ജഅഫർ ഇബ്നു അബീത്വാലിബ്‌ (റ) വിന്റെ ചരിത്രപ്രസിദ്ധമായ പ്രസംഗം

ജഅഫർ ഇബ്നു അബീത്വാലിബ്‌ (റ) തങ്ങൾ അബ്സീനിയൻ രാജാവായ നേഗസിന് മുന്നിൽ നടത്തിയ ചരിത്രപ്രസിദ്ധമായ പ്രസംഗം:

"അല്ലയോ ചക്രവർത്തീ, ഞങ്ങൾ ജാഹിലിയ്യതിന്റെ കൈപ്പിടിയിലായിരുന്ന സമൂഹമായിരുന്നു - വിഗ്രഹങ്ങൾക്ക് ആരാധനയർപ്പിച്ചിരുന്ന, ശവങ്ങളുടെ ഇറച്ചി ഭക്ഷിച്ചിരുന്ന, സകലമാന അറപ്പും വെറുപ്പുമുളവാക്കുന്ന പ്രവർത്തികളിലും അഭിരമിച്ചിരുന്ന, കുടുംബ ബന്ധങ്ങളെ കാറ്റിൽ പറത്തിയിരുന്ന, അയൽപക്ക ബന്ധങ്ങളെ തകർത്തെറിഞ്ഞിരുന്ന, ശക്തിയുള്ളവർ സാധുക്കളായ മനുഷ്യരിൽ നിന്നും പിടിച്ചു പറിച്ചിരുന്ന സമൂഹമായിരുന്നു".

"ആ പതിതമായ അവസ്ഥയിൽ തന്നെ തുടരുകയായിരുന്നു ഞങ്ങൾ, അല്ലാഹു അവന്റെ ഒരു ദൂതരെ ഞങ്ങളിൽ നിന്ന് തന്നെ ഞങ്ങളിലേക്ക് പറഞ്ഞയക്കുന്നത് വരെ. അവിടുത്തെ സത്യസന്ധതയും വിശ്വാസ്യതയും ധർമ്മനിഷ്ഠയും കുടുംബ മഹിമയും ഞങ്ങൾക്കിടയിൽ പ്രസിദ്ധമായിരുന്നു".

"അവിടുന്ന് ഞങ്ങളെ അല്ലാഹുവിലേക്ക്, അവന്റെ ഏകത്വ അംഗീകരിക്കുന്നതിലേക്കും അവനെ ആരാധിക്കുന്നതിലേക്കും വിളിച്ചു. കല്ലുകളും വിഗ്രഹങ്ങളുമായി അല്ലാഹുവിന് പകരമായി ഞങ്ങളും ഞങ്ങളുടെ പ്രപിതാക്കളും ആരാധിച്ചിരുന്നതിൽ നിന്ന് പൂർണ്ണമായും വിട്ടൊഴിയുന്നതിലേക്കും അവിടുന്ന് ഞങ്ങളെ വിളിച്ചു".

"സത്യം മാത്രം സംസാരിക്കാനും, വാഗ്ദത്തം പാലിക്കാനും, കുടുംബ ബന്ധങ്ങൾ ചേർക്കാനും, അയൽവാസികളോട് നല്ലനിലയിൽ വർത്തിക്കാനും, നിഷിദ്ധമായ സകലപ്രവർത്തനങ്ങളും നിർത്താനും, രക്തച്ചൊരിച്ചിലുകൾ അവസാനിപ്പിക്കാനും, അശ്ലീലവും തെറ്റായതും വെറുപ്പുളവാക്കുന്നതുമായ സംസാരങ്ങളിൽ നിന്നും വിട്ടു നിൽക്കാനും അനാഥരുടെ സമ്പത്തിനെ കവരുന്നതിനെ തൊട്ട് ദൂരെയാകാനും പതിവ്രതകളായ സ്ത്രീകളെ കൊണ്ട് വ്യഭിചാര ആരോപണം നടത്തുന്നതിൽ നിന്നും വിട്ടു നിൽക്കാനും അവിടുന്ന് ഞങ്ങളോട് അനുശാസിച്ചു".

"അല്ലാഹുവിന് യാതൊരു പങ്കുകാരെയും വിശ്വസിക്കാതിരിക്കാനും അവനെ മാത്രം ആരാധിക്കാനും അഞ്ചുനേരം നിസ്ക്കരിക്കാനും സക്കാത്ത് കൊടുക്കാനും റമളാൻ മാസം വ്രതമനുഷ്ടിക്കാനും കഴിവുള്ളവർ ഹജ്ജ് ചെയ്യാനും അവിടുന്ന് ഞങ്ങളോട് കൽപ്പിച്ചു."

"ഞങ്ങൾ അവിടുത്തെയും അവിടുന്ന് അല്ലാഹുവിങ്കൽ നിന്നും കൊണ്ട് വന്നതിലും വിശ്വസിക്കുകയും, അവിടുന്ന് വിരോധിച്ചത് ചെയ്യാതിരിക്കുന്നതിലും അവിടുന്ന് കൽപ്പിച്ചത് ചെയ്യുന്നതിലും ഞങ്ങൾ അവിടുത്തെ പിന്തുടരുകയും ചെയ്തു."

"ഞങ്ങൾ ഏകസത്യദൈവമായ അല്ലാഹുവിനെ മാത്രം ആരാധിച്ചു, അവനിൽ യാതൊരു പങ്കുകാരെയും വിശ്വസിച്ചില്ല, ഞങ്ങളുടെ മേൽ നിഷിദ്ധമാക്കിയതിനെ ഞങ്ങളും നിഷിദ്ധമാക്കി, ഞങ്ങളുടെ മേൽ അനുവദനീയമാക്കി തന്നതിനെ ഞങ്ങളും അനുവദനീയമാക്കി".

"അല്ലയോ മഹാരാജാവേ, അവിടുന്നങ്ങോട്ട് ഞങ്ങളുടെ നാട്ടുകാരായ ജനങ്ങൾ ഞങ്ങളെ ആക്രമിച്ചു, ഞങ്ങളെ ഞങ്ങളുടെ ദീനിൽ നിന്നും പിന്മാറ്റാൻ വേണ്ടിയും അല്ലാഹുവിനെ ആരാധിക്കുന്നതിൽ നിന്നും വിഗ്രഹങ്ങളെ ആരാധിക്കുന്നതിലേക്ക് ഞങ്ങളെ തിരിച്ചു കൊണ്ട് പോകാനും വേണ്ടി അവരുടെ ക്രൂരതയുടെ ഭാഗമായ അതികഠിനമായ പീഡനങ്ങൾ അവരിൽ നിന്നും ഞങ്ങൾക്ക് ദർശിക്കേണ്ടി വന്നു".

"അവർ ഞങ്ങളെ നിഷ്ഠൂരമായി അടിച്ചമർത്തി, ഞങ്ങളുടെ ജീവിതം അസഹനീയവും താങ്ങാൻ കഴിയാത്ത പ്രയാസം നിറഞ്ഞതുമാക്കി, ഞങ്ങളുടെ വിശ്വാസം അനുസരിച്ച് ജീവിക്കുന്നതിൽ നിന്നും അവർ ഞങ്ങളെ തടസ്സപെടുത്തി"

"അങ്ങനെ ഒടുക്കം ഞങ്ങൾ ഞങ്ങളുടെ നാട് വിട്ടു പിരിഞ്ഞു, മറ്റാരേക്കാളും മുമ്പേ നിങ്ങളെ തിരഞ്ഞെടുത്ത് കൊണ്ട് അവിടുത്തെ നാട്ടിലേക്ക് വന്നു ചേർന്നു; അല്ലയോ രാജാവേ, ഞങ്ങൾ നിങ്ങളുടെ സംരക്ഷണം പ്രതീക്ഷിക്കുന്നു, അനീതിയും അക്രമവും സഹിക്കാതെ അവിടുത്തെ നാട്ടിൽ ജീവിക്കാൻ കഴിയും എന്ന് ഞങ്ങൾ ആഗ്രഹിക്കുകയും ചെയ്യുന്നു."

അവിടുത്തെ ഘനഗാംഭീര്യമാർന്ന പ്രസംഗം കേട്ട നജ്ജാശി രാജാവ് കൂടുതൽ വിവരങ്ങൾ ലഭിക്കുന്നതിലേക്കായി

هل معك مما جاء به عن الله من شيء ؟

"നിങ്ങളുടെ കയ്യിൽ നിങ്ങളുടെ പ്രവാചകർ അല്ലാഹുവിങ്കൽ നിന്നും കൊണ്ട് വന്ന വല്ല തെളിവുമുണ്ടോ?" എന്ന് ചോദിക്കുകയും ശേഷം ജഅഫർ തങ്ങൾ സൂറത്ത് മറിയമിലെ ആദ്യഭാഗം അവിടുത്തെ അതിമനോഹരമായ ശബ്ദത്തിൽ ഓതിക്കൊടുക്കുകയും ചെയ്തു. ഓത്ത് കേട്ട രാജാവ് താടി നനയുമാർ കരഞ്ഞു പോയി. കൂടെ അവിടെയുണ്ടായിരുന്ന വേദപണ്ഡിതന്മാരും കരഞ്ഞു പോയി. അദ്ദേഹം തുടർന്ന് പറഞ്ഞു:

إن هذا والذي جاء به عيسى ، ليخرج من مشكاة واحدة ، انطلقوا ! فوالله لا أسلمهم إليكم أبدا ولا أكاد

"നിശ്ചയമായും നിങ്ങളുടെ പ്രവാചകർ കൊണ്ട് വന്നതും ഈസാ നബി കൊണ്ട് വന്ന സന്ദേശവും ഒരേ യിടത്ത് നിന്ന് തന്നെയാണ് - നടന്നോളൂ, അല്ലാഹുവാണ് സത്യം, നിങ്ങളെ ഒരിക്കലും തന്നെ അവരിലേക്ക് ഞാൻ തിരിച്ചയക്കുകയേയില്ല".

മഹാന്റെ ഹഖ് കൊണ്ട് നമ്മെ അല്ലാഹു ഇരുലോകത്തും വിജയിപ്പിക്കട്ടെ..ആമീൻ..

മൗലിദിൽ കള്ളക്കഥ ! വഹ്ഹാബീ തൽബീസിനു മറുപടി

സൽക്കർമ്മങ്ങളായി സമൂഹത്തിൽ നിരാക്ഷേപം നടന്നു വന്നിരുന്ന, റബ്ബിന്റെ വഴിയിലായി ജീവിക്കാൻ സഹായകമാകുന്ന സകലമാന വിഷയങ്ങളിലും അനാവശ്യമായതും തികച്ചും പിഴച്ചതുമായ സാങ്കേതികത്വം പറഞ്ഞു ആളുകളെ വസ് വാസാക്കി ഇല്ലാതെ ആക്കുക എന്ന കുതന്ത്രത്തിന്റെ ആശാന്മാരായ വഹ്ഹാബീ നേതാക്കളിൽ പെട്ട ഒരാളുടെ ആദരവായ നബിതങ്ങളുടെ തിരുചരിത്രങ്ങൾ വിപാടനം ചെയ്യാൻ പാടുപെടുന്ന ഒരു പ്രസംഗം കേട്ടു - അതിൽ പറയപ്പെട്ട വിഷയത്തിന്റെ ചെറിയ വിശദീകരണം കഴിയുന്ന രീതിയിൽ കൊടുക്കുക എന്നതാണീ കുറിപ്പിന്റെ ലക്‌ഷ്യം.


അയാൾ പറയുന്ന വിഷയത്തിൽ ആകെക്കൂടി ഉള്ളത് ആദരവായ നബിതങ്ങളുടെ (സ്വ) പ്രകീർത്തന സൃഷ്ടിയും ഉണ്ടാക്കിയ കാലം തൊട്ടിങ്ങോളം ആയിരക്കണക്കായ പണ്ഡിത താരകങ്ങൾ പാടിയും പറഞ്ഞും പ്രചരിപ്പിക്കുകയും അതിന്റെ പുണ്യം കരസ്ഥമാക്കുകയും ചെയ്യുന്ന ഷറഫൽ അനാം മൗലിദിൽ തിരുനബി (സ്വ) തങ്ങളുടെ തിരുജന്മ ശേഷം അവിടുത്തെ പിതാമഹൻ അബ്ദുൽ മുത്തലിബ് ആ പിഞ്ചു കുഞ്ഞിനെ എടുത്ത് കൊണ്ട് കഅബത്തിങ്കൽ പോകുകയും അവിടെ വെച്ച് ആ കുട്ടിയെ പറ്റി ഒരു കവിത ചൊല്ലി എന്നും അതിൽ

أنت الذي سميت في القرآن

ഖുർആനിൽ പേര് പരാമർശിക്കപ്പെട്ട കുട്ടിയാണ് ഇത് എന്ന് ഉണ്ട് എന്നും അത് കളവാണ് എന്നുമാണ്. അതിനുള്ള കാരണം ഖുർആൻ നബിതങ്ങൾ (സ്വ)ക്ക് ഇറങ്ങിയതാണ് - അപ്പോ നബിതങ്ങൾ ജനിച്ച സമയത്ത് അബ്ദുൽ മുത്തലിബിന് എങ്ങനെ അറിയും ഖുർആനിൽ അവിടുത്തെ പേരുണ്ട് എന്നതാണ്‌. ഇക്കാരണം കൊണ്ട് തന്നെ ഈ മൗലിദിൽ ഉള്ളത് കളവും സമുദായത്തെ എവിടെയൊക്കെയോ കൊണ്ട് പോകുന്നതുമാണ് എന്നാണ് മൂപ്പരുടെ വിലാപം കൊള്ളൽ.

യാഥാർഥ്യത്തിലേക്ക് നമുക്കൊന്ന് ചുരുങ്ങിയ രൂപത്തിൽ പോകാം.

ഈയൊരു ചരിത്ര സംഭവം ഉധരിചതിന്റെ പേരിലാണ് മൗലിദുകാരനും അത് പാരായണം ചെയ്യുന്നവരും പിഴച്ചവർ ആകുന്നതെങ്കിൽ എണ്ണിയെണ്ണി ഇതുദ്ധരിച്ച ഈയുള്ളവന്റെ ശ്രദ്ധയിൽ പെട്ട നാല് ഇമാമീങ്ങളെ താഴെ പറയുന്നു( എല്ലാ ചരിത്രകാരനമാരും ഇത് ഉദ്ധരിക്കുന്നുണ്ട്):

1) ഇമാം ഇബ്നു ഇസ് ഹാഖ്

2) ഇമാം ഇബ്നു അസാക്കിർ

3) ഇമാം ബൈഹഖി

4) ഇമാം ഇബ്നു കസീർ

ഇസ്ലാമിക ചരിത്രത്തിന്റെ അതിസുന്ദരമായ അദ്ധ്യായങ്ങൾക്ക് ആകമാനം അവലംബവും ആശയുമായ ചരിത്രകാരന്മാരിലെ അഗ്രഗണ്യരായ ഇമാമീങ്ങൾ ആകമാനം ഉദ്ധരിച്ച ഈ സംഭവത്തെ എടുത്ത് എഴുതിയതാണോ മൗലിദുകാരൻ ചെയ്ത തെറ്റ്..?

ഹബീബിന്റെ തിരുചരിത്രത്തിലെ ഈ സുവർണ്ണ താളുകൾ ആയിരത്തി നാനൂറു വർഷത്തിനിപ്പുറവും ജ്വലിപ്പിച്ചു നിർത്താൻ വേണ്ടി ആ തിരുജന്മ സ്തുതികൾ പാടുന്നതാണോ ഞങ്ങൾ ചെയ്ത തെറ്റ്..?

നാൽപ്പതു വയസ്സെത്തും മുമ്പ് തിരുനബി ആരുമല്ലെന്നും സാധാരണക്കാരനായ വെറുമൊരു 'അറബിപ്പയ്യൻ' ആന്നെന്നും കൊട്ടിഘോഷിക്കുന്ന വഹ്ഹാബികൾക്ക് ആ തിരുജന്മത്തിന്റെ ഓർമ്മകൾ ഉപയോഗശൂന്യമായ കെട്ടുകഥകൾ മാത്രമാണെന്ന് വരുന്നതിൽ അത്ഭുതമില്ല - പക്ഷെ മുസ്ലിമീങ്ങളിൽ ഹബീബിനോട് അസൂയ ഇല്ലാത്ത, അവിടുത്തെ ഏതൊരു പദവിയോടും സന്തോഷം മാത്രമുള്ള സ്നേഹമുള്ളവർക്ക് അത് പോര - അവിടുന്ന് "ആലമീന്" ആകമാനം അനുഗ്രഹമാണ് എന്ന് അല്ലാഹു പറഞ്ഞതിൽ പെട്ട ആലമീൻ അവിടുത്തെ നാൽപ്പതാം വയസ്സിലെ നുബുവ്വത്തിന് ശേഷം മാത്രമല്ല ഉള്ളത് - മറിച്ചു ഭൌതിക ലോകത്തേക്ക് അവിടുന്ന് ജനിച്ചു വീഴും മുമ്പും "ആലമീൻ" ഉണ്ട് - അതിനൊക്കെ അനുഗ്രഹം ആയ നബിതങ്ങൾ അവിടുത്തെ ജന്മത്തിന് മുമ്പും ജന്മത്തിലും ജീവിത കാലത്തും വഫാത്തിന് ശേഷവും അവിടുന്ന് സത്യവിശ്വാസിക്ക്‌ അത്ഭുതം തന്നെ - പരിശുദ്ധം തന്നെ.

വിഷയത്തിലേക്ക് വരാം: -

ഈ വിഷയത്തെ രണ്ട് രീതിയിൽ സമീപിക്കാൻ കഴിയും - ആദ്യത്തേത് ആദരവായ നബിതങ്ങളുടെ(സ്വ) തിരുനാമം "മുഹമ്മദ്‌" എന്ന് അവിടുന്ന് ജനിച്ചപ്പോൾ ഭൌതികലോകത്ത് വെച്ച് നാമകരണം ചെയ്തത് അബ്ദുൽ മുത്തലിബ് ആണെന്നുള്ളതിൽ ആർക്കും തർക്കമില്ല - ഇവിടെ തന്നെ പ്രാസംഗികൻ ഉദ്ധരിച്ച വസ് വാസിന്റെ കെട്ടഴിയും - കാരണം ആദരവായ നബിതങ്ങൾ(സ്വ) യുടെ തിരുനാമം "മുഹമ്മദ്‌" എന്നായിരിക്കണം എന്ന് ആരാണ് അബ്ദുൽ മുത്തലിബിന് അറിയിച്ചു കൊടുത്തത്? ഈ നാമം പൂർവ്വവേദങ്ങളിൽ ഉള്ളതാണെന്നും ആർക്കും സംശയമില്ല (ഇകൂട്ടരുടെ പരിപാടികളിൽ നിരന്തരം പൂർവ്വവേദങ്ങളിൽ നബിതങ്ങളുടെ പേരുണ്ട് എന്ന് പറയാറും ഉണ്ട്). അപ്പൊ സ്വാഭാവികമായും ഇവിടെ ഒരു ചോദ്യം ഉയരും - എങ്ങനെ അബ്ദുൽ മുത്തലിബിന് അറിഞ്ഞു ഈ കുട്ടിക്ക് "മുഹമ്മദ്‌" എന്ന് പേരിടണമെന്ന്..?

മുഹമ്മദ്‌ എന്ന് പേരിടണം എന്ന് ആരാണോ അറിയിച്ചു കൊടുത്തത് അതേ ഭാഗത്ത് നിന്ന് തന്നെ ഈ പേര് 'ഖുർആനിൽ' ഉണ്ട് എന്ന് അറിയിച്ചു കൊടുത്തതാകാമല്ലോ. അതിലെന്താണ് അത്ഭുതമുള്ളത്..? തിരുനാമം ഇൽഹാം ആയി അബ്ദുൽ മുത്തലിബിന് ലഭിച്ചതാണെങ്കിൽ അതേ രൂപത്തിൽ ഇൽഹാം ആയി അല്ലാഹുവിങ്കൽ നിന്ന് ഖുർആനിൽ ഈ കുട്ടിയുടെ പേരുണ്ട് എന്നും ലഭിക്കാം. അതിൽ അയുക്തികമായി യാതൊന്നുമില്ല .

ഇനി രണ്ടാമത്തേത് അഥവാ ഇവിടെ "ഖുർആൻ" എന്ന് പറഞ്ഞത് തന്നെ എടുക്കാം - അങ്ങനെ ആണെങ്കിൽ എന്താണ് പ്രശ്നം എന്ന് നോക്കാം.ഇവിടെ "ഖുർആൻ" എന്ന് പറഞ്ഞത് കൊണ്ട് ഉദ്ദേശ്യം വിശുദ്ധ ഖുർആൻ അല്ല മറിച്ച് പൂർവ്വ വേദങ്ങളിൽ പെട്ട ഇഞ്ചീൽ, സബൂർ അല്ലെങ്കിൽ തൗറാത്ത് ആണ് എന്ന് മനസ്സിലാക്കാം. അതിനും ന്യായമുണ്ട് കാരണം അല്ലാഹുവിന്റെ വിശുദ്ധ ഖുർ ആനിലും ഹബീബ്(സ്വ) യുടെ തിരുവാക്യങ്ങളിലും ഈ രീതിയിൽ ഉപയോഗിക്കപ്പെട്ടിട്ടുണ്ട്.

വിശുദ്ധ ഖുർആൻ പറയുന്നത് നോക്കൂ -

സൂറത്ത് ഹിജ്രിലെ
الذين جعلوا القرآن عضين

എന്ന ആയത്തിൽ അഹ്ലുകിതാബികൾ ആയ ജൂത നസ്വാറാക്കൾ അവർക്കിറക്കപ്പെട്ട വേദങ്ങളിൽ കൈകടത്തലുകൾ നടത്തുകയും തന്നിഷ്ടത്തിനനുസരിച്ച്‌ വിശ്വസിക്കുകയും ചെയ്ത കാര്യം ഇമാം ഇബ്നു കസീർ(റ) ഇമാം ബുഖാരിയെ ഉദ്ധരിച്ചു പറയുന്നത് നോക്കുക -

وقوله : ( الذين جعلوا القرآن عضين ) أي : جزءوا كتبهم المنزلة عليهم ، فآمنوا ببعض وكفروا ببعض .

ഇവിടെ 'ജഅലൽ ഖുർആന' എന്ന് പറഞ്ഞത് ആരെപ്പറ്റിയാണ് ഇബ്നു അബ്ബാസ് (റ) തങ്ങളിൽ നിന്നും ഉദ്ധരിക്കുന്നത് നോക്കൂ -

قال البخاري : حدثنا يعقوب بن إبراهيم ، حدثنا هشيم ، أنبأنا أبو بشر ، عن سعيد بن جبير ، عن ابن عباس : ( جعلوا القرآن عضين ) قال : هم أهل الكتاب ، جزءوه أجزاء ، فآمنوا ببعضه ، وكفروا ببعضه

"അഹ്ലുകിതാബികൾ ആണവർ. - ഖുർആനിനെ ('അവരുടെ വേദങ്ങളെ' എന്നർത്ഥം) അവർ ഖണ്ഡങ്ങളാക്കുകയും ചിലതിൽ വിശ്വസിക്കുകയും മറ്റു ചിലതിൽ അവിശ്വസിക്കുകയും ചെയ്തു". (തഫ്സീർ ഇബ്നു കസീർ)

ഇവിടെ പറയപ്പെട്ട ഖുർആൻ ഏതാണ് എന്നൊന്ന് വസ് വാസുകാർ പറയണം. മാറ്റത്തിരുത്തലുകൾ അഹ്ലുകിതാബികൾ (യഹൂദികളും നസ്വാറാക്കളും എന്ന് തൊട്ടു മുമ്പത്തെ ആയത്തിന്റെ തഫ്സീറിൽ ഇബ്നു അബ്ബാസ് തങ്ങൾ തന്നെ പറയുന്നുണ്ട്) തിരുത്തലുകൾ നടത്തി എന്ന് പറയുന്നത് നബിതങ്ങൾ (സ്വ) ക്ക് ഇറക്കപ്പെട്ട ഖുർആൻ ശരീഫിനെ കുറിച്ചാണോ..?

അല്ലേയല്ല -

അപ്പൊ പൂർവ്വ വേദങ്ങളെ പറ്റി 'ഖുർആൻ' എന്ന് അല്ലാഹു തന്നെ പറഞ്ഞിട്ടുണ്ട് - അപ്പോ ഖുർആനും തെറ്റാണെന്ന് നിങ്ങൾ പറയുമോ..?!!

ചില ഇമാമീങ്ങൾ ഇത് ഉദ്ധരിച്ചത് "ഖുർആൻ" എന്നതിന് പകരം "ഫുർഖാൻ" എന്നാണ്. അങ്ങനെ ആണെങ്കിലും അത് അല്ലാഹു തന്നെ അവന്റെ വിശുദ്ധ ഖുർആനിൽ മുൻകാല വേദങ്ങളുടെ മേൽ ഉപയോഗിച്ചിട്ടുണ്ട്.

മൂസാ നബി (അ) മിന് തൌറാത്ത് ഇറക്കിക്കൊടുത്തു എന്ന് പറയുന്നിടത്ത് തൌറാത്ത് എന്ന് പറയുന്നതിന് പകരം "ഫുർഖാൻ" എന്നാണു അല്ലാഹു ഉപയോഗിച്ചത്.

ولقد آتينا موسى وهارون الفرقان وضياء وذكرا للمتقين
(സൂറത്തുൽ അംബിയാ)

ഇനി ആദരവായ നബിതങ്ങൾ(സ്വ) യുടെ തിരുവചനത്തിൽ പൂർവ്വ വേദത്തെ കുറിച്ച് ഖുർആൻ എന്ന് ഉദ്ധരിച്ചത് കൂടെ ആയാൽ വിഷയത്തിലെ യാതൊരു വിധ തൽബീസുകളും ബാക്കി നിൽക്കില്ല - അല്ലാഹുവും റസൂലും (സ്വ) പഠിപ്പിച്ചതിനേക്കാൾ "കൂടുതൽ" ഇസ്ലാം ഇക്കൂട്ടർക്ക് അറിയാം എന്ന് വിശ്വസിക്കുന്ന ആരെങ്കിലും ഉണ്ടെങ്കിൽ അവർ ഇവരുടെ പിന്നാലെ കൂടട്ടെ..മുസ്ലിമീങ്ങളെ പ്രതീക്ഷിക്കരുത്.

عَنْ أَبِي هُرَيْرَةَ ـ رضى الله عنه ـ عَنِ النَّبِيِّ صلى الله عليه وسلم قَالَ " خُفِّفَ عَلَى دَاوُدَ ـ عَلَيْهِ السَّلاَمُ ـ الْقُرْآنُ، فَكَانَ يَأْمُرُ بِدَوَابِّهِ فَتُسْرَجُ، فَيَقْرَأُ الْقُرْآنَ قَبْلَ أَنْ تُسْرَجَ دَوَابُّهُ،

അബൂ ഹുറൈറ തങ്ങളെ തൊട്ട് റിപ്പോർട്ട്: നബിതങ്ങൾ(സ്വ) പറഞ്ഞു: ഖുർആനിൻ പാരായണം (സബൂർ ആണ് ഉദ്ദേശ്യം) ദാവൂദ് നബി അലൈഹിസ്സലാമിനു അല്ലാഹു എളുപ്പമാക്കികൊടുത്തു. ദാവൂദ് നബി (അ) അവിടുത്തെ യാത്രാ മൃഗത്തിന്റെ ജീനി കെട്ടാൻ ആജ്ഞാപിക്കുമായിരുന്നു. ജീനി കെട്ടിതീരുന്നതിന്റെ മുമ്പ് അവിടുന്ന് ഖുർആൻ (സബൂർ ആണ് ഉദ്ദേശ്യം) ഓതി തീർക്കുമായിരുന്നു. (സ്വഹീഹുൽ ബുഖാരി).

ഇവിടെ പറയപ്പെട്ട ഖുർ ആൻ എന്താണ് എന്ന് ഇമാം ഇബ്നുഹജർ അസ്ഖലാനി തങ്ങൾ മറ്റു സാധ്യതകൾ പറയുന്ന കൂട്ടത്തിൽ വ്യക്തമായി പറയുന്നത് നോക്കൂ..

وقيل المراد الزبور ، وقيل التوراة

ഇവിടുത്തെ ഖുർആൻ എന്നത് ഒന്നുകിൽ സബൂർ അല്ലെങ്കിൽ തൌറാത്ത് ആണെന്ന് പറയപ്പെട്ടിരിക്കുന്നു.(ഫത്ഹുൽബാരി)

ഇവരുടെ ആചാര്യനായ ഇബ്നുൽ ഖയ്യിം തന്നെ പറയുന്നത് നോക്കൂ ഈ ഹദീസിനെ കുറിച്ച്:

والمراد بالقرآن هنا الزبور
"ഇവിടെ ഖുർആൻ എന്ന് പറഞ്ഞത് കൊണ്ട് ഉദ്ദേശ്യം സബൂർ ആണ്." (തഹ്ദീബുസ്സുന്ന)

നോക്കൂ - ദാവൂദ് നബി (അ) ന് ഇറക്കപ്പെട്ട സബൂറിനെ കുറിച്ച് ഒരേ ഹദീസിൽ രണ്ട് പ്രാവശ്യം ആദരവായ നബിതങ്ങൾ(സ്വ) ഖുർആൻ എന്ന് പറഞ്ഞു..! ഇനി ഇതിന്റെ പേരിൽ ബുഖാരിയിലെ ഈ ഹദീസ് കളവാണ് എന്നും ബുഖാരി "എവിടെയൊക്കെയോ" മുസ്ലിമീങ്ങളെ കൊണ്ട് പോകുന്നു എന്നും പറയുമോ..?!!

ഇങ്ങനെയാണീ കൂട്ടരുടെ സകലമാന പിഴപ്പിക്കലുകളുടെയും സ്ഥിതി. ഈമാനിനു മേലേക്ക് യുക്തിയെ പ്രതിഷ്ടിച്ച് തന്റെ തറയുക്തിയിൽ ശരിയെന്നു തോന്നുന്നതിനെ മാത്രം വിശ്വസിക്കുകയും മേലെ ഉദ്ധരിക്കപ്പെട്ട അഹ്ലുകിതാബികളെ പോലെ

فآمنوا ببعض وكفروا ببعض .

പ്രമാണങ്ങളിൽ തങ്ങൾക്ക് ഇഷ്ടപ്പെട്ടത് വിശ്വസിക്കുകയും അല്ലാത്തത് തള്ളുകയും ചെയ്യുന്ന തികഞ്ഞ പൗരൊഹിത്യ രീതിയിലേക്ക് ഇസ്ലാമിനെ വഴിനടത്തുകയാണ് ഈ വഹ്ഹാബിസം.

നാശത്തിന്റെ പടുകുഴിയിലേക്ക് നാഥന്റെ അടുക്കൽ നിന്നും ശിക്ഷ അത്തരം കൂട്ടരിലെക്ക് ഇറങ്ങിയത് നമ്മിലേക്ക് ഇറങ്ങാതിരിക്കുന്നത് അല്ലാഹുവിന്റെ ദീനിനെ ഇത്തരത്തിൽ വ്യഭിചരിക്കുന്ന മൗലവിമാർക്ക് എതിരിൽ സത്യത്തിന്റെ ജിഹാദൊരുക്കി സുന്നീ ഉലമാക്കൾ അണിനിരക്കുന്നത് കൊണ്ടായിരിക്കാം.

ഹബീബിന്റെ ചരിത്രം പോലും തുടച്ചു നീക്കുക എന്ന ആഗോളതലത്തിലെ ഇസ്ലാമിക വിരുദ്ധ അച്ചുതണ്ടിന്റെ കുതന്ത്രത്തിന് അറിഞ്ഞും അറിയാതെയുമുള്ള ഓശാന പാടലിന്റെ രൂപങ്ങളിൽ ഒന്നാണിത്. പക്ഷെ അല്ലാഹു അവന്റെ ആദ്യസൃഷ്ടിയുടെ എന്തെല്ലാം സംഭവ ചരിത്രങ്ങൾ നിലനില്ക്കണം എന്ന് നിശ്ചയിച്ചുവോ അതൊക്കെ ഏതൊരു കാർമേഘം കൊണ്ട് മറയിട്ടാലും സൂര്യ വെളിച്ചം പോലെ തിളങ്ങുന്ന തിരുചരിതമായി എന്നെന്നും നിലനിൽക്കും. കാരണം അവിടുത്തെ ചരിത്രത്തിലാണ് ലോകത്തിന്റെ അടിസ്ഥാന സ്രിഷ്ടിപ്പിന്റെ ചരിത്രമുള്ളത്..അവിടുന്നില്ലാതെ ലോകമില്ല..അവിടുന്നില്ലാതെ വിജയമില്ല.അവിടുന്നല്ലാതെ മറ്റൊരു തുണയില്ല -


_"ആരംഭ നബിയേ തുണ"_

സുഹൃത്തുക്കൾ - മനസ്സിന്റെ സഹകാരികൾ..

ജീവിതം ഏറ്റവും സുന്ദരമായി അനുഭവപ്പെടുന്നത് പലപ്പോഴും നാം ഏറ്റവും ഇഷ്ടപ്പെടുന്നവരോടൊപ്പം ആയിരിക്കുമ്പോഴാണ്. നല്ല കാലം നഷ്ടമായെന്ന് തോന്നുന്നതും അവരുമോത്തുള്ള ജീവിതം നഷ്ടമായ ഇതേ കാരണം കൊണ്ടാകാം..

ചില സൌഹൃദ ബന്ധങ്ങൾ ആത്മാവിലാണ് അള്ളിപിടിക്കുന്നത്. കൂട്ടുകൂടിയാൽ പിരിയുക പ്രയാസകരം തന്നെയാണ്. ജീവനും കൊണ്ടല്ലാതെ അത് പിരിയുകയില്ല. മുൻഗാമികളായ ചില മഹാന്മാർ പറയാറുള്ളത് 'സൗഹൃദം സത്യമാണെങ്കിൽ പിരിയുക അസാധ്യമാണ്' എന്നാണ്.

ചിന്തകളും ജീവിതവും അവരുമായി ബന്ധപ്പെടാതെ പോകില്ല. അത് കൊണ്ട് തന്നെയാണല്ലോ ആദരവായ നബിതങ്ങൾ സുഹൃത്തിനെ തിരഞ്ഞെടുക്കുമ്പോൾ സൂക്ഷിക്കാൻ' ഉണർത്തിയതും. അതിനാൽ തിരഞ്ഞെടുപ്പാണ് പ്രധാനം. ഇരുലോക നന്മയാണ് ഏതൊരു വിശ്വാസിയായ നന്മയും ആത്യന്തികമായി ലക്ഷ്യമാക്കുന്നത്. അതിനുതകുന്നതും സഹായിക്കുന്നതും അല്ലാത്ത ബന്ധങ്ങൾ രണ്ടു ലോകത്തും ഉപകരിക്കുകയില്ല തന്നെ.

ഐഹികവും പാരത്രീകവുമായ വ്യവഹാരങ്ങൾ ഒക്കെ കഴിഞ്ഞ് 'ഞാൻ അവനെ എന്റെ സ്നേഹിതൻ ആക്കിയില്ലായിരുന്നു എങ്കിൽ എത്ര നന്നായിരുന്നു' എന്ന് ചിലർ വിലപിക്കേണ്ടി വരുമെന്ന് വിശുദ്ധ കലാം ഓർമ്മിപ്പിച്ച ബന്ധങ്ങളും കൂട്ടും ആകാതെ നോക്കുക എന്നത് ഓരോരുത്തനും അവന്റെ മനസ്സിൽ ഉറപ്പിക്കേണ്ടതാണ്.

അത്തർ വിൽപ്പനക്കാരന്റെ കൂടെ കൂടുമ്പോൾ അവനിൽ ഉള്ള സുഗന്ധം എങ്കിലും നമുക്ക് ലഭിക്കുമെന്ന പോലെ അല്ലാഹുവിനെ ഭയക്കുന്ന നല്ല കൂട്ടുകാരന്റെ ഭക്തിയും വിനയവും നല്ല സംസ്ക്കാരവും അറിവും സ്നേഹവും നമ്മിലേക്ക് നാമറിയാതെ വന്നു ചേരുക തന്നെ ചെയ്യും.ഒന്നുമില്ലെങ്കിൽ പരാജയത്തിന്റെ കുണ്ടിലേക്ക് ആപതിക്കുമ്പോ എവിടെയും കൂടെ ഉണ്ടായിരുന്ന തന്റെ സ്നേഹിതന് വേണ്ടി അല്ലാഹുവിന്റെ മുമ്പിൽ ശുപാർശ ചെയ്യാതിരിക്കാൻ അവർക്കെങ്ങനെ കഴിയും..?

സൗഹൃദങ്ങൾക്ക് വേണ്ടിയാണ് ഇന്നത്തെ യുവജനത സ്വന്തത്തെയും ബന്ധത്തേയും മറക്കാൻ തയ്യാറാകുന്നത്. പ്രസവിച്ച് വളർത്തി വലുതാക്കിയ മാതാവിനേക്കാളും പിതാവിനേക്കാളും സ്നേഹം സുഹൃത്തുക്കളോട് ആകുന്നത് പതിവ് കാഴ്ചയാണിന്ന്. വെറുക്കുന്നവരെ ഏറ്റവും കഠിനമായി വെറുക്കുക എന്നതും തഥൈവ. ആരേയും എപ്പോഴും ഒരു പരിധിക്കുള്ളിൽ നിന്ന് കൊണ്ട് മാത്രം സ്നേഹിക്കുകയും വെറുക്കുകയും ചെയ്യണം എന്നതും ആദരവായ നബിതങ്ങളുടെ(സ്വ) അധ്യാപനമാണ്.

കൂടലും പിരിയലും, സ്നേഹവും വെറുപ്പും എല്ലാം അല്ലാഹുവിന്റെ കാരണത്താൽ മാത്രമായ കൂട്ടുകൾ ഇരുലോകത്തും തണലേകും.

أحب حبيبك هونا ما عسى أن يكون بغيضك يوما ما وأبغض بغيضك هون ما عسى أن يكون حبيبك يوم ما

(ആശയം): "മിതമായ സ്നേഹം മാത്രം നീ സ്നേഹിക്കുന്നവർക്ക് നൽകുക - ഇനിയൊരുനാൾ ആ വ്യക്തി നിന്നെ വെറുക്കാൻ തുടങ്ങിയേക്കാം. നീ ഏതൊരാളെ വെറുക്കുന്നു എങ്കിലും വെറുപ്പിൽ മിതത്വം കാണിക്കുക - കാരണം ഒരുനാൾ ആ വ്യക്തി നിന്റെ സ്നേഹഭാജനം ആയി മാറിയേക്കാം".

പേർഷ്യക്കാരനായ സൽമാൻ(റ) വിനെ അബുദ്ദർദ്ദാ(റ) സഹോദരനായി സ്വീകരിച്ചു. ഒരിക്കൽ സ്നേഹിതനെ തേടി വന്ന സൽമാൻ(റ) കണ്ടത് അശ്രദ്ധയും ദു:ഖിതയുമായ അബുദ്ദർദ്ദാ(റ) തങ്ങളുടെ  ഭാര്യയേയായിരുന്നു. സൽമാൻ തങ്ങൾ എന്താണ് കാര്യമെന്ന് അന്വേഷിച്ചു.

"നിങ്ങളുടെ സഹോദരൻ അബുദ്ദർദ്ദാഇന് ദുനിയാവിനോട് യാതൊരു താൽപ്പര്യവുമില്ല".

കുടുംബജീവിതത്തിലും ഭാര്യയിലും യാതൊരു താൽപ്പര്യവും ശ്രദ്ധയും അബുദ്ദർദ്ദാ കാണിക്കുന്നില്ല എന്നതാണ് ഭാര്യയുടെ പ്രശ്നമെന്ന് സൽമാൻ(റ) വിന് എളുപ്പത്തിൽ മനസ്സിലായി. സൽമാൻ തങ്ങൾ കാത്തിരുന്നു. അബുദ്ദർദ്ദാ(റ) തങ്ങൾ വരുകയും സൽമാന് ഭക്ഷണം ഒരുക്കാൻ ഭാര്യയോട് ആവശ്യപ്പെടുകയും ചെയ്തു. ഭക്ഷണം തയ്യാറായപ്പോൾ സൽമാനോട്‌(റ) തനിക്ക് നോമ്പാണെന്നും നിങ്ങൾ കഴിക്കൂവെന്നും സ്നേഹിതൻ അബുദ്ദർദ്ദാ(റ) ആവശ്യപ്പെട്ടു.

"നിങ്ങൾ കൂടെ ഭക്ഷിക്കുന്നില്ലെങ്കിൽ ഞാൻ കഴിക്കുകയില്ല"

എന്നായിരുന്നു സൽമാൻ(റ) തങ്ങളുടെ മറുപടി. ഗത്യന്തരമില്ലാതെ അബുദ്ദർദ്ദാ(റ) തങ്ങൾ കൂടെ കഴിച്ചു. രാത്രിയായപ്പോൾ സുന്നത്ത് നിസ്ക്കാരത്തിനായി തയ്യാറായി നിന്ന അബുദ്ദർദ്ദാ(റ) തങ്ങളോട് 'ഉറങ്ങാൻ പോകൂ' എന്ന് സൽമാൻ(റ) നിർബന്ധിച്ച് ആവശ്യപ്പെട്ടു. മനസ്സിലാമനസ്സോടെ അബുദ്ദർദ്ദാ തങ്ങൾ പോയി കിടന്നുറങ്ങി. ഇതേ രീതിയിൽ വീണ്ടും സംഭവിച്ചു - സൽമാൻ തങ്ങൾ അദ്ദേഹത്തെ ഉറങ്ങാൻ മടക്കി അയച്ചു. രാത്രിയുടെ അവസാന യാമം എത്തിയപ്പോൾ സൽമാൻ തങ്ങൾ സ്നേഹിതനെ വിളിച്ചുണർത്തി ഒപ്പം നിന്ന് നിസ്ക്കരിച്ചു.

സൽമാൻ (റ) സ്നേഹിതൻ അബുദ്ദർദ്ദാ(റ) തങ്ങളോട് പറഞ്ഞു:

"നിങ്ങൾക്ക് അല്ലാഹുവിനോട് കടമയുണ്ട് എന്നത് സത്യമാണ്, നിങ്ങൾക്ക് നിങ്ങളുടെ ശരീരത്തോടും  കടമയുണ്ട് എന്നതും സത്യമാണ്, നിങ്ങൾക്ക് നിങ്ങളുടെ ഭാര്യയോടും കടമയുണ്ട് എന്നത് സത്യമാണ്. എല്ലാവരോടുമുള്ള കടമ പാലിക്കൽ നിങ്ങൾക്ക് നിർബന്ധമാണ്‌"

പിറ്റേന്ന് അബുദ്ദർദ്ദാ തങ്ങൾ ആദരവായ നബിതങ്ങളുടെ അടുക്കൽ പോയി സൽമാൻ തലേന്ന് രാത്രി ചെയ്തതിനെ കുറിച്ച് പരാതി പറഞ്ഞു - നബിതങ്ങൾ പറഞ്ഞു: "സൽമാൻ പറഞ്ഞത് ശരിയാണ്".

എത്ര നല്ല ബന്ധം !

ഐഹിക ലോകത്തെ കടപ്പാടുകൾ മറന്ന് കൊണ്ട് ദൈവിക വഴിയിൽ വിജയം നേടാമെന്ന അബുദ്ദർദ്ദാ തങ്ങളുടെ ജീവിതരീതിയിലെ പിഴവ് ഉറ്റസ്നേഹിതൻ സൽമാൻ(റ) യുക്തിപൂർവ്വം മാറ്റിയെടുത്തു. അവിടെയാണ് യഥാർത്ഥ സൗഹൃദങ്ങളുടെ പ്രസക്തി. ഭൗതികവും ഉഖ്രവിയ്യുമായ നന്മകൾ തന്റെ സഹോദരന് ലഭിക്കണം എന്ന ആത്മാർഥമായ മോഹമുള്ള ഒരു സൗഹൃദം നമുക്ക് ലഭിക്കുന്ന ഏറ്റവും വലിയ സമ്പാദ്യമാണ്.

ബന്ധങ്ങൾ വളർത്തേണ്ടത് നിലനിൽക്കുന്ന ലോകത്തെ പരിഗണിച്ചാണ്. നല്ല ബന്ധങ്ങൾ കൊണ്ട് മനസ്സാണ് സമാധാനപ്പെടുന്നത്. പ്രയാസങ്ങൾ തളർത്താതെ മനസ്സിനെ സംരക്ഷിക്കുന്നതിൽ നല്ല ബന്ധങ്ങൾ സുപ്രധാനമാണ്‌. ഹൃദയ രോഗങ്ങളുടെ മരുന്നായ അഞ്ചു കാര്യങ്ങളിൽ ഒന്നായി മഹാന്മാർ പഠിപ്പിച്ചത് (مجالسة الصالحين) സ്വാലിഹീങ്ങളുടെ കൂടെ കൂടലാണ്. അത് ഇരുലോകത്തും മനസ്സിന് സന്തോഷവും സമാധാനവും നൽകുന്നു.

രണ്ടേ രണ്ടു കൂട്ടം സൌഹൃദങ്ങളാണ് നമുക്ക് മുന്നിലുള്ളത്. സ്വർഗ്ഗീയ ലോകത്തേക്കുള്ള യാത്രയിൽ തനിക്ക് സഹായമേകിയ ആത്മസുഹൃത്തിനും അതെ സൗഭാഗ്യം നൽകാൻ വേണ്ടി അല്ലാഹുവിനോട് കേഴുന്ന ഒരു വിഭാഗം കൂട്ടുകാർ. ആത്മാക്കളുടെ ലോകത്ത് അവർ കണ്ടുമുട്ടുമ്പോൾ പരസ്പരം പറയും -

نعم الأخ ، ونعم الصاحب ، ونعم الخليل

"നീയെനിക്ക് ഏറ്റവും ഉത്തമനായ സഹോദരനായിരുന്നു - ഏറ്റവും നല്ല കൂട്ടുകാരനായിരുന്നു - ഏറ്റവും നല്ല സുഹൃത്തായിരുന്നു."

രണ്ടാമതൊരു വിഭാഗം തന്റെ അസാന്മാർഗ്ഗിക ജീവിതത്തിന്റെ കെടുതിയായ നരകലോകത്തെ പുൽകുമ്പോൾ അതിലേക്ക് തന്നെ നയിച്ച തന്റെ ആത്മസുഹൃത്തിനും അതേ ദുർഗതി വരുത്തണേ അല്ലാഹ് എന്ന് തേടുന്ന കൂട്ടുകാർ. ദുഷിച്ച ആത്മാക്കളുടെ സങ്കേതത്തിൽ അവർ പരസ്പരം പറയുമത്രേ:

بئس الأخ ، وبئس الصاحب ، وبئس الخليل

"നീയെനിക്ക് ഏറ്റവും അധമനായ സഹോദരനായിരുന്നു - ഏറ്റവും മോശക്കാരനായ കൂട്ടുകാരനായിരുന്നു - ഏറ്റവും ചീത്തയായ സുഹൃത്തായിരുന്നു."

രണ്ടിൽ ഒന്നിൽ നമ്മുടെ സൌഹൃദങ്ങൾ വരും - പരസ്പരം നന്മയിൽ സഹകരിക്കുന്ന, തിന്മ കണ്ടാൽ തിരുത്തുന്ന കൂട്ടുകാരായി ജീവിച്ച് ഒടുക്കം മുറുകെ ചേർത്ത് പിടിച്ച കൈകളുമായി പരസ്പരം പൊരുത്തപ്പെട്ട് ഇലാഹീ കടാക്ഷവും നേടി സ്വർഗ്ഗീയ ഭൂമികയിൽ സൗഭാഗ്യത്തിന്റെ മന്ദമാരുതനാൽ തലോടപ്പെടുന്ന നന്മയുടെ കൂട്ടാകട്ടെ നമ്മുടേത്.

അല്ലാഹു ഭാഗ്യം തരട്ടെ.

ശൈഖുനാ കെ. അലവി മുസ്ലിയാർ - ഓർമ്മയുടെ തിളക്കം

വീണ്ടും അവിടുത്തെ തിരുജീവിതത്തിന്റെ ഓർമ്മപ്പെടുത്തലുകൾ തഴുകി ഉണർത്തുന്ന വിശുദ്ധ മുഹർറം മാസം വന്നണഞ്ഞു. മൂന്നു വർഷങ്ങൾക്ക് മുമ്പ് മുഹർറം 14 ന്റെ അന്നാണ് ആ പുണ്യവെളിച്ചം ഭൗതികമായ നിറപ്രകാശത്തിന്റെ തിരി അണച്ചത്.

ഒരു മനുഷ്യന്റെ ജീവിതം എന്തായിരുന്നു എന്ന് മനസ്സിലാക്കാൻ ഒരായുഷ്ക്കാലം കൂടെ നടക്കണം എന്നില്ല, മറിച്ച്‌ അവരുടെ ജീവിതത്തിന്റെ ഛായമടിക്കാത്ത സ്വകാര്യ നിമിഷങ്ങളെ പറ്റി അർഹരും വിശ്വസ്തരുമായ ആളുകൾ വിവരിക്കുന്ന കേവലം ചില നിമിഷങ്ങളുടെ അനുഭവം മതിയാകും..

ഇമാമീങ്ങളായി മുസ്ലിം ലോകം അംഗീകരിക്കുന്ന സകല മഹാന്മാരുടെ ജീവിതവും അങ്ങനെ തന്നെയാണ്‌. ഒരു നിമിഷം അല്ലെങ്കിൽ ഒരു നിമിഷത്തെ അനുഭവം തന്നെ അവരുടെ ആയുഷ്ക്കാലം വിവരിക്കാൻ പര്യാപ്തമാകും. പളുങ്ക്‌ സമാനം ശുഭ്രമായ മനസ്സുമായി ജീവിതം മുഴുക്കെ അല്ലാഹുവിന്റെ ദീനിന്റെ ഉലൂമുകളുമായി ജോലിയായി ബർസഖിന്റെ മറക്കപ്പുറത്തേക്ക്‌ നീങ്ങിയ എത്ര എത്ര വിശുദ്ധ നക്ഷത്രങ്ങൾ..!

കേരള സംസ്ഥാന ജംഇയ്യത്തുൽ ഉലമയുടെ അഭിവന്ദ്യ നേതാവും വണ്ടൂർ ജാമിഅ വഹബിയ്യയുടെ പ്രിൻസിപ്പാളും ആയിരുന്ന ശൈഖുനാ കെ. അലവി മൗലവി അവർകളുടെ (വഫാത്ത്‌: 2012 നവംബർ) പുണ്യജീവിതത്തിന്റെ സകല മാധുര്യവും ചീന്തിയെടുത്ത്‌ ഒട്ടിച്ച പോലെയുള്ള, ഒരൽപ്പം നിറകണ്ണുകളോടെ വായിക്കാവുന്ന ചെറുകുറിപ്പ്‌ അവിടുത്തെ മകൻ മുഹമ്മദ്‌ ശരീഫ്‌ എഴുതിയത്‌ നുസ്രത്തിൽ വായിച്ചത്‌ ഓർക്കുന്നു.

മകന്റെ ഓർമ്മക്കുറിപ്പ്‌ തീരുന്നത്‌ ഇങ്ങനെ:

"രാവിലെ മൂന്നു മണിക്കോ നാലു മണിക്കോ മൂത്രമൊഴിക്കാൻ ഉറക്കച്ചവടോടെ എഴുന്നേൽക്കുന്ന എന്റെ കാതുകളെ വരവേറ്റിരുന്നത്‌ 'അല്ലാഹുവേ, നീ എന്നെ സ്വീകരിക്കില്ലേ ! നിന്റെ ഇഷ്ടക്കാരിൽ എന്നെ പെടുത്തില്ലേ' തുടങ്ങി നിസ്ക്കാരപ്പായയിലിരുന്ന് ഉപ്പ നടത്തിയ ഗദ്ഗദങ്ങളായിരുന്നു'..!!!"

(നുസ്രത്തുൽ അനാം 2013 ജനുവരി)

ദേഹസുഖത്തിന്റെ പരിപാലനത്തിന്‌ ഉറക്കത്തിന്റെ പിടി വിട്ടു പോകാതെ മൂത്രമൊഴിച്ച്‌ തിരിച്ച്‌ കിടക്കയിലേക്ക്‌ മലർന്നടിച്ചു വീഴാൻ തത്രപ്പെടുന്ന നാം ഓരോരുത്തരുടെയും പുലർച്ച നേരത്തെ മൂന്നു മണികളും നാലു മണികളും, ആരുമാരും ഇടയിലില്ലാതെ ഇലാഹീ സവിധത്തിലേക്ക്‌ സർവ്വ സുഖങ്ങളും മറന്ന്, ശരീരവും മനസ്സും സമർപ്പിച്ച്‌ കണ്ണുനീർ വീഴ്ത്താനുള്ളതായിരുന്നു അവർക്ക്‌..

നൂറ്റാണ്ടുകളുടെ ഇന്നലേകളിലെ വിശുദ്ധ താരകങ്ങളുടെ ജീവിതത്തെ അവിശ്വസനീയതയുടെ കണ്ണോടെ നോക്കുന്ന നമുക്ക്‌ ചുറ്റും ഇന്നുമുണ്ട്‌ ഈമാനിന്റെ പ്രകാശം തുളുംബുന്ന ഹൃദയവും ഉള്ളിലെ വേളിച്ചം അപ്പടി തെളിഞ്ഞു കാണുന്ന ജീവിത ശുദ്ധിയുമുള്ള താരകങ്ങൾ. കുറ്റിയറ്റു പോകാത്ത നന്മയുടെ വന്മരങ്ങളായി..

എല്ലാത്തിലും വലുത്‌ അവന്റെ സ്വീകരണമാണ്‌, അവന്റെ പൊരുത്തമാണ്‌ എന്ന് വിശ്വസിച്ചുറപ്പിച്ച്‌ ഋജുവായ മാർഗ്ഗത്തിലൂടെ തഖ്‌വായുടെ ഉദാത്ത മാതൃകകളായി ജീവിച്ചവർ തന്നെയാണ്‌ അവന്റെ ഇഷ്ടക്കാർ.

الذين آمنوا وكانوا يتقون

എന്നെന്നും ഉപകരിക്കുന്ന അറിവ്‌ എന്ന ദിവ്യവെളിച്ചം ആയിരുന്നു അവരുടെ സമ്പാദ്യം. അതാകട്ടെ നിലക്കാത്ത സമ്മാനങ്ങൾ അവന്റെ മണ്ണറയിലേക്ക്‌ എത്തിക്കുന്നു..

ആ തിരുനാവിൽ നിന്നും ഒഴുകിയിരുന്ന ഐഹിക വിരക്തിയുടെയും പരലോകമോഹത്തിന്റെയും സമർപ്പണ മനോഭാവത്തിന്റെയും ഉണർത്തുപാട്ടുകളായ സുന്ദര ശൈലിയിലെ പ്രസംഗങ്ങൾ എത്രയെത്ര വഅള് സദസുകളിലാണ് വിചിന്തനത്തിന്റെയും തിരിഞ്ഞു നടക്കലിന്റെയും തീപ്പൊരി ആളുകളുടെ മനസ്സുകളിൽ കോരിയിട്ടത്..!

കേരളീയ മുസ്ലിം സമൂഹത്തിനാകമാനം നേരായ വഴിയുടെ വെളിച്ചമായി പ്രഭാഷണ, പ്രസാധന, ദർസീ രംഗത്തെ ഉജ്വലപ്രഭാവമായ മൗലാനാ നജീബ് മൗലവി എന്ന ഒരേ ഒരു ശിഷ്യർ മാത്രം മതിയാകും കഥാപുരുഷനായ ശൈഖുനാ അലവി ഉസ്താദിന്റെ പ്രഭാവവും ഇരുത്തം വന്ന വിജ്ഞാന സാമ്രാജ്യത്തിന്റെ അധിപനായിരുന്നു എന്നതിന്റെ സാക്ഷ്യവും. അങ്ങനെ അറിയപ്പെട്ടതും അറിയപ്പെടാത്തതും ആയ ഒട്ടനേകം പ്രതിഭാധനരായ ശിഷ്യന്മാർ. അവരിലൂടെ കേരളത്തിന്റെ മണ്ണിൽ നിറയുന്ന വൈജ്ഞാനിക മുത്തുമണികൾ മുറിയാത്ത ധാരയായി അവിടുത്തെ തിരു ഖബ്'റിലേക്ക് അനുഗ്രഹത്തിന്റെ തെളിനീരോഴുക്ക് സൃഷ്ടിക്കും എന്നത് ഉടയാത്ത പ്രതീക്ഷയാണ്.

ان الإله واهل كل سمائه

والارض حتى الحوت مع نمل الفلا

كل يصلي يا حبيب على الذي

قد علًم الخير الأناس محصلا

നാഥന്റെ പൊരുത്തത്തെ മാത്രം മോഹിച്ച, നല്ല നല്ല ദീനീ വിജ്ഞാനീയങ്ങൾ ജനങ്ങൾക്ക്‌ പഠിപ്പിച്ച ശരിയായ ഉലമാക്കൾക്ക്‌ വേണ്ടി സമുദ്രത്തിലെ മൽസ്യങ്ങൾ, കരയിലെ ഉറുംബുകൾ എന്ന് വേണ്ട ആകാശഭൂമി ലോകത്തെ സകലതും പോറുക്കലിനെ തേടുകയും അല്ലാഹുവിന്റെ റഹ്മത്‌ അവർക്ക്‌ മേൽ സദാ വർഷിക്കപ്പെടുകയും ചെയ്യുക തന്നെ ചെയ്യുമെന്നത്‌ മഹത്‌ വചനങ്ങളിൽ വന്നത്‌ മഹാനരിൽ പുലർന്ന് കാണട്ടെ എന്ന് പ്രാർത്ഥിക്കുകയല്ലാതെ അവരോടുള്ള കടപ്പാടുകൾ തീർക്കാൻ നമുക്കെന്ത്‌ ചെയ്യാൻ കഴിയും..!

അർഹമായതിലേറെ ജസാ അവിടുത്തേക്ക് നീ നൽകണേ അല്ലാഹ് - അവിടുത്തെ പിന്നിലായി ദുനിയാവിൽ എങ്ങനെ അണിനിരന്നോ അത് പോലെ നിന്റെ പരീക്ഷണങ്ങളുടെ ലോകത്തും അവരുടെ പിന്നിലായി വിജയിച്ചവരുടെ കൂട്ടത്തിലേക്ക് ഞങ്ങളെ നീ ചേർക്കണേ നാഥാ..ആമീൻ

ബിദ്അത്തുകളെ സൂക്ഷിക്കുക - വിശ്വാസപരമായത് അതികഠിനമാണ്..!

വഹ്ഹാബികൾ ബിദ്അതുകാർ ആണ് എന്ന് പറയുമ്പോൾ പാവപ്പെട്ട ജനങ്ങളെ വസ്വാസാക്കാൻ വേണ്ടി പല പല കർമ്മങ്ങൾ കാണിച്ച് 'ഇതൊന്നും നബിതങ്ങൾ ചെയ്യാത്ത കർമ്മങ്ങൾ ആണ് - അതിനാൽ അത് ചെയ്യുന്ന സുന്നികൾ ആണ് ബിദ്അത്തുകാർ' എന്നും ഇക്കൂട്ടർ പറയുക സാധാരണമാണ്. എന്ത് പറഞ്ഞാലും സുന്നികൾ 'ചെയ്യുന്ന' അത് ബിദ്അതല്ലേ, ഇത് ബിദ്അതല്ലേ എന്ന് ചോദിക്കും സാധുക്കൾ.

അപ്പറയുന്ന കർമ്മങ്ങൾ ഏതെടുത്തു നോക്കിയാലും മദ്ഹബിലെ ഇമാമീങ്ങൾ വിലയിരുത്തിയതും പ്രമാണങ്ങൾ വെച്ച് വിധി വ്യക്തമാക്കിയതും ആയിരിക്കും എന്നത് മറ്റൊരു വശം..

വഹ്ഹാബികൾ ബിദ്അതുകാർ എന്ന് പറയുന്നത് കൊണ്ട് ഉദ്ദേശിക്കുന്ന ബിദ്അത്ത് എന്താണ് എന്നും എന്ത് കൊണ്ടാണ് അത് പറയുന്നത് എന്നും മനസ്സിലാക്കാത്തത് കൊണ്ടാണ് ഇമ്മാതിരി പോഴത്തങ്ങൾക്കൊക്കെ കാരണം.

യാതൊരു സല്ക്കർമ്മങ്ങളും സ്വീകരിക്കപ്പെടാത്ത ബിദ്അതുകാരൻ എന്നാൽ ആരാണ് എന്നും അറിയണം. അത്‌ കേവലം പ്രവർത്തിയിൽ വരുന്ന ചില കാര്യങ്ങൾ മാത്രമാണോ അതല്ല വിശ്വാസത്തിനു തന്നെ ബാധിക്കുന്ന പുഴുക്കുത്താണോ എന്നും നാം അറിയണം.

ആദ്യം എന്താണ് ഈ പറഞ്ഞ ഗുരുതരമായ ബിദ്അത് എന്ന് ഇവിടെ പറഞ്ഞത് കൊണ്ട് ഉദ്ദേശ്യം എന്ന് മനസ്സിലാക്കണം.

കർമ്മത്തിൽ ബിദ്അത്ത് എന്ന് പറയുന്നത് പല വിധത്തിൽ നല്ലതും ചീത്തയും ഉണ്ട് എന്ന് എല്ലാ ഇമാമീങ്ങളും പറഞ്ഞിട്ടുള്ള പരമാർത്ഥം ആണ്. ബിദ്അത്ത് എന്താണ് എന്ന് പറയുന്ന ഹദീസുകൾ നമുക്ക് എത്തിച്ചു തന്ന എല്ലാ ഇമാമീങ്ങളും, ഒരാളും ഒഴിയാതെ കർമ്മത്തിലെ ബിദ്അത്ത് നല്ലതും ചീത്തയും ഉണ്ട് എന്ന് പറഞ്ഞവരാണ്.

എന്നാൽ വിശ്വാസം ഒരിക്കലും തിരുത്തപ്പെടാനോ കൂട്ടിചേർക്കപ്പെടാനോ ഉള്ളതല്ല, ആദരവായ നബിതങ്ങൾ പഠിപ്പിച്ച, അവിടുത്തെ ജീവിതത്തെ പകർത്തിയ സ്വഹാബത്തും പിൽക്കാലക്കാരും അപ്പടി തുടർന്നു വന്ന വിശ്വാസകാര്യങ്ങൾ ഒരുകാലത്തും മാറ്റമില്ലാത്തതാണ്. അതിൽ മായം ചേർക്കുന്ന വിശ്വാസങ്ങൾ നല്ലതും ചീത്തയും എന്ന വ്യത്യാസമില്ലാതെ എല്ലാം പിഴച്ച ബിദ്അത് തന്നെ.

വിശ്വാസപരമായ ബിദ്അത്ത് എന്നത് വൻദോഷമാണ്. അത് കര്മ്മപരമായ പാപങ്ങൾ പോലെയല്ല മറിച്ച് അതിലേറെ ഗൌരവകരമാണ്‌. സത്യവിശ്വാസികൾക്ക് എല്ലാം പൊറുക്കുമെന്ന് പറയപ്പെട്ട മഹത് ദിവസങ്ങളിൽ പോലും പൊറുക്കപ്പെടാത്ത കൂട്ടരാണ് വിശ്വാസപരമായ ബിദ്അതുകാർ. സൂഉൽ ഖാത്വിമത്തിനെ ഭയപ്പെടേണ്ട കുറ്റം.

മൂന്നു പാപങ്ങൾ പൊറുക്കപ്പെടുകയില്ല എന്ന് നബിതങ്ങൾ പറഞ്ഞ ഹദീസിൽ മൂന്നാമതായി പറയുന്നതാണ് 'തർക്കുസ്സുന്ന'. (ترك السنة)

എന്താണ് തർക്കുസ്സുന്ന എന്നും നബിതങ്ങൾ വിവരിച്ചു -

ترك السنة الخروج من الجماعة

"തർക്കുസ്സുന്ന എന്നാൽ ജമാഅത്തിൽ നിന്ന് വിട്ടു നിൽക്കുക തന്നെ". (മുസ്തദ്രക് - ഇമാം ഹാക്കിം)

ഈ ഹദീസിൽ പറയുന്ന 'തർക്കുസ്സുന്ന' എന്നാൽ 'ബിദ്അത്ത്' ആണെന്ന് ഇമാമീങ്ങൾ പഠിപ്പിക്കുന്നു.

والمراد بذلك اتباع البدع

"ജമാഅത്തുമായി വിട്ടുപിരിയുകയെന്നാൽ ബിദ്അത്തിനോട് പിൻപറ്റുകയാണ് ഉദ്ദേശ്യം"

കാലാകാലങ്ങളായി ഇജ്മാഉള്ളതും ഇസ്ലാമിലെ വിശ്വാസ കാര്യങ്ങളിൽ പെട്ടതുമായ വിഷയങ്ങളിൽ നിന്നും ളറൂറത് കൊണ്ട് അറിയപ്പെടാത്തവ വെടിയുകയും നിരാകരിക്കുകയും ചെയ്യുന്നതാണ് ബിദ്അത്. അത്തരം മുസ്ലിമീങ്ങൾ ഒരുമിച്ചംഗീകരിക്കുന്ന കാര്യങ്ങളെ നിഷേധിക്കുകയും നിരാകരിക്കുകയും ചെയ്യുന്നതാണ് മാപ്പ് ലഭിക്കാത്ത ബിദ്അത്ത് കൊണ്ട് ഉദ്ദേശ്യം.

ഈ വിശ്വാസ കാര്യങ്ങൾ ഇമാം അബുൽ ഹസനിൽ അഷ്അരി(റ) തങ്ങളും അബൂ മൻസൂരിനിൽ മാതുരീദി(റ) തങ്ങളും വിസ്തരിച്ചു വിവരിച്ചു ക്രോഡീകരിച്ചു വെച്ചതാണ്. തിരുനബിതങ്ങളുടെയും സ്വഹാബത്തിന്റെയും എല്ലാം വിശ്വാസ വഴി അപ്പടി വിവരിച്ചു പഠിപ്പിച്ചവരാണ് അവർ. അവരും അനുഗാമികളും നിലകൊള്ളുന്ന വിശ്വാസ വഴി എന്താണോ അതാണ്‌ അഹ്ലുസ്സുന്നതി വൽ ജമാഅത്ത് എന്നതിലെ സുന്നത്ത് കൊണ്ട് ഉദ്ദേശ്യം. അശ്അരീ, മാതുരീദീ വിശ്വാസങ്ങൾക്ക് എതിരായുള്ള വിശ്വാസങ്ങൾ ആണ് ബിദ്അത്ത് (അഹ്ലുസ്സുന്നക്ക് വിരുദ്ധമായ ബിദ്അത്ത്) എന്നത് കൊണ്ട് ഉദ്ദേശ്യം..

المـراد بالسنة ما عليه إماما أهل السنة والجمـاعة الشيخ أبو الحسن الأشعري وأبو منصور الماتريدي والبدعة ما عليه فرقة من فرق المبتدعة المخالفة الاعتقاد هذين الامامين وجميع اتباعهما

الزواجر

"സുന്നത്ത് കൊണ്ടുദ്ദേശ്യം, അഹ്ലുസ്സുന്നത്തി വൽ ജമാഅത്തിന്റെ രണ്ടു ഇമാമുകൾ, ശൈഖ് അഷ്അരിയും മാതുരീദിയും എതൊന്നിൻമേൽ നിലകൊണ്ടുവോ ആ വിശ്വാസ കാര്യങ്ങളാണ്. ബിദ്അത്ത് എന്നാൽ ഇവർ രണ്ടുപേരുടെയും അവരുടെ മുഴുവൻ അനുഗാമികളുടെയും വിശ്വാസത്തിന് എതിരായി നിലകൊള്ളുന്ന ബിദ്അത്തിന്റെ സംഘങ്ങളിൽ നിന്ന് ഏതെങ്കിലും സംഘം വെച്ചു പുലർത്തുന്ന വിശ്വാസങ്ങളുമാണ്."
(സവാജിർ - ഇമാം ഇബ്നു ഹജർ(റ)).

അല്ലാഹു എന്ന സ്രഷ്ടാവിനെ കുറിച്ചുള്ള വിശ്വാസത്തിൽ അടക്കം എന്തെല്ലാം മായങ്ങൾ ഇവർ ചേർത്തു..! സ്ഥലകാലാതീതനായ അവനു സ്ഥലം നിശ്ച്ചയിചും അവയവങ്ങളെ തൊട്ട്‌ പരിശുദ്ധനായ അല്ലാഹുവിനു കയ്യും മുഖവുമെല്ലാം ഉണ്ടെന്ന് വാദിച്ച്‌, ഇലാഹിനെ പറ്റിയുള്ള മുസ്‌ലിമിന്റെ വിശ്വാസത്തെ പോലും തിരുത്തിയ കക്ഷികളാണിവർ..!

അല്ലാഹുവിന്റെ വാജിബായതും മുസ്തഹീലായതുമായ സ്വിഫത്തുകളെ പറ്റി പറയുമ്പോൾ "അല്ലാഹുവിന്‌ വാജിബാക്കാൻ ഇവർ ആരാ" എന്ന് ചോദിച്ച കറതീർന്ന ബിദഈ വിശ്വാസക്കാർ.

ഇങ്ങനെ മുസ്ലിം ലോകത്തിന്‌ കേട്ടുകേൾവി ഇല്ലാത്ത എന്തെല്ലാം പിഴച്ച വിശ്വാസങ്ങൾ ഇവർക്കുണ്ട്‌..! ഇജ്മാ ഇനു വിരുദ്ധമായ എന്തൊക്കെ വാദങ്ങൾ..!

എന്നാൽ സുന്നികൾ ആയിരത്തി നാനൂറു വർഷമായി യാതൊരു മാറ്റവുമില്ലാത്ത അടിയുറച്ച വിശ്വാസത്തിന്റെ മേൽ ഏകോപിച്ചിരിക്കുന്നവരാണ്‌. അല്ലാഹുവിലുള്ള വിശ്വാസത്തിലോ ഖദ്രിലുള്ള വിശ്വാസത്തിലോ ഈമാൻ കാര്യങ്ങളിൽ ഒന്നിലുമോ തിരുത്തില്ലാത്ത നേരായ വിശ്വാസം.

ബിദ്അത്ത് എന്നാൽ കേവലം കർമ്മത്തിൽ ഒതുങ്ങി നിൽക്കുന്ന ചിലതിലേക്ക് തളച്ച്, പിഴച്ച വിശ്വാസത്തെ ആണ് യഥാർത്ഥത്തിൽ സുന്നത്തിനു വിരുദ്ധമായ ബിദ്അത്ത് എന്ന പ്രയോഗത്തിലെ ഏറ്റവും മർമ്മമായ ഭാഗമായി പറയേണ്ടത് എന്നുള്ള അടിസ്ഥാന ഭാഗം തന്നെ മുക്കി പാവപ്പെട്ട അണികളെ പിഴപ്പിക്കുന്നതാണ് വഹ്ഹാബീ നേതാക്കൾ.

തിരുനബിതങ്ങളും സ്വഹാബത്തും നിലകൊണ്ട വിശ്വാസത്തിൽ ആരു ജീവിക്കുന്നോ അവരാണ്‌ അഹ്ലുസ്സുന്ന. നൂറ്റാണ്ടുകൾ എത്രയോ ആയി മാറ്റമില്ലാതെ മുസ്ലിം ലോകം തുടർന്നു പോരുന്ന അടിസ്ഥാന വിശ്വാസമായ തൗഹീദിൽ പോലും തീരാത്ത ഇജ്തിഹാദുകൾ തുടരുന്ന വഹ്ഹാബീ വിഭാഗത്തിന്റെ ഇന്നത്തെ അവസ്ഥ കണ്ടിട്ടും നിങ്ങൾക്ക് മനസ്സിലാകുന്നില്ലേ ഇത് മുഅ്തസിലത്, ഖവാരിജ്, ഷീഅത്ത്, മുർജിഅ, മുശബ്ബിഹ..അങ്ങനെ പോകുന്ന ബിദ്അത്തിന്റെ കക്ഷികളിൽ പെട്ടത് തന്നെയെന്ന്..!!!

(അവലംബം: മൗലാനാ നജീബ് മൌലവിയുടെ പഴയ ഒരു ലേഖനം )