയുടെ ശബ്ദത്തിൽ പ്രതിധ്വനിച്ച്‌ കേട്ടാൽ തിലാവത്തിന്റെ സുജൂദ്‌ ചെയ്യൽ നിർബന്ധമില്ല എന്ന് ഉലമാക്കൾ ഏകകണ്ഡമായി പറയുന്നത്‌.

അത്‌ കൊണ്ട്‌ തന്നെ മൈക്ക്‌ ഉപയോഗിച്ചുള്ള നിസ്ക്കാരം ഒന്നുകിൽ നിസ്സംശയം ഫാസിദാണ്‌ - ഇമാമിന്റെ ശബ്ദം (ഒറിജിനൽ) കേൾക്കുകയോ തന്റെ മുമ്പിലുള്ള മഅ്മൂമുകളുടെ പ്രവർത്തനങ്ങൾ വീക്ഷിക്കുകയോ ചെയ്യാത്ത, സ്പീക്കറിൽ കൂടെ പുറത്തു വരുന്ന ശബ്ദത്തെ മാത്രം ആശ്രയിച്ച്‌ തുടരുന്നവരുടെ കാര്യത്തിൽ.

അല്ലെങ്കിൽ ഫാസിദാണെന്ന് സംശയിക്കേണ്ടിയിരിക്കുന്നു - ഇമാമിന്റെ ശബ്ദം അറിയിക്കുന്നതിൽ സ്പീക്കറിന്‌ സാധിക്കാതിരിക്കുമ്പോൾ. കാരണം ഈ ആവസ്ഥയിൽ ഇമാമിന്റെ നിസ്ക്കാരം പൂർത്തിയായോ അതോ ഇപ്പോഴും തുടരുന്നോ എന്ന കാര്യം അവർ അറിയാൻ കഴിയില്ലെന്നതിനാൽ ഇമാമിന്റെ അവസ്ഥയെ കുറിച്ചുള്ള വ്യക്തമായ ധാരണ ലഭിക്കുന്നില്ല.

അത്‌ കൂടാതെ, മൈക്കിലേക്ക്‌ തന്റെ ശബ്ദം എത്തിക്കുന്നതിന്‌ ഇമാമിന്‌ കുറേ ഏറെ പ്രവർത്തികൾ ചെയ്യേണ്ടതുണ്ടെങ്കിൽ, ഇമാമിന്റെയും തുടരുന്നവരുടേയും നിസ്ക്കാരം ഫാസിദാണ്‌. (വിവർത്തകൻ: നിസ്ക്കാരത്തിൽ നിർത്തി വെച്ച മൈക്കിലേക്ക്‌ ഇമാമുകൾ കഴുത്ത്‌ നീട്ടിയും അതിൽ മുട്ടാതിരിക്കാൻ ഇറങ്ങി നിന്ന് റുകൂ ചെയ്യുകയും സുജൂദിൽ നിന്നുയർന്ന ശേഷം മൈക്കിനടുത്തേക്ക്‌ കയറി നിൽക്കുകയും ചെയ്യുന്നത്‌ സർവ്വ സാധാരണമായി മാറിക്കഴിഞ്ഞു എന്നത്‌ ഓർക്കുക!)

ആയതിനാൽ നിസ്ക്കാരത്തിനിടയിൽ എത്രമാത്രം മുൻ കരുതൽ സുപ്രധാനമാണെന്ന് നിങ്ങൾക്ക്‌ മനസ്സിലാക്കാവുന്നതാണ്‌. അതൊക്കെ കൊണ്ട്‌ തന്നെയാണ്‌ 'മുഫ്തി-എ-അഅ്ളം ഹിന്ദ്‌' (മുസ്തഫ റസാ ഖാൻ ഖാദിരി: 1892-1981) അദ്ദേഹത്തെ പോലുള്ള വലിയ ഉലമാക്കളും നിസ്ക്കാരത്തിൽ മൈക്ക്‌ ഉപയോഗിക്കുന്നതിനെ വിരോധിച്ചത്‌.

നിർത്തുന്നതിന്‌ മുമ്പ്‌ എനിക്ക്‌ നിങ്ങളോട്‌ ആവശ്യപ്പെടാനുള്ളത്‌ - ഭക്തനും സുന്നിയും കഴിവുറ്റവനുമായ ഒരാളെ ഇമാമായി ലഭിച്ചാൽ ഒരിക്കലും നിസ്ക്കാരത്തിന്‌ ജമാഅത്ത്‌ ഉപേക്ഷിക്കരുത്‌. (മൈക്ക്‌ ഉപയാഗിക്കുന്നതിനാൽ) നിസ്ക്കാരം ഫാസിദാകാതിരിക്കാൻ ഇമാമിന്റെ തൊട്ടു പുറകിലോ, മുന്നിലുള്ള ഏതെങ്കിലും സ്വഫ്ഫിലോ അല്ലെങ്കിൽ "സ്പീക്കറിൽ നിന്നു വരുന്ന ശബ്ദത്തെ ആശ്രയിക്കാതെ" മുമ്പിലെ സ്വഫ്ഫിലുള്ളവരുടെ പ്രവർത്തനങ്ങൾ വീക്ഷിക്കാൻ കഴിയുന്ന എവിടെ എങ്കിലുമോ നിൽക്കുക. സുന്നിയും ഭക്തനും കഴിവുള്ളവനുമായ ഒരു ഇമാമിനെ കിട്ടിയാൽ ജമാഅത്തിനെ ഒഴിച്ചു കൂടാത്തത്‌ കൊണ്ടാണ്‌ ഇങ്ങനെ പറയാൻ കാരണം. അല്ലാഹുവാണ്‌ ഏറ്റവും അറിയുന്നവൻ".

http://www.taajushshariah.com/Fatawa/microphone.html

രക്ഷിതാവായ അല്ലാഹുവും സൃഷ്ടിയും തമ്മിലുള്ള ഇടപാടുകളായ ആരാധനാ കർമ്മങ്ങളിൽ ഒരു ഉലമാക്കൾക്കും എതിർപ്പില്ലാത്ത, ഏവരാലും അംഗീകരിക്കപ്പെടുന്ന മാതൃക സ്വീകരിക്കലാണുത്തമം. സംശയം ഉള്ളതിൽ നിന്നും സംശയം ഇല്ലാത്തതിലേക്ക്‌ മാറി നിൽക്കുക എന്നത്‌ ആദരവായ നബിതങ്ങളുടെ വ്യക്തമായ ഉദ്ബോധനമാണല്ലോ.





മൈക്ക്‌ ഉപയോഗിക്കാതെ, ഇത്തരം നിസ്ക്കാരത്തിന്റെ ഖുഷൂഇനെയും ശ്രദ്ധയേയും തകർക്കുന്ന യാതൊന്നും ഇടയിൽ കൊണ്ട്‌ വരാതെയും ചെയ്യുന്ന ഇബാദത്തുകളുടെ സ്വീകാര്യതയിലും സാധുതയിലും ആർക്കും തർക്കമില്ല - എന്നാൽ ഇത്‌ ഉപയോഗിച്ചാൽ അത്‌ ഇബാദത്തുകളുടെ സ്വീകാര്യതക്ക്‌ വരേ കോട്ടം തട്ടിക്കുമെന്ന് പറഞ്ഞ ഉലമാക്കൾ ചെറിയവരല്ലല്ലോ. കേരളം കണ്ട ഏറ്റവും പ്രഗൽഭരായ ആലിമീങ്ങൾ ഒട്ടനവധി ഇത്‌ ഉപയോഗിക്കരുതെന്ന് പറഞ്ഞവരാണ്‌ (മുൻ കാല സുന്നീ ഉലമാക്കളിൽ ഭൂരിപക്ഷവും ഇതിന്നെതിരായിരുന്നു). എല്ലാ അഭിപ്രായ വ്യത്യാസങ്ങളെയും മാനിക്കുക എന്ന നമ്മുടെ മദ്‌ഹബിന്റെയും തിരു ശരീഅത്തിന്റെയും വ്യക്തമായ വഴക്കം ഇതിലും തുടരുന്നത്‌ നന്മ മാത്രമേ കൊണ്ട്‌ വരുകയുള്ളൂ.

ലൗഡ്‌ സ്പീക്കർ ആരാധനകളിൽ ഉപയോഗിക്കുന്നതിനെതിരായിരുന്ന ഉലമാക്കൾ എണ്ണമറ്റതാണ്‌. കേരളത്തിലെ സുന്നീസരണിയുടെ കാവലാളുകളായ ഉലമാക്കൾ ആകമാനം അക്കൂട്ടത്തിലുണ്ട്‌. ആ ഗണത്തിൽ എണ്ണപ്പെടാവുന്ന തലമുതിർന്ന പണ്ഡിതരിൽ ബഹു: കണ്ണിയത്ത്‌ അവർകൾ(ന:മ) മാത്രമാണ്‌ അതിന്റെ ഉപയോഗത്തിന്‌ അനുകൂലമായി നിന്നത്‌ - അദ്ദേഹത്തിന്റെ നിലപാട്‌ തന്നെ നിരുപാധികം ആയിരുന്നില്ല എന്ന് അവിടുത്തെ ഫത്‌വാ വായിച്ചാൽ മനസ്സിലാകും.

പുതുതലമുറക്ക്‌ അറിയുന്നതിലേക്കായി ചില പേരുകൾ കുറിക്കട്ടെ:

ശംസുൽ ഉലമാ ഖുതുബി, ശൈഖ്‌ ആദം ഹസ്രത്ത്‌, മൗലാനാ വാളക്കുളം അബ്ദുൽബാരി മുസ്ലിയാർ, താജുൽ ഉലമാ സദഖത്തുല്ല മൗലവി, ശംസുൽ ഉലമാ കീഴന ഓർ
കൈപ്പറ്റ ബീരാൻ കുട്ടി മുസ്‌ലിയാർ, കരിങ്കപ്പാറ മുഹമ്മദ്‌ മുസ്‌ലിയാർ, കക്കിടിപ്പുറം അബൂബക്കർ മുസ്‌ലിയാർ, ഓമച്ചപ്പുഴ അബൂബക്കർ മുസ്‌ലിയാർ, നിറമരുതൂർ ബീരാൻ കുട്ടി മുസ്‌ലിയാർ, ശൈഖ്‌ ഹസൻ ഹസ്രത്ത്‌, കാങ്ങാട്ട്‌ കുഞ്ഞബ്ദുല്ല മുസ്‌ലിയാർ, കണാരാണ്ടി അഹ്‌മദ്‌ മുസ്‌ലിയാർ, കാസർഗോഡ്‌ ഭാഗത്ത്‌ കീഴൂർ മുഹമ്മദ്‌ മുസ്‌ലിയാർ, മൗലാനൽ മർഹൂം കുഞ്ഞറമൂട്ടി മുസ്ലിയാർ (ന:മ-ഹും) എന്നിങ്ങനെ ഒട്ടനവധി പണ്ഡിത പ്രഭുക്കൾ.

ദക്ഷിണ കേരളത്തിലെ പ്രമുഖ പണ്ഡിതരും തത്വോപദേശ ഗാനങ്ങൾ വഴി ഏവർക്കും സുപരിചിതരുമായ മർഹൂം: തഴവാ മുഹമ്മദ്‌ കുഞ്ഞ്‌ മൗലവി (ന.മ.) അവർകളുടെ പള്ളിയിൽ ബാങ്കിനു പോലും സ്‌പീക്കർ ഉപയോഗിക്കാറില്ല. ഉപയോഗിക്കുന്നത്‌ അദ്ദേഹം എതിർത്തിട്ടുമുണ്ട്‌.

ഉത്തരേന്ത്യയിലെ രണ്ട്‌ പ്രമുഖ ധാരകളായ ബറേൽവി - ദയൂബന്ദീ വിഭാഗങ്ങളിൽ പെട്ട വലിയ വലിയ ആലിമീങ്ങളും ഇതിനെതിരെ ഫത്‌വാ കൊടുത്തവരാണ്‌. ബറേൽവികളിലെ വലിയൊരു ആലിമിന്റെ ഫത്‌വായാണല്ലോ മുകളിൽ കൊടുത്തത്‌, അതേ പോലെ ദയൂബന്ധികളിലെ മുഫ്‌തി മുഹമ്മദ്‌ ശഫീഅ്, മൗലാനാ അഷ്‌റഫലി താനവി, മൗലാനാ ഹുസൈൻ അഹ്‌മദ്‌ മദനി (ന. മ. ഹും) മുതലായവരും ഇതിനെതിരെ നിലപാടെടുത്തവരാണ്‌.

സ്പീക്കറിൽ കൂടെ വരുന്ന ശബ്ദം പറയുന്നവന്റെ യഥാർത്ഥ ശബ്ദമല്ല എന്ന് വ്യക്തമാക്കുന്ന ശാസ്ത്ര സത്യങ്ങളും മുകളിലത്തെ പോലെ നിറഞ്ഞ ഉലമാക്കളുടെ സാക്ഷ്യവും കൂടെ വെച്ച്‌ സ്പീക്കർ വെച്ചു നടത്തപ്ലെടുന്ന നിക്കാഹുകളിൽ നേർക്കുനേരെ വരനും വലിയ്യും വാക്കുകൾ കേൾക്കാതെ, സ്പീക്കറിലൂടെയുള്ള ശബ്ദമാണ്‌ കേൾക്കുന്നതെങ്കിൽ ആ നിക്കാഹിന്റെ സാധുതയുടെ കാര്യം ഒന്നാലോചിച്ചു നോക്കിയോ..?!

ഹറാം - ഹലാൽ ചർച്ചകൾ തൽക്കാലം മാറ്റിവെച്ചേക്കൂ, വരനും വലിയ്യും സാക്ഷികളും നിക്കാഹിന്റെ വാക്കുകൾ പറയുന്നത്‌ സ്വന്തം ശബ്ദം തന്നെ കേൾക്കൽ നിർബന്ധമാണെന്നതിൽ ഒരുവിധ തർക്കവുമില്ലെന്നിരിക്കിൽ സ്പീക്കർ ശബ്ദം കലർന്ന് ശരിയായ ശബ്ദം കേൾക്കാതിരിക്കാൻ സാധ്യതയേറെയുള്ളതാണെന്ന് വലിയ വലിയ ഉലമാക്കൾ തന്നെ പറയുന്നവരായിബുണ്ടായിട്ടും, യാതൊരു സൂക്ഷ്മതയും പാലിക്കാത്ത മൈക്ക്‌ കൊണ്ടു വന്ന് നടുവിൽ വെക്കുന്നവർ ചിന്തിക്കുക. സ്വന്തം മകളുടെ നിക്കാഹ്‌ എല്ലാ ഉലമാക്കളും അംഗീകരിക്കുന്ന രീതിയിൽ ആക്കാൻ മൈക്ക്‌ ഉപക്ഷിക്കുകയാണ്‌ വേണ്ടത്‌ എന്നും മൈക്ക്‌ ഉപയോഗിക്കുന്നതല്ല, ഉപേക്ഷിക്കുന്നതാണ്‌ സൂക്ഷ്മതയും ഉത്തമവും എന്നും ഓരോ പിതാക്കളും ഓർക്കുക..!

നല്ലത്‌ മനസ്സിലാക്കുവാനും അത്‌ പിൻപറ്റുവാനും നാഥൻ തുണക്കട്ടെ..ആമീൻ

വിശപ്പിന്റെ ദൈവം - ഒരു വേദനാജനകമായ അനുഭവക്കുറിപ്പ്

ഇറാനിലെ ഖിഷം ദ്വീപിലേക്ക് വിമാനമിറങ്ങിയ ശേഷം ബസ്സിൽ നേരിട്ട് ഒരു ഹോട്ടലിലേക്ക് ആണ് പോയത്. അവിടെ ഒമ്പത് ദിവസത്തോളം ജീവിച്ചു. ആവശ്യത്തിനു പണവും ഏതു സമയവും വിസ ശരിയായി വിളി വരുമെന്ന് ഉറപ്പും ഉള്ളത് കൊണ്ട്  ജീവിതം വലിയൊരു പ്രയാസകരമായി അനുഭവപ്പെട്ടില്ല. അടുത്ത ദിവസങ്ങളിലായി എത്തിയവർ കയ്യിൽ കാശുള്ളതിനാൽ അവിടെ ലഭ്യമായ ആസ്വാദന കളികളിൽ മുഴുകി സമയം കൊല്ലുന്നു. ഹുക്ക വലിക്കാർ, സ്നൂക്കർ, ടേബിൾ ടെന്നീസ് കളിക്കാർ, ടീ വി കാണുന്നവർ അങ്ങനെ പലരും, കുറെ ആളുകൾ നിർത്താതെ സംസാരിക്കുന്നു.  മന:പ്രയാസങ്ങൾ നാവ് കൊണ്ട് മറികടക്കാൻ ശ്രമിക്കുന്ന പോലെ തോന്നി. ചിലർ പുറത്തിറങ്ങി നാട് കാണാൻ ശ്രമിക്കുന്നു. ദൂരെ കടലിലേക്ക് നോക്കി ആരെയോ പ്രതീക്ഷിച്ചെന്ന പോലെ ഇരിക്കുന്നവരുണ്ട് കുറേ.

കൗതുകക്കാഴ്ചകൾ തേടി നടക്കുന്ന കണ്ണുകൾ വല്ലാതെ ഉടക്കിയത് പലരുടെയും വേദനകളിലാണ്. മാസങ്ങളായി വിസയും പ്രതീക്ഷിച്ച് കാത്തിരിക്കുന്ന പല പല നാട്ടുകാർ, വിസ ലഭിക്കില്ല എന്ന് ഉറപ്പ് വന്നിട്ട് യു എ ഇ യിലേക്ക് പോകാനാകില്ല എന്നറിഞ്ഞിട്ടും ടിക്കറ്റിനു കാശില്ലാത്തതിനാൽ സ്വന്തം നാട്ടിലേക്ക് പോകാനും കഴിയാതെ ഇനിയെന്ത് എന്ന് ജീവിതത്തെ നോക്കി വിലപിക്കുന്ന ഒട്ടനവധി ആളുകൾ. ഭക്ഷണം കഴിക്കാൻ പോയപ്പോൾ പലർക്കും പല ഭാവങ്ങൾ. കൊടുക്കാൻ കാശില്ലാതെ, ഭക്ഷണം കഴിക്കാൻ കയ്യിൽ ഒരുദിർഹം പോലുമില്ലാതെ യാചന വശമില്ലാത്തതിനാൽ വരുന്നവരുടെ മുന്നിൽ പ്രതീക്ഷയോടെ നോക്കുന്ന മുഖങ്ങൾ ഒരുപാടുണ്ട് അവിടെ. പരിചയമായ മുഴുപ്പട്ടിണിക്കാർക്ക് കൊച്ചു ഭക്ഷണ ശാല നടത്തുന്ന മലയാളിയായ ഇക്ക സൗജന്യമായി ഭക്ഷണം കൊടുക്കുന്നു. അതും ഇല്ലാത്തവർ പട്ടിണി തന്നെ - കൊടും പട്ടിണി..

ദിവസം 5 പിന്നിട്ടു. നോട്ടീസ് ബോർഡിൽ നോക്കി - വിസ എത്തിയിട്ടില്ല. ഇറങ്ങി നടന്നു, രാത്രി വൈകിയ നേരത്ത്, ആകാശത്തിലേക്ക് നോക്കി കുറെ നേരം വീക്ഷിച്ചു, ഹുക്ക വലിക്കുന്നവരുടെയും സ്നൂക്കർ കളിക്കുന്നവരുടെയും ഇടയിലൂടെയൊക്കെ നടന്നു ആളുകളുടെ ഇടപാടുകളൊക്കെ കണ്ട് സമയം പോയി. മുറിയിലേക്ക് പോയി വുളു എടുത്തു നിസ്ക്കരിക്കാൻ വേണ്ടി തിരിച്ചു അവിടെയുള്ള കൊച്ചു പള്ളിയിൽ കയറി. അവിടെയുണ്ടായിരുന്നു മുട്ടുകുത്തി ക്രിസ്ത്യാനികൾ പള്ളിയിൽ ഇരിക്കുന്ന പോലെ രണ്ടു കൈകളും ചേർത്ത് കോർത്ത്‌ പിടിച്ചു തലകുനിച്ച് മിണ്ടാതെ ഇരിക്കുന്ന ഒരു മനുഷ്യനെ അവിടെ കണ്ടു. കണ്ടപ്പോൾ ഒരു ചൈന, കൊറിയക്കാരുടെ മുഖം പോലെ തോന്നി. ശ്രദ്ധിച്ചപ്പോൾ അയാളുടെ അടച്ചു പിടിച്ച കണ്ണിൽ നിന്നും മിഴിനീർ നിർത്താതെ ഒഴുകുന്നുണ്ടായിരുന്നു. മനസ്സ് വല്ലാതെ പിടച്ചു പോയി - ഞാൻ നിസ്ക്കരിക്കാതെ അയാളെ നോക്കി നിന്നു. അങ്ങനെ ഒരു കരച്ചിൽ ജീവിതത്തിൽ ഞാൻ അതിനു മുമ്പും ശേഷവും കണ്ടിട്ടില്ല, നിർത്താതെ ഒഴുകുകയായിരുന്നു കണ്ണുനീർ.

ഒരുപാട് നേരം അങ്ങനെ ഇരുട്ടിൽ ഞാൻ അനങ്ങാതെ നിന്ന് നോക്കി - അയാളുടെ ഗദ്ഗദങ്ങൾ പതുക്കെ ചുണ്ടുകളുടെ പൂട്ട്‌ പൊട്ടിച്ചു പുറത്തു ചാടിതുടങ്ങിയിരുന്നു. മനസ്സിൽ നിന്നും ഒരു പൊട്ടിത്തെറി പോലെ എന്തൊക്കെയോ കൈകൾ രണ്ടും മുകളിലോട്ട് ഉയർത്തി അയാൾ പറഞ്ഞു - ശേഷം കണ്ണും തുടച്ചു കൊണ്ട് എഴുന്നേറ്റ് പുറത്തേക്ക് നടക്കാൻ തുടങ്ങി. എന്തോ അയാളുമായൊന്ന് സംസാരിക്കണം എന്ന് തോന്നി - എന്ത് എന്നറിയില്ല.അടുത്ത് ചെന്ന് അറിയുന്ന ഇംഗ്ലീഷിൽ എന്തൊക്കെയോ ചോദിച്ചു - അയാൾക്ക് മനസ്സിലാകുന്നില്ല, (സത്യത്തിൽ സംസാരിക്കാനും അയാളെ പറ്റി ചോദിക്കാനും തുടങ്ങാൻ ഒരു വിഷയം വേണമല്ലോ എന്ന നിലക്ക് മാത്രം) ഞാൻ അയാളോട് "നിങ്ങൾ മുസ്ലിമാണോ" എന്ന് ചോദിച്ചു - അല്ലെന്നു മറുപടി പറഞ്ഞു. ആ മുഖത്ത് വിഷാദമായിരുന്നു - വിശക്കുന്നവന്റെ മുന്നിൽ മതം ചോദിക്കുന്നത് കൊണ്ട് എന്ത് നേട്ടം എന്നയാളുടെ മുഖം ചോദിക്കുന്നുണ്ടായിരുന്നു. പള്ളിയിൽ മുസ്ലിമീങ്ങൾ അല്ലാത്തവർക്ക് പ്രവേശിക്കാൻ പാടില്ല എന്ന് നിങ്ങൾക്ക് അറിയാമോ എന്ന് ചോദിച്ചു:

മറുപടി വീണ്ടും ഒരിറ്റു കണ്ണുനീർ ആയിരുന്നു - ആംഗ്യത്തിലൂടെയും അറിയാവുന്ന ഭാഷയിലൂടെയും അയാൾ പറഞ്ഞത് 'ഈ ലോകത്ത് എനിക്ക് ആരോടും ഒന്നും പറയാനില്ല - ഇവിടെ പ്രാർഥിക്കാൻ ആളുകൾ വരുന്നത് കണ്ട് ദൈവം ഇവിടെ ഉണ്ടെന്ന് ഞാൻ മനസ്സിലാക്കുന്നു, എന്നും ഈ സമയത്ത് ഞാൻ വന്ന് ഇവിടെ ഇതുപോലെ എന്റെ വേദനകൾ ശബ്ദമില്ലാതെ ഇറക്കി വെക്കും - വേറെ ഒരു വഴിയും എനിക്ക് മുന്നിലില്ല".

ഞാൻ അറിയുകയായിരുന്നു; വിശപ്പ് തന്നെ ഒരു മതമാണ്‌ - വിശ്വാസവും കർമ്മവും ധ്യാനവും എല്ലാം അൽപ്പം ഭക്ഷണത്തിലും വെള്ളത്തിലും ലയിച്ചു നിൽക്കുന്ന ആവശ്യക്കാരൻ സ്വയമറിയാതെ വിശ്വസിക്കുന്ന മതം. വിശുദ്ധ ഇസ്ലാം വിശക്കുന്നവനു ഭക്ഷണം കൊടുക്കുന്നത് ചെയ്യാവുന്ന സല്ക്കർമ്മങ്ങളിൽ എറ്റവും പുണ്യകരമായതിൽ ഒന്നായി പഠിപ്പിക്കുന്നത് എന്ത് കൊണ്ട് എന്ന് അറിയണമെങ്കിൽ വിശപ്പിന്റെ മതത്തിൽ വിശ്വസിക്കുന്നവരെ കാണണം - അറിയണം.

അനിയന്ത്രിതമായി എന്റെ കണ്ണിൽ നിന്നും ഒരു തുള്ളി കണ്ണുനീർ ഉറ്റി വീണു. നാവ് ചലനമറ്റ പോലെ തോന്നി. അന്വേഷിച്ചപ്പോൾ വല്ലതും കഴിച്ചിട്ട് ദിവസങ്ങളായി എന്നും വിസ തരുമെന്ന് പറഞ്ഞവർ പറ്റിച്ചു എന്നും കരുതിയ പണമൊക്കെ തീർന്നു, നാട്ടിലേക്ക് മടങ്ങാൻ ടിക്കറ്റിനു കാശില്ല എന്നും പറഞ്ഞു.വാക്കുകൾ മുറിഞ്ഞു പോയിരുന്നു. കയ്യിലുള്ളത് അയാളുടെ കയ്യിൽ ഏൽപ്പിക്കുമ്പോ തീരാത്ത ചിന്തകൾ മൊട്ടിടുകയായിരുന്നു. എന്റെ കൈകളിൽ അയാൾ തന്ന മുത്തം ഒരു ജീവന്റെ പുതുസ്പർശം പോലെ തോന്നി.ഈ ആരാധനാലയത്തിന്റെ ഭാഗമായ ദൈവം തന്റെ വിളി കേട്ടുവെന്ന് അയാൾക്ക് തോന്നിയോ എന്തോ.

പ്രയാസം വന്നു മൂടിയപ്പോ ആരെന്നറിയാതെ ദൈവത്തിലേക്ക് കൈനീട്ടാൻ വന്ന സഹോദരൻ ഒരു അടയാളമാണ്. അല്ലലിലാതെ, പ്രയാസമില്ലാതെ, യാതൊരു ബുദ്ധിമുട്ടും ഇല്ലാതെ 20 ഇൽ പരം വർഷം എനിക്ക് ഞാനറിയാതെ ഭക്ഷണം തന്ന അല്ലാഹുവിന്റെ മുന്നിൽ ഒരിക്കൽ പോലും ഒന്നു മനസ്സറിഞ്ഞു നന്ദി രേഖപ്പെടുത്താൻ കഴിയാത്ത എനിക്ക് 'എന്റെ അനുഗ്രഹം ഞാൻ നിർത്തൽ ചെയ്‌താൽ ഇങ്ങനെ ഉണ്ടാകും' എന്ന് അവന്റെ പക്കൽ നിന്നുള്ള മുന്നറിയിപ്പ് ലഭിച്ചത് പോലെ..

പിന്നെ അയാളെ കണ്ടിട്ടേ ഇല്ല. വിസ കിട്ടി തിരിച്ചു പോകുന്നതിനു മുമ്പുള്ള രണ്ടു മൂന്നു ദിവസം എല്ലായിടത്തും ഞാൻ അദ്ദേഹത്തെ തിരഞ്ഞു. തിരിച്ചു എയർ പോർട്ടിൽ വിമാനം കയറുന്നത് വരെ എല്ലായിടത്തും, കണ്ടില്ല. എവിടെ നിന്നോ വന്ന് എങ്ങോട്ടോ പോയി. ഒരു നിയോഗം പോലെ - എന്നെ എന്റെ ജീവിതം എന്തെന്ന് ആലോചിക്കാൻ പഠിപ്പിച്ച ഒരു ഗുരുവായി തോന്നി അയാളെ. അന്നും ഇന്നും എന്നും ആ കാഴ്ച മനസ്സിൽ വന്നപ്പോഴൊക്കെ എങ്ങോ ജീവിച്ചിരിപ്പുണ്ടോ എന്ന് പോലും അറിയാത്ത ആ സഹോദരന്റെ ഓർമ്മകൾക്ക് മുമ്പിൽ ഒരു തുള്ളി കണ്ണുനീർ, ഒപ്പം സ്വന്തം മനസ്സിനോട് ഒരുണർത്താൽ കൂടെ വരാതെ പോയിട്ടില്ല..

നിങ്ങളും അറിഞ്ഞിട്ടുണ്ടോ മനസ്സ് നീറുന്ന സമയത്ത്, ആരുമാരും തുണയില്ലാതെ ഉഴറുന്ന സമയത്ത്, വേദനിപ്പിക്കുന്ന ചിന്തകൾ മനസ്സിനെ കീഴടക്കുന്ന സമയത്ത്, പിടിച്ചു കരയറാൻ വൈക്കോൽ തുമ്പ് പോലും കാണാനില്ലാതെ ജീവിതക്കയത്തിൽ മുങ്ങുന്ന സമയത്ത്, സ്വയം മറന്ന് എല്ലാ സഹായങ്ങളിലും സഹായികളിലും പ്രതീക്ഷയറ്റ് നാമറിയാതെ യാന്ത്രികമായി ദൈവികമായ ഒരു സഹായത്തിലേക്ക് കൈനീട്ടിപ്പോകുന്ന ഒരു അവസ്ഥ..?

ഇസ്ലാം പതിതർക്ക് ഒപ്പമാണ് - സ്വദഖകളിൽ ഏറ്റവും ഉത്തമം വിശക്കുന്നവനു ഭക്ഷണം കൊടുക്കലാണ് എന്ന് ആദരവായ നബിതങ്ങൾ പഠിപ്പിച്ചത് നമ്മുടെ കണ്ണ് തുറപ്പിക്കുമോ..?

ഇക്രിമ (റ) - ചെളിക്കുണ്ടിൽ നിന്നും സ്വർഗ്ഗീയാരാമത്തിലേക്ക്..

ഖുറൈശികളിൽ തറവാട് കൊണ്ടും സമ്പത്ത് കൊണ്ടും കരുത്ത് കൊണ്ടും കായബലം കൊണ്ടും ഏറ്റവും മുൻപന്തിയിൽ നിൽക്കുന്നവനായിരുന്നു അബൂജഹൽ. മൂസാനബിക്ക് ഫിർഔൻ എന്ന പോലെയാണ് ആദരവായ നബിതങ്ങളുടെ(സ്വ) സമുദായത്തിൽ അബൂജഹലിന്റെ സ്ഥാനം.മരണസമയത്ത് എങ്കിലും അല്ലാഹുവിലും മൂസാനബിയിലും അവൻ വിശ്വസിച്ചു എങ്കിലും അത് സ്വീകാര്യതയുടെ പരിധിക്ക് അപ്പുറത്തായിരുന്നു. എന്നാൽ അബൂജഹൽ അവിടെയും ഫിർഔനിനെക്കാൾ കടുത്ത അവിശ്വാസി ആണെന്ന് ചരിത്രം തെളിയിച്ചു.

അബൂജഹലും അവന്റെ ധാർഷ്ട്യവും രണ്ട് യുവാക്കളുടെ ശൌര്യത്തിന് കീഴടങ്ങി വെട്ടേറ്റു വീണു. യുദ്ധാവസാനം മൃതശരീരങ്ങൾ നോക്കുന്നതിനിടെ അബ്ദുല്ലാഹ് ഇബ്നു മസ്ഊദ്(റ) തങ്ങൾ ഇനിയും മരിച്ചിട്ടില്ലാത്ത അബൂജഹലിന്റെ നെഞ്ചിൽ കയറി കഴുത്ത് വെട്ടുന്ന സമയത്ത് അവൻ പറഞ്ഞതായി കേട്ടിട്ടുണ്ട് -  "നീട്ടി മുറിക്കൂ എന്റെ കഴുത്ത് - എന്റെ തല കാണുമ്പോ മുഹമ്മദ്‌ ഭയപ്പെടണം..!"

മറ്റൊരു റിപ്പോർട്ടിൽ ഇങ്ങനെ:

"നീ മുഹമ്മദിനോട് പറയണം - ഞാനെന്റെ ജീവിതം മുഴുക്കെ അവനെ വെറുത്തു എന്ന്. ഇപ്പോഴും എന്റെ ഹൃദയത്തിൽ അവനോടുള്ള വെറുപ്പ് ആഴത്തിൽ ആളിക്കത്തുന്നുണ്ട് എന്ന്".

മരണശ്വാസത്തിൽ വരെ ആദരവായ നബിതങ്ങളെ(സ്വ) പകയോടെ കണ്ട അബൂജഹൽ ഒരു കണക്കിന് ഫിർഔനിനെക്കാൾ അധ:പതിച്ചവൻ തന്നെ..!

ബാപ്പാക്ക് ഒത്ത മകനായിരുനനു ഇക്രിമ. സത്യവിശ്വാസത്തിന്റെ വെളിച്ചം കൊണ്ട് അനുഗ്രഹീതരായ മുസ്ലിമീങ്ങളെ ഏതു വിധേനയും ആക്രമിച്ചും പരിഹസിച്ചും ശല്യം ചെയ്യുന്നത് അദ്ദേഹത്തിന്റെ പതിവായിരുന്നു. ബദറിൽ പിടഞ്ഞു വീണ പിതാവിന്റെ ഓർമ്മകൾ അദ്ദേഹത്തിൽ ജ്വലിച്ചു നിന്നു. പ്രതികാരത്തിന് കോപ്പ് കൂട്ടുന്നവരുടെ തീയിലേക്ക് എണ്ണ ഒഴിക്കുന്നത് അദ്ദേഹമായിരുന്നു.

ഉഹദ് വന്നെത്തി. വലഭാഗത്തും ഇടഭാഗത്തുമായി ഖാലിദ് ഇബ്നു വലീദും ഇക്രിമയും ഖുറൈഷീ സൈന്യത്തെ നയിച്ചു. 'ബദറിനു പകരമാണ് ഇന്നത്തെ ദിവസം' എന്ന് അബൂ സുഫിയാൻ പറയാൻ മാത്രം നാശം സത്യവിശ്വാസികളുടെ ഭാഗത്ത് സംഭവിച്ചു പോയ യുദ്ധം..!

ഖന്ദഖിലും ഇക്രിമ മുൻപന്തിയിൽ തന്നെ നിന്നു - ആവേശമായിരുന്നു ഇസ്ലാമിനെതിരിൽ വാളെടുക്കുന്നതിൽ അദ്ദേഹത്തിന്. കിടങ്ങ് ചാടിക്കടന്നു അപ്പുറമെത്തി പിടിച്ചു നിൽക്കാൻ കഴിയാതെ തിരിച്ചു കിടങ്ങ് ചാടി രക്ഷപ്പെട്ടതും അദ്ദേഹം തന്നെ..! കൂടെയുണ്ടായിരുന്ന പ്രഗൽഭന്മാർ അധികവും ഹിദായത്തിന്റെ വെളിച്ചം കണ്ടെത്തി എങ്കിലും ഇക്രിമയുടെ മനസ്സ് കത്തി തന്നെ നിന്നു. തീരാത്ത പകയുമായി ആദരവായ നബിതങ്ങളുടെയും സ്വഹാബത്തിന്റെയും നേരെ അദ്ദേഹം ആക്രമങ്ങൾ അഴിച്ചു വിട്ടു കൊണ്ടേയിരുന്നു.

കാലം രക്ഷിതാവിന്റെ അനിവാര്യമായ വിധിയെ പുലർത്തുക തന്നെയായിരുന്നു. സത്യം അസത്യത്തെ ജയിച്ചു കൊണ്ടേയിരുന്നു. പിടിച്ചു നിൽക്കാൻ വഴിയൊന്നും ഇല്ലെന്നു മനസ്സിലാക്കിയ മക്കക്കാർ പിടിച്ചടക്കാൻ വരുന്ന മുസ്ലിം സൈന്യത്തിനെതിരെ ചെറുക്കാതിരിക്കാൻ തീരുമാനിച്ചു. കാരുണ്യത്തിന്റെ കടലായ ഹബീബ്(സ്വ) അന്നത്തെ ദിവസം എല്ലാവർക്കും മാപ്പ് നൽകി, സത്യം സ്വീകരിക്കാൻ ക്ഷണിച്ചു. പക്ഷെ പൊറുക്കാക്കാവുന്നതിലും എത്രയോ കഠിനമായിരുന്നു ഇക്രിമയുടെയും മറ്റു ചിലരുടെയും പ്രവാചകാധിക്ഷേപം. കഅബയുടെ ഉള്ളിൽ വെച്ച് കണ്ടാലും ഇക്രിമയെയും മറ്റു ചിലരെയും കണ്ടാൽ കൊന്നുകളയാൻ അവിടുന്ന് കൽപ്പിച്ചു.

ഇക്രിമയുടെ ഭാര്യ ഉമ്മു ഹക്കീം(റ) ഇസ്ലാമിനെ പുൽകിയിരുന്നു അപ്പോഴേക്ക്. സ്നേഹഭാജനമായ ഭർത്താവിന് പൊറുക്കാൻ മഹതി നബിതങ്ങളോട് അഭ്യർഥിച്ചു. അവിടുന്ന് കൈവിട്ടില്ല. പ്രതീക്ഷയൊന്നുമില്ലായിരുന്നു മഹതിക്ക് - എങ്കിലും അവസാന പരിശ്രമം എന്ന നിലക്ക് ഭർത്താവിനെ തേടിയിറങ്ങി.

ഇക്രിമ നാട് വിട്ടിരുന്നു. ജീവൻ പോയാലും മുഹമ്മദിനെ(സ്വ) അംഗീകരിക്കാൻ  അദ്ദേഹം തയ്യാറല്ല.മക്ക വിട്ടു - വേഷ പ്രച്ഛന്നനായി യാത്രയായി. അബിസീനിയയിലെക്ക് കടക്കാൻ ശ്രമിക്കുന്ന ഇക്രിമയെ ഉമ്മുഹക്കീം കണ്ടെത്തി. കടൽ കടക്കണം - കപ്പലിൽ കയറ്റാൻ കപ്പിത്താൻ ഒരുക്കമല്ല. ലാ ഇലാഹ ഇല്ലല്ലാഹ് മുഹമ്മദു റസൂലുല്ലാഹ് വിശ്വസിക്കണം എന്ന് നിബന്ധന വെച്ചു..!

ഹിദായത്തിന്റെ വെളിച്ചത്തെ അല്ലാഹു നിശ്ചയിച്ചു കഴിഞ്ഞാൽ പിന്നെ ഓടിമാറിയാലും എവിടെയും നമ്മെ പൊതിഞ്ഞു അല്ലാഹു ഒരുക്കുന്ന മാറ്റത്തിന്റെ കാരണങ്ങൾ മാത്രമാണ് കാണുക."ഈയൊരു വാക്കിൽ നിന്നും വിശ്വാസത്തിൽ നിന്നും രക്ഷപ്പെടാനാണ് ഇത്രയും ദൂരം താണ്ടി ഞാൻ ഇവിടെ വരെ എത്തിയത്" എന്നായിരുന്നു ഇക്രിമയുടെ മറുപടി. മനസ്സിൽ പുതുചിന്തകൾ നാമ്പിടുകയായിരുന്നു.

ഉമ്മുഹക്കീം വന്നു പറഞ്ഞു: "ഞാൻ വരുന്നത് മനുഷ്യരിൽ ഏറ്റവും ഔദാര്യവാനും സത്യസന്ധരുമായ തിരിദൂതർ (സ്വ) യുടെ അടുക്കൽ നിന്നാണ്. നിങ്ങൾക്ക് പൊറുക്കാൻ ഞാൻ അവിടുത്തോട്‌ ആവശ്യപ്പെട്ടു. അവിടുന്ന് സമ്മതിച്ചു"

ഇക്രിമയെയും കൂട്ടി ഉമ്മുഹക്കീം തിരിച്ചു യാത്ര തുടങ്ങി - ഇടത്താവളത്തിൽ വെച്ച് ഭർത്താവായ ഇക്രിമ തന്നിലേക്ക് ആവശ്യവുമായി വന്നപ്പോ മഹതി തടഞ്ഞു - സത്യവിശ്വാസിനിയായ സ്ത്രീയായ എന്നെ അവിശ്വാസിയായ നിങ്ങൾക്ക് വിരോധിതമാണ്". ഇക്രിമ അത്ഭുതപ്പെട്ടു പോയി. തന്റെ സ്വന്തം ഭാര്യ തന്നെ തൊടാൻ അനുവദിക്കാത്ത തരത്തിൽ മനസ്സ് മാറാൻ കഴിയണമെങ്കിൽ ഞങ്ങൾക്ക് ഇടയിലുള്ളത് ഒരു വല്ലാത്ത കാര്യം തന്നെയാണ് എന്ന് മനസ്സിലാക്കുകയായിരുന്നു.

നുബുവ്വത്തിന്റെ തിരുനാവ്‌ കൊണ്ട് അവിടുന്ന് അനുചരന്മാരോട് ഇക്രിമയുടെ വരവ് മുൻകൂട്ടി പറഞ്ഞു വെച്ചു - "ഇക്രിമ വിശ്വാസിയായി ഇവിടെ വരും; ആരും ഇക്രിമയുടെ പിതാവിനെ അദ്ദേഹത്തിന്റെ മുന്നിൽ വെച്ച് ഭത്സിക്കരുത്. മരണപ്പെട്ടവരെ ഭത്സിക്കുന്നത് ജീവിച്ചിരിക്കുന്നവരിൽ പ്രയാസം ഉണ്ടാക്കും".

ഇക്രിമ(റ) തിരുസവിധത്തിലേക്ക് വന്നണഞ്ഞു. ഹബീബ് സ്വീകരിച്ചു - ഹാർദ്ദവമായി. മഞ്ഞുരുകുകയായിരുന്നു അവർക്കിടയിൽ. തിരുസാമീപ്യം അദ്ദേഹത്തിന്റെ മനസ്സിൽ കുളിർ മഴയൊരുക്കുകയായിരുന്നു. താൻ അധിക്ഷേപിച്ച പ്രവാചകർ തന്നെയല്ല, തന്റെ മനസ്സിനെയാണ്‌ കെട്ടിപ്പിടിച്ചതെന്ന് ഇക്രിമ(റ) തിരിച്ചറിയുകയായിരുന്നു.

ഹബീബിന്റെ തിരുനാവിൽ നിന്നും കലിമ ചൊല്ലിക്കൊടുത്തു - ഇക്രിമ ജാഹിലിയ്യതിന്റേയും അഹങ്കാരത്തിന്റെയും താൻ പോരിമയുടെയും അസൂയയുടെയും പോരിന്റെയും പകയുടെയും ഭൂതകാലത്തെ കഴുകിതുടക്കുകയായിരുന്നു..

ഈമാനിലായി തിരുഹബീബുമായുള്ള ഒരു നിമിഷ നേരത്തെ സാമീപ്യം മതിയായിരുന്നു ഒരു മനുഷ്യന് എല്ലാം മാറിമറിയാൻ. അവിടെ തിരിച്ചറിവിന്റെ പുതുലോകം കൈവരുകയാണ്. ജീവിച്ച കാലത്തിലെ ശൂന്യതയും വരാനിരിക്കുന്ന ജീവിതത്തിൽ നിറയാനുള്ള  സന്തോഷവും മനസ്സുകളെ കീഴടക്കുകയാണ് അവിടെ..

എത്രയെത്ര കഠിന ഹൃദയങ്ങളാണ് അവിടുത്തെ സാമീപ്യത്തോടെ തരളിതമായത്. എത്രയെത്ര ജീവിതങ്ങളാണ് ചെളിക്കുണ്ടിൽ നിന്നും സ്വര്ഗ്ഗീയ ആരാമത്തിലേക്ക് പറിച്ചു നടപ്പെട്ടത്..! എത്രയെത്ര ജീവിതങ്ങളാണ് മരണം കൊണ്ട് ജീവിതത്തെ നേടിയത്..!

ഉദാരവാന്മാരിൽ ഉദാരതയുടെ തിരി തെളിച്ച ഹബീബ് തങ്ങൾ(സ്വ) സന്തോഷിക്കുകയായിരുന്നു - ഏതൊരു പിതാവിന്റെ മകനാണിത്‌ എന്നോർത്ത്. എത്ര മാത്രം കഷ്ടപ്പെടുത്തിയ മനുഷ്യനാണ് ഇത് എന്നോർത്ത്..അവിടുന്ന് പറഞ്ഞു:

"ഇക്രിമാ, ഇന്ന് നിങ്ങൾ എന്ത് ചോദിച്ചാലും ഞാനത് നിങ്ങൾക്ക് നൽകും - ചോദിച്ചോളൂ".

ഈമാൻ കൊണ്ട് തിരുസദസ്സിലെ കുറഞ്ഞ നിമിഷങ്ങൾ ഇക്രിമ(റ) തങ്ങളുടെ തിരുമനസ്സിനെ പരിവർത്തനത്തിന്റെ വെളിച്ചം കൊണ്ട് തലോടിക്കഴിഞ്ഞിരുന്നു - ദുനിയാവ് വാരിക്കോരി ചോദിക്കാമായിരുന്നു, സമ്പത്തും അധികാരവും ചോദിക്കാമായിരുന്നു - വിട്ടു പോകേണ്ട ദുനിയാവിനെ കയ്യൊഴിയാൻ നിമിഷങ്ങൾ മതിയായിരുന്നു, അദ്ദേഹം ചോദിച്ചത് മറ്റൊന്നായിരുന്നു:

"നബിതങ്ങളെ, എനിക്ക് വേണ്ടത് അല്ലാഹുവിങ്കൽ നിന്നും പാപമോചനമാണ്, ഞാൻ ചെയ്തുകൂട്ടിയതിൽ നിന്നും അവിടുത്തോട്‌ കാട്ടിയ വെറുപ്പിൽ നിന്നും എന്നോട് പൊറുക്കാൻ അവിടുന്ന് അല്ലാഹുവിനോട് പറയണം, അവിടുത്തെ സാന്നിധ്യത്തിലും അസാന്നിധ്യത്തിലും അവിടുത്തെ പറ്റി പറഞ്ഞതെല്ലാം പൊറുക്കാൻ, അവിടുത്തെ എതിരാളിയായി ഞാൻ ചിലവഴിച്ച നിമിഷങ്ങളൊക്കെ പൊറുക്കാൻ ".

നബിതങ്ങൾ ഇലാഹീ സവിധത്തിലേക്ക് തേടി - ഇക്രിമ(റ) സന്തുഷ്ടനായി. ഈമാനിന്റെ വെളിച്ചം ഇക്രിമ(റ)യെ നയിക്കുകയായിരുന്നു - താൻ ചെയ്ത ഓരോ അക്രമങ്ങൾക്കും പകരം സത്യവിശ്വാസത്തെ ജ്വലിപ്പിക്കാൻ അദ്ദേഹം അക്ഷീണം പ്രയത്നിക്കുകയായിരുന്നു. എത്ര പെട്ടെന്നാണ് എല്ലാം മാറിമറിഞ്ഞത്. രാത്രികളെ വെളിച്ചമുറ്റതാക്കി നിസ്ക്കാരത്തിൽ ലയിക്കുന്ന, പകലുകളിൽ പുണ്യ വേദത്തിന്റെ തിരുസൂക്തങ്ങൾ പാരായണം ചെയ്യുന്നതിൽ സന്തോഷം കണ്ടെത്തുന്ന തികഞ്ഞ ഭക്തിയുടെ മുഖമായി അദ്ദേഹം മാറി.

'ഞാൻ ഇസ്ലാമിനെതിരിൽ ചെയ്തത് എന്തൊക്കെയാണോ അതിന്റെ ഇരട്ടി ഇരട്ടിയായി പരിശുദ്ധ ഇസ്ലാമിന് വേണ്ടി ഞാൻ ചെയ്യും - പോരാടും' എന്ന് അദ്ദേഹം നബിതങ്ങൾക്ക് കൊടുത്ത വാക്ക് അക്ഷരം പ്രതി പാലിക്കപ്പെട്ടു. ഇസ്ലാമിനായി ധീരധീരം പോരാടുന്ന രണ വീരനായി അദ്ദേഹം മാറാൻ സമയമെടുത്തില്ല.

യർമൂക്ക് യുദ്ധഭൂമിയിൽ വീരനായ ഖാലിദ് ഇബ്നു വലീദെന്ന നേതാവിന്റെ കീഴിൽ യുദ്ധമുന്നണിയിൽ ആഞ്ഞടിക്കുകയായിരുന്നു ഇക്രിമ(റ). ഇസ്ലാമിക സേനക്കെതിരെ ആക്രമണം രൂക്ഷമായപ്പോൾ അദ്ദേഹത്തിലെ യോദ്ധാവിന് വീര്യം കൂടുകയായിരുന്നു, കുതിരയെ വിട്ട് കാൽ നടയായി ശത്രുപാളയത്തിലേക്ക് കുതിച്ചു കയറുകയായിരുന്നു അദ്ദേഹം - അപകടം മണത്ത ഖാലിദ് തങ്ങൾ ഇക്രിമ(റ) യെ തടയാൻ ശ്രമിച്ചു. പക്ഷെ ആ നിശ്ചയ ദാർഡ്യം നിറഞ്ഞ കരുത്തുറ്റ വാക്കുകൾ അംഗീകരിക്കാതിരിക്കാൻ ഖാലിദ്(റ) വിനു കഴിഞ്ഞില്ല.

"എന്നെ വിടൂ ഖാലിദ്, നിങ്ങൾക്ക് ഭൂതകാലത്ത് ആദരവായ നബിതങ്ങൾ(സ്വ) യുമായി നല്ല ബന്ധമുണ്ടായിരുന്നു.പക്ഷെ ഞാനും എന്റെ പിതാവും അവിടുത്തെ ഏറ്റവും കടുത്ത ശത്രുക്കൾ ആയിരുന്നു. ഞാനെന്റെ ഭൂതകാലത്ത് ചെയ്തതിനൊക്കെ പകരം ഞാൻ തിരിച്ചു ചെയ്യട്ടെ. ഞാൻ നബിതങ്ങൾക്ക്(സ്വ) എതിരെ ഒരുപാട് പ്രാവശ്യം യുദ്ധം ചെയ്തു. എന്നിട്ട് ഞാനിപ്പോ ഈ ബൈസന്റൈൻ സൈന്യത്തിൽ നിന്നും ഓടി രക്ഷപ്പെടുകയോ - അതൊരിക്കലും സംഭവ്യമല്ല തന്നെ"..!

'മരണം വരെ പോരാടാൻ തയ്യാറുള്ളവർ ആരുണ്ട്' എന്നദ്ദേഹം ഉറക്കെ വിളിച്ചു ചോദിക്കുകയും കൂടെ വന്നവരുമൊത്ത് ശത്രുപാളയത്തെ കീറിമുറിച്ച് ആക്രമിക്കുകയും ചെയ്തു. വിജയം സത്യപക്ഷത്ത് തന്നെ നിന്നു. പക്ഷേ ഇക്രിമ(റ) യുടെ തിരു രക്തം ആ മണ്ണിനെ പുൽകിക്കഴിഞ്ഞിരുന്നു.

വെളിച്ചം നിറഞ്ഞു കഴിഞ്ഞ മനസ്സുകളിൽ ഈമാനിന്റെ കരുത്ത് വരുത്തിയ മാറ്റം അറിയാൻ ആ അന്ത്യനിമിഷം മതിയായിരുന്നു. പീഡനങ്ങളുടെ സകലസീമകളും ലംഘിച്ച് താൻ കഷ്ടപ്പെടുത്തിയ മുസ്ലിമീങ്ങളിലെ ഓരോരുത്തരും സ്വന്തം ജീവനേക്കാൾ അവിടുത്തേക്ക് വിലപ്പെട്ടതാകുകയായിരുന്നു.

വെട്ടേറ്റു വീണ അടുത്തടുത്ത് കിടക്കുന്ന മൂന്നു സ്വഹാബാക്കളിൽ ഹാരിസ്(റ) അൽപ്പം വെള്ളം ചോദിച്ചു. ചുണ്ടോട് അടുപ്പിച്ചു വെള്ളം എത്തിയ സമയത്ത് വെള്ളത്തിനായി തൊട്ടപ്പുറത്ത് ഇക്രിമ(റ) ദാഹിക്കുന്നുണ്ടായിരുന്നു. ഹാരിസ് തങ്ങൾ കുടിച്ചില്ല - തന്റെ പ്രിയ സഹോദരൻ, ഈമാനിന്റെ പേരിൽ ഒത്തുകൂടിയ സഹോദരന് നൽകാൻ ആവശ്യപ്പെട്ടു. ഇക്രിമ തങ്ങൾ ചുണ്ടിലേക്ക് കുടിക്കാൻ നൽകാൻ ഇരുന്ന സമയത്ത് തൊട്ടപ്പുറത്ത് വെള്ളത്തിന്‌ തേടുന്ന അയ്യാഷ് തങ്ങൾക്ക് നൽകാൻ ആവശ്യപ്പെട്ടു. അവിടെ എത്തുമ്പോഴേക്ക് അയ്യാഷ്(റ) തങ്ങൾ അവസാനശ്വാസം വലിച്ച് കഴിഞ്ഞിരുന്നു. തിരിച്ചു ഇക്രിമ തങ്ങളിലേക്കും ഹാരിസ് തങ്ങളിലേക്കും എത്തുമ്പോഴേക്ക് അവർ രണ്ടു പേരുടേയും ആത്മാക്കളും സ്വര്ഗ്ഗത്തിലെ പാറിപ്പറക്കുന്ന പറവകളാകാൻ പറന്നകന്നിരുന്നു..

കൗസറിലെ, ദാഹം തിരികെ വരാത്ത പുണ്യപാനീയം പ്രണയ നായകനായ ഹബീബിന്റെ തിരുകരങ്ങൾ കൊണ്ട് വാങ്ങിക്കുടിക്കാനാണ് അല്ലാഹുവിന്റെ വിധി..

ഇന്നാലില്ലാഹി വഇന്നാ  ഇലൈഹി റാജിഊൻ..

നക്ഷത്രങ്ങളായ തിരുസ്വഹാബത്തിലെ വിശിഷ്ട താരകം ഇക്രിമ ഇബ്നു അബൂജഹൽ(റ) തങ്ങൾ ഇസ്ലാമിക ചരിത്രത്തിലെ  സുവർണ്ണേതിഹാസം രചിച്ചു പറന്നകന്നു പോയി.....

رضي الله عنهم ورضوا عنه