അല്ലാഹു കൈവിടില്ല - നിശ്ചയം!

ഉടയ തമ്പുരാനൊരിക്കലുമവന്റെ അലിവിന്റെയും കരുണയുടെയും കവാടങ്ങളടച്ചു വെക്കുകയേയില്ല. ചെയ്തു കൂട്ടിയ പാപങ്ങളുടെ പേരിൽ ഏഴയായ, ദുർബലനായ, ബലഹീനനായ ഈ അടിമയെ ശിക്ഷിക്കുന്നത്‌ കൊണ്ട്‌ സർവ്വ പ്രതാപിയും സർവ്വാധികാരിയും സർവ്വ ശക്തനുമായ റബ്ബിന്‌ യാതൊന്നും വർദ്ധിക്കാനില്ല, അവന്റെ സംരക്ഷണത്തിന്റെ കരവലയത്തിലാക്കി പറുദീസയിലേക്ക്‌ ചേർക്കുന്നത്‌ കൊണ്ട്‌ ഒരണുമണിയുടെ ഘനത്തിൽ പോലും അവന്‌ യാതൊന്നും കുറയാനുമില്ല.


മുഖ്ലിസും മുത്തഖിയുമായ ഒരു ആലിം തന്റെ ജീവിതത്തിലൊരിക്കലും നരകത്തിന്റെ ഭയാനകതയെക്കുറിച്ച്‌ തന്റെ ശിഷ്യന്മാരോട്‌ ഭയപ്പെടുത്താറേയില്ലായിരുന്നത്രെ. അദ്ദേഹം വഫാത്തായ ശേഷം ശിഷ്യൻ സ്വപ്നത്തിൽ കണ്ട്‌ 'അല്ലാഹു അങ്ങയെ എന്ത്‌ ചെയ്തു' എന്ന് ചോദിച്ചുവത്രെ.


അദ്ദേഹം പറഞ്ഞു: അല്ലാഹു എന്നോട്‌ ചോദിച്ചു. "എന്ത്‌ കൊണ്ടാണ്‌ നീ ഒരിക്കലും എന്റെ അടിമകളെ നരകത്തെത്തൊട്ട്‌ പറഞ്ഞ്‌ ഭയപ്പെടുത്താതിരുന്നത്‌?" ഞാൻ അല്ലാഹുവിനോട്‌ പറഞ്ഞു: "യാ അല്ലാഹ്‌, അവർ നിന്നെ ഇഷ്ടപ്പെടുന്നതിനെയാണ്‌ ഞാൻ ആഗ്രഹിച്ചത്‌", ശേഷം അല്ലാഹു എനിക്ക്‌ എല്ലാം പൊറുത്തു തന്നു!.

കഴിഞ്ഞു പോയ സമയത്തിൽ ചെയ്തു കൂട്ടിയ തിന്മകളിലാകെ അവന്റെ ശിക്ഷക്ക്‌ പകരം അവന്റെ മഗ്ഫിറത്തിനെയാണ്‌ ഞാൻ പ്രതീക്ഷിക്കുന്നത്‌. തെറ്റുകളിലായി ജീവിക്കുവാൻ പോലുമെനിക്ക്‌ അറ്റമില്ലാത്ത അനുഗ്രഹങ്ങൾ വാരി നൽകുന്ന നാഥനെ കുറിച്ച്‌ ഞാനെങ്ങനെ നിരാശനാകും?! അവന്റെ ദേഷ്യത്തെ അവന്റെ കാരുണ്യം കവച്ചു വെക്കുന്നുണ്ടെന്നത്‌ പ്രതീക്ഷയുടെ വാതിലിലേക്കുള്ള ആശയുടെ താക്കോലാണ്‌. ഉയരെ ആകാശത്തേക്കോ ഭൂമിയുടെ ആഴങ്ങളിലേക്കോ വിശാലമായ പാപങ്ങളാണെങ്കിലും പൊറുക്കുമെന്നവന്റെ വാഗ്ദാനമാണ്‌. സ്വർഗ്ഗത്തിന്റെ താക്കോൽ കൂട്ടങ്ങളായ ലാ ഇലാഹ ഇല്ലല്ലാഹിയിൽ ഞാൻ അവിശ്വസിച്ചിട്ടേയില്ലല്ലൊ.


ദിവസവും 70 പ്രാവശ്യം പാപങ്ങൾ ചെയ്യുകയും ഓരോ വട്ടവും ശേഷം ഉടനെ തൗബ ചെയ്യുകയും ചെയ്യുന്ന ആളെക്കൊണ്ട്‌ ഹസനുൽ ബസ്വരി(റ) വിനോട്‌ ചോദിക്കപ്പെട്ടപ്പോൾ അവിടുന്ന് പറഞ്ഞത്‌

ما أعلم هذا إلا من أخلاق المؤمن

സത്യവിശ്വാസിയുടെ സ്വഭാവം തന്നെയല്ലാതെ അതിൽ മറ്റൊന്നും ഞാൻ കാണുന്നില്ല എന്നായിരുന്നു.


മാലാഖമാരായല്ല അല്ലാഹു നമ്മെ സൃഷ്ടിച്ചത്‌, പാപങ്ങൾ ചെയ്യുകയും അവനിലേക്ക്‌ അവന്റെ മഗ്ഫിറത്തിനായി നിറകണ്ണുകളോടെ കൈ നീട്ടുകയും ചെയ്യുന്നവരേക്കാൾ അവനിഷ്ടമുള്ളവരായി ആരുണ്ട്‌?!


تعاظمني ذنبي فلما قرنته

بعفوك ربي كان عفوك اعظما




പാപങ്ങളുടെ ഭീമമായ ഭാണ്ഡം എണ്ണവും വണ്ണവുമെടുക്കാൻ കഴിയാത്ത വിധം ഏറെയേറെയുണ്ടെന്നെനിക്കറിയാമെങ്കിലും നാഥാ, നിന്റെ മഗ്ഫിറത്തും അലിവും കരുണയും എന്റെ പാപങ്ങളേക്കാളേറെ വിശാലവും മഹത്വമുടയതുമാണെന്ന വിശ്വാസത്തിലാണെന്റെ മോഹവും പ്രതീക്ഷയും ആശയും. നീയാകട്ടെ, അശേഷം ആലംബഹീനരായ അടിമകൾക്ക്‌ മോഹഭംഗം വരുത്തുന്നവനല്ലേയല്ല...

ആയിഷ - ആതിര: പ്രതീക്ഷകൾ അസ്തമിക്കുമോ?

ആയിഷ വീട്ടിൽ നിന്നും പോകുന്നതിന്റെ മുമ്പ് മാതാപിതാക്കൾക്ക് എഴുതി വെച്ച കത്ത് വായിച്ചു കഴിഞ്ഞപ്പോൾ മനസ്സ് പറയുന്നു തീർച്ചയായും അവൾ തിരിച്ചു വരുമെന്ന്. ഏകദൈവ വിശ്വാസത്തോടുള്ള താൽപ്പര്യം അവളുടെ ഫിത്രയുടെ തന്നെ ഭാഗമാണെന്ന് അത് വായിക്കുന്നവർക്ക് ബോധ്യമാകും. അല്ലാഹു അവളുടെ മനസ്സിനുള്ളിൽ കത്തിച്ചു വെച്ച ഹിദായത്തിന്റെ വെളിച്ചത്തെ ഊതിക്കെടുത്താൻ നോക്കുന്നവർക്ക് താൽക്കാലിക വിജയമുണ്ടായേക്കാമെങ്കിലും കാലവും സമയവും ഒത്തു വരുമ്പോൾ ഇൻശാ അല്ലാഹ് ആ വെളിച്ചത്തെ അത് വളർത്തിയ തമ്പുരാൻ തന്നെ പൂർത്തീകരിക്കും....

"ഇസ്‌ലാം ആണ് സത്യം എന്നെനിക്ക് ബോധ്യപ്പെട്ടു കഴിഞ്ഞു. നിങ്ങളെന്നെ ഭീഷണിപ്പെടുത്തിയോ മറ്റോ ഒരു വിവാഹം കഴിപ്പിച്ചാൽ എത്ര നാൾ ഞാനിതൊക്കെ മറച്ചു വെക്കും? എന്റെ മനസ്സാക്ഷിയോട് തന്നെ ചെയ്യുന്ന വഞ്ചനയാണത്. മനസ്സിൽ ഒന്നുവെച്ച് പുറത്ത് മറ്റൊന്നായി എത്രനാൾ ഞാൻ അഭിനയിക്കും? ആ വിവാഹം കഴിക്കുന്ന ആളോടും കൂടി ചെയ്യുന്ന ഏറ്റവും വലിയ വിശ്വാസ വഞ്ചനയല്ലേ അത്. അതുകൊണ്ട് ഒരു ഹിന്ദു യുവാവിനെ വിവാഹം കഴിച്ച് ആ വിശ്വാസം അനുസരിച്ച് ജീവിക്കാൻ എനിക്ക് ബുദ്ധിമുട്ടാണ്. എന്റെ വിശ്വാസത്തെ മറന്ന് എനിക്ക് ജീവിക്കാനാവില്ല" (ആയിഷയുടെ കത്തിന്റെ 18 ആം പേജ്).

"എന്റെ വിശ്വാസത്തെ മറന്നു കൊണ്ട് എനിക്ക് ജീവിക്കാനാവില്ല. അതെന്റെ മാനസിക നില തന്നെ തെറ്റിക്കും. എന്റെ ആ ഒരവസ്ഥയാണോ നിങ്ങൾക്ക് കാണേണ്ടത്? അല്ല, ഞാൻ സന്തോഷത്തോടും സമാധാനത്തോടും കൂടി ജീവിക്കുന്നതാണോ? അച്ഛാ - അമ്മേ, നിങ്ങൾക്ക് ഞാനാണോ വലുത്? അല്ല സമൂഹമാണോ? എനിക്കീ ജീവിതം ഇങ്ങനെ മുന്നോട്ട് കൊണ്ടുപോകാൻ ബുദ്ധിമുട്ടാണ്. എന്റെ വിശ്വാസങ്ങളെയും കർമ്മങ്ങളെയും ഒഴിവാക്കിക്കൊണ്ട് ജീവിക്കാൻ എനിക്ക് പറ്റുന്നില്ല. അതുകൊണ്ട് ഞാൻ ഒരു തീരുമാനം എടുക്കുകയാണ്. ഞാൻ ഇസ്‌ലാം പഠിക്കാൻ വേണ്ടി പോകുകയാണ്. നിങ്ങൾ വിഷമിക്കരുത്. സമൂഹത്തിൽ മുസ്ലിം എന്ന ഐഡന്റിറ്റി എനിക്ക് വേണം. അതിന് സർട്ടിഫിക്കറ്റ് വേണം. എന്നാലേ സമൂഹം എന്നെ മുസ്ലിം ആയിട്ട് അംഗീകരിക്കുകയുള്ളൂ. ഏതെങ്കിലും അഫയേഴ്സിൽ പെട്ടോ, ആരെങ്കിലും നിർബന്ധിപ്പിച്ചോ എടുത്ത തീരുമാനം അല്ല ഇത്. ഇസ്‌ലാം ആണ് സത്യം എന്ന് ബോധ്യപ്പെട്ടതു കൊണ്ട് എടുത്ത എന്റെ സ്വന്തം തീരുമാനമാണിത്

അച്ഛാ അമ്മേ, എന്റെ വിശ്വാസം മാത്രമേ ഞാൻ മാറുന്നുള്ളൂ, ഞാൻ എന്നും നിങ്ങളുടെ സ്വന്തം മകൾ ആണ്. ഞാൻ ഒരിക്കലും നിങ്ങളെ ഉപേക്ഷിച്ച് പോകുന്നുമില്ല. ഈ എഴുത്ത് കേവലം ഒരു കത്തായി മാത്രം കണക്കാക്കരുത്. ഇസ്‌ലാം എന്താണെന്ന് നിങ്ങളും അറിയാൻ ശ്രമിക്കണം. സ്വന്തം മനസ്സാക്ഷിയോടെങ്കിലും ചോദിക്കണം. എന്തിനാണീ ജീവിതം? ജീവിതത്തിന്റെ ലക്ഷ്യം എന്താണ്? ആരാണ് നമ്മുടെ സ്രഷ്ടാവ്? എന്നൊക്കെ.

സത്യം എന്നെങ്കിലും നിങ്ങൾ അംഗീകരിക്കണേ എന്നാണ് എന്നും അല്ലാഹുവിനോടുള്ള എന്റെ പ്രാർത്ഥന. ഈ ലോകത്ത് നമുക്ക് ഒരു ചാൻസ് മാത്രമേ ഉള്ളൂ അത് നഷ്ടപ്പെടുത്തരുത്. സത്യം ഏതാണെന്ന് നിങ്ങളും കണ്ടെത്തുക. തിരിച്ചറിയുക. എനിക്ക് വിശ്വാസമുണ്ട്. സത്യം നിങ്ങളും തിരിച്ചറിയുമെന്ന്. ഇൻശാ അല്ലാഹ്..." (കത്തിന്റെ അവസാന ഭാഗം 19 - 20 പേജ്).

ഇസ്‌ലാമിലല്ലാതെയുള്ള ജീവിതം അവൾക്ക് സാധ്യമല്ല എന്ന് പറഞ്ഞ മനസ്സിൽ പതിഞ്ഞ ഈമാൻ ദൃഢമാണ്, പീഢനങ്ങൾ സഹിക്കുന്നതിന് വെറുമൊരു ദുർബലയായ 20 വയസ്സുകാരി പെണ്ണിന് പരിധിയുണ്ട്, എക്കാലവും അവളെ കാൽക്കീഴിൽ ഞെരിച്ചമർത്തി ജീവിക്കാൻ ആർക്കും സാധ്യമല്ലല്ലോ, മനസ്സ് പറയുന്നത് ഇന്നും അവൾ ഈമാനിൽ തന്നെയാണ്, എന്നെങ്കിലും ഒരിക്കൽ സാഹചര്യവും സമയവും ഒത്തു വരുമ്പോൾ ഇന്ന് നടക്കുന്നതിന്റെയൊക്കെ ഉള്ളറയിലെ രഹസ്യങ്ങൾ അവൾ വെളിപ്പെടുത്തുക തന്നെ ചെയ്യും, ഒന്നുമില്ലെങ്കിൽ അവൾക്കല്ലാഹു നൽകിയ ഈമാനിലായി സ്വകാര്യതയിൽ എങ്കിലും അവൾ ജീവിക്കും.

ഇതൊരു ശുഭ പ്രതീക്ഷയാണ്, കേട്ടറിഞ്ഞതും വായിച്ചറിഞ്ഞതുമായ എടുത്തു ചാട്ടക്കാരി പെണ്ണൊന്നുമല്ല ആയിഷയെന്ന് ഒരു വട്ടം ആ കത്ത് വായിച്ചവർക്ക് മനസ്സിലാകും.വർഷങ്ങളുടെ നിരന്തരമായ പഠനവും ബോധ്യവുമാണ് അവൾക്ക് കൈമുതലായത്. ആയിഷ എന്ന നാമം തന്നെ ക്ഷമയുടെയും സഹനത്തിന്റെയും പരീക്ഷണത്തിന്റെയും വലിയൊരു ചരിത്രം മുന്നിൽ വെക്കുന്നുണ്ട്.

ജീവനേക്കാൾ സംരക്ഷിക്കുന്ന പരിശുദ്ധിയെപ്പറ്റി കപട വിശ്വാസികൾ ഉയർത്തി വിട്ട കളവുകളും ഊഹാപോഹങ്ങളും വിശ്വാസികളെ പോലും സ്വാധീനിക്കപ്പെട്ടു പോയപ്പോൾ പ്രവാചകരുടെ (സ്വ) പ്രിയപത്നി ഹസ്രത്ത് ആയിഷ ബീവി(റ) അനുഭവിച്ച കഠിനമായ പ്രയാസം അവസാനം മറകൾ നീക്കി ഹഖിനെ വെളിവാക്കി പത്തോളം വിശുദ്ധ വചനങ്ങൾ അവതീർണ്ണമാക്കി ഉടയ തമ്പുരാനായ അല്ലാഹു തന്നെ മഹതിയുടെ പരിശുദ്ധി വ്യക്തമാക്കിയപ്പോൾ മഹതി പറഞ്ഞത്

ولكن والله ما كنت أظن أن الله عز وجل ينزل في شأني وحيا يتلى

"അല്ലാഹുവാണെ സത്യം, എന്റെ നിരപരാധിത്വം വെളിവാക്കാൻ അല്ലാഹു അവന്റെ വിശുദ്ധ ഖുർആനിൽ എന്നെന്നും ഓതപ്പെടുന്ന ആയത്ത് വഹ്'യായി ഇറക്കുമെന്ന് ഞാനൊരിക്കലും വിചാരിച്ചിരുന്നില്ല" എന്നായിരുന്നു. എല്ലാ കഴിവുമുടയവനായ അല്ലാഹു അവൾക്കായി എന്ത് സംവിധാനിച്ചു വെച്ചിരിക്കുന്നു എന്ന് നാമറിയില്ലല്ലോ.

ഭീഷണികളിലും പീഡനങ്ങളിലും പിടിച്ചു നിൽക്കാൻ മറിച്ചു പറഞ്ഞാൽ ഒലിച്ചു പോകുന്നതല്ല ഈമാൻ എന്നവൾക്ക് തീർച്ചയായും അറിയാമായിരിക്കും. ബാഹ്യമായ അമലുകൾക്കപ്പുറം ഹൃദയത്തിൽ വേരുറച്ച വെളിച്ചമാണ് വിശ്വാസം. അത് തെളിഞ്ഞു തന്നെ നിൽക്കുന്നുണ്ടാകും എന്ന് പ്രതീക്ഷിക്കാം. എല്ലാ മറകളും നീക്കി സ്രഷ്ടാവായ നാഥൻ അവൾക്ക് സുരക്ഷിതത്വവും ഈമാനിന്റെ വെളിച്ചവും പകർന്നു നൽകട്ടെ എന്ന് ആത്മാർത്ഥമായി പ്രാർത്ഥിക്കുകയല്ലാതെ വേറെ മാർഗ്ഗമൊന്നുമില്ലല്ലോ..😪

ആയിഷയുടെ കത്തിന്റെ പൂർണ്ണ രൂപം വായിക്കാൻ ഇവിടെ ക്ലിക്ക് ചെയ്യുക

തിരുനബിയിലേക്ക് - വിജയത്തിലേക്ക്..

അല്ലാഹുവിന്റെയും സൃഷ്ടികളുടെയും ഇടയിലെ വസീലയാണ്‌ തിരുനബി(സ്വ). അവിടുന്ന് ഇങ്ങോട്ടുള്ളത്‌ നൽകാനുള്ളതിന്‌ മാത്രമല്ല ഇവിടുന്നങ്ങോട്ട്‌ കാര്യങ്ങൾ സാധിക്കാനും കൂടെ അവിടുന്ന് വസീലയാണെന്നത്‌ ആർക്കും മനസ്സിലാക്കാവുന്നതാണ്‌. അവിടുത്തെ മേലുള്ള സ്വലാത്തില്ലാതെ ദുആകൾ ഉയർത്തപ്പെടുകയില്ലെന്നത്‌ തിരുവചനത്തിൽ തന്നെ വ്യക്തമാക്കപ്പെട്ടതാണല്ലോ.

ഒരു തിന്മയും പ്രവർത്തിക്കുകയോ അതിലേക്ക്‌ ആലോചിക്കുകയോ ചെയ്യരുതെന്ന ഇലാഹീ നിർദ്ദേശം തക്‌'ലീഫുള്ള ഇരുവിഭാഗം സൃഷ്ടികൾക്കാസകലം എത്തിച്ചു നൽകിയ തിരുനബി(സ്വ)ക്ക്‌ അവരിൽ നിന്ന് തിരിച്ച്‌ നിന്ന് ലഭിക്കാനുള്ളതായി അല്ലാഹു തീരുമാനിച്ചു നൽകിയ ഹഖാണ് അവിടുത്തെ പൂർണ്ണമായും അനുസരിക്കപ്പെടുക എന്നത്. അല്ലാഹുവിന്റെ തിരുകലാം മാത്രം വിശ്വസിച്ചത്‌ കൊണ്ടൊരാളും സത്യവിശ്വാസി ആകുന്നില്ല. ഇലാഹായ തമ്പുരാന്റെ ഏകത്വത്തെ സമ്മതിച്ചു, വിശ്വസിച്ചു അംഗീകരിക്കുന്നതോടൊപ്പം മുത്ത് നബി(സ്വ) തങ്ങളേയും സ്വീകരിക്കാതെ മുസ്ലിമാകുക സാധ്യമല്ല തന്നെ.

മുകല്ലഫായ സൃഷ്ടികളിലേക്ക്‌ അവിടുന്ന് അല്ലാഹുവിങ്കൽ നിന്നും കൊണ്ട്‌ വന്നതിനെയൊക്കെ അന്ത്യനാൾ വരെയുള്ള സർവ്വ സമൂഹത്തിലും സകലരാലും അനുസരിക്കപ്പെടണം എന്നത് അവിടുത്തേക്ക് സ്രഷ്ടാവായ ഉടയ തമ്പുരാൻ ഏകിയ ഹഖാണ്. തിരുനബിക്ക്‌(സ്വ) വഴിപ്പെടാതെ അല്ലാഹുവിനു വഴിപ്പെടുക സംഭവ്യമല്ല തന്നെ. ത്വാഅത്തുകളുടെ സ്വീകാര്യത പോലും റസൂൽ(സ്വ)യെ അനുസരിക്കുന്നതിലാണ്‌ അല്ലാഹു സംവിധാനിച്ചിരിക്കുന്നത്‌. അതിനാൽ തന്നെ നാം ചെയ്യുന്ന ഏതൊരു പാപത്തിലും അല്ലാഹുവിന്റെ ഹഖിലുള്ള നിഷേധവും അതേ അളവിൽ തന്നെ ഹബീബിന്റെ ഹഖിലുള്ള നിഷേധവും ഉൾക്കൊള്ളുന്നു എന്നത് ബുദ്ധിയുള്ള ഏതൊരു മനുഷ്യനും അംഗീകരിക്കാനും സമ്മതിക്കാനും കഴിയുന്ന പരമാർത്ഥമാണ്.

സ്വന്തത്തോട്‌ അക്രമം ചെയ്തവർ അവിടുത്തെ സവിധത്തിലേക്ക്‌ ചെല്ലാനുള്ള വിശുദ്ധ ഖുർആനിന്റെ നിർദ്ദേശം ഏതെങ്കിലും ഒരു വിഭാഗം ആളുകളിലോ ഒരു കാലത്തേക്കോ മാത്രം ചുരുക്കപ്പെട്ടതായി ഇമാമീങ്ങളാരും പഠിപ്പിക്കുന്നില്ല. അവിടുന്ന് പ്രവാചകരായിട്ടുള്ള എല്ലാ സമൂഹത്തിന്റെയും പാപങ്ങൾ സ്വന്തത്തോടുള്ള അക്രമവും അതുവഴി അല്ലാഹുവിന്റെയും നബിതങ്ങളുടെയും(സ്വ) ഹഖിന്റെ നിഷേധവുമാണ്‌.

അവിടുത്തെ ഹഖിനെ നിഷേധിച്ചവർ അവിടുത്തെ തിരുസന്നിധിയിലേക്ക് ചെന്ന് അല്ലാഹുവിന്റെ മഗ്ഫിറത്‌ നേടി എടുക്കാനുള്ള മാർഗ്ഗമാണ് അവിടുത്തെ ശഫാഅത്ത് തേടൽ. കഴിഞ്ഞു പോയ നൂറ്റാണ്ടുകളിൽ ആകമാനം അറിവിന്റെ വെളിച്ചം നിറച്ച ഉലമാക്കളിലെ അഗ്രഗണ്യരായ നാല് മദ്ഹബിലെയും ഇമാമീങ്ങൾ തിരു ശഫാഅത്ത് ലഭ്യമാക്കാൻ വേണ്ടി ചെയ്യുന്ന പ്രവർത്തനങ്ങൾ പുണ്യമാണ് എന്ന് പഠിപ്പിച്ചവരാണ്.

ശാരീരികമായി അവിടുത്തെ സമീപിക്കാൻ മദീനാ മുനവ്വറയിലേക്ക്‌ പോയി തിരു ഖബ്‌റു ശരീഫിങ്കൽ ചെന്ന് പാപങ്ങളെത്തൊട്ട്‌ അന്യായം പറഞ്ഞ്‌ അവിടുത്തെ ശഫാഅത്ത്‌ തേടാൻ കഴിയുന്നവർ അങ്ങനെയും അല്ലാത്തവർ ആത്മീയമായെങ്കിലും തിരുമുന്നിൽ പാപത്തെച്ചൊല്ലി അന്യായം ബോധിപ്പിച്ച്‌ റബ്ബിലേക്കവിടുത്തെ വസീലയാക്കിയതായാണ്‌ കഴിഞ്ഞുപോയ എല്ലാ കാലത്തെയും ഉലമാ സമൂഹത്തിന്റെയും ചരിത്രം പഠിപ്പിക്കുന്നത്‌..

فـي حالة البعد روحي كنت أرسلها

تقبــل الأرض عنــي وهــي نـائبتي.
പാപങ്ങളിൽ മുഖം പൂഴ്ത്തി അക്രമിയായി ജീവിച്ച ഇന്നലെകളും ഇന്നുകളും പ്രയാസത്തിന്റെ വേവലാതിയായി നെഞ്ചിൽ വേദന പകരുമ്പോൾ ആശ്വാസത്തിന്റെ ഇളം തലോടലാകുന്നത്‌ തിരുനബിയാണ്‌(സ്വ). പാപമെത്ര വലുതായാലും അവിടുന്ന് കൈ വെടിഞ്ഞിട്ടില്ല, വെടിയുകയുമില്ല.

ولم تصرف وجهك عنه وهو وسيلتك ووسيلة أبيك آدم عليه السلام إلى الله تعالى يوم القيامة

"അവിടുത്തെത്തൊട്ട്‌ മുഖം തിരിക്കല്ലേ" എന്ന് ഇമാം മാലിക്ക്‌(റ) തങ്ങൾ ഖലീഫയോട്‌ പറഞ്ഞത്‌ നാമോരോരുത്തർക്കുമായാണ്‌. മനുഷ്യപിതാവായ ആദം നബി(അ)ന്റെ പോലും വസീലയായ റസൂലുല്ലഹി(സ്വ) തങ്ങളെത്തൊട്ട്‌ മുഖം തിരിക്കാതെ അവിടുത്തെ അല്ലാഹുവിലേക്ക്‌ ഇടയാളരായിപ്പിടിച്ചു രക്ഷനേടാനല്ലാതെ നമുക്കെവിടെയാണൊരു പിടിവള്ളിയുള്ളത്‌?!

شفاعتي لأهل الكبائر من أمتي

അവിടുത്തെ ശഫാഅത്ത്‌ വിശാലമാണ്‌, ആ ശഫാഅത്തിനെ സ്വീകരിക്കുമെന്നത്‌ തമ്പുരാന്റെ വാഗ്ദാനമാണ്‌. പാപികളേ, തിരുനബിയിലേക്ക്‌ മടങ്ങൂ - അവിടുന്നാണല്ലാഹുവിലേക്കുള്ള വഴി.

യാ റസൂലല്ലാഹ്‌, പാപങ്ങളിൽ മുങ്ങിയ ജീവിതമാണെന്റെത്‌, അവിടുത്തെ ശഫാഅത്തിലാണാകെയുള്ള പ്രതീക്ഷ, അതിനർഹതപ്പെടുന്നവരിലെങ്കിലും പെടാനവിടുത്തെ സഹായമേകണേ....

ഞങ്ങൾ ഞങ്ങളുടെ സൽക്കർമ്മങ്ങളെ വിൽക്കാറില്ല!

എന്ത്‌ നന്മ ഒരാൾക്ക്‌ ചെയ്ത്‌ കൊടുക്കുമ്പോഴും പല രീതിയിൽ മനുഷ്യർ അതിനെ കാണും. തിരിച്ച്‌ വല്ലതും ലഭിക്കും എന്ന പേരിലാകാം പലപ്പോഴും നമ്മൾ പല ഉപകാരങ്ങളും ചെയ്യുന്നത്‌. അല്ലാഹുവിനെ മാത്രം ഉദ്ദേശിച്ച്‌ കൊണ്ട്‌ ചെയ്യുന്നതും ഉണ്ടാകും അക്കൂട്ടത്തിൽ. എങ്കിൽ പോലും ഒരിക്കൽ നാമൊരു കാര്യം ചെയ്ത്‌ കൊടുത്ത ഒരു മനുഷ്യനിൽ നിന്നും നമുക്ക്‌ സഹായം നിഷേധിക്കപ്പെട്ടാൽ തീർച്ചയായും അതിന്റെ പേരിൽ നാം വിഷമിക്കുകയും 'അന്ന് ഞാനവന്‌ അത്‌ ചെയ്തു കൊടുത്തിരുന്നു - ഇന്ന് എനിക്ക്‌ ഈയൊരു കാര്യം അവൻ ചെയ്തു തന്നില്ല' എന്ന് പരാതിപ്പെടുകയും ചെയ്യുന്നത് പതിവാണ്.

ആരിൽ നിന്നും എന്ത്‌ തിരിച്ച്‌ കിട്ടിയാലും ഇല്ലെങ്കിലും അല്ലാഹുവിങ്കൽ പ്രതിഫലം ലഭിക്കണം എന്ന ഉത്തമമായ ചിന്ത മനസ്സിലുള്ളവർ താൻ ചെയ്യുന്ന ശാരീരികമോ മാനസികമോ, സാമ്പത്തികമോ ആയ എന്ത്‌ സഹകരണങ്ങളും ചെയ്യലോടെ അതിനെ റബ്ബിലേക്ക്‌ ഏൽപ്പിക്കുകയാണ്‌ ചെയ്യേണ്ടത്‌. അതിന്റെ ഭാഗം തന്നെയാണ്‌ 'വലത്‌ കൈ കൊണ്ട്‌ കൊടുത്തത്‌ ഇടത്‌ കൈ അറിയാതിരിക്കുക ' എന്നതും. തിരിച്ച്‌ പ്രതീക്ഷിക്കാതിരിക്കുക എന്നത്‌ ചെയ്യുന്ന കാര്യത്തിന്റെ പൂർണ്ണതയെ പോലും ബാധിക്കുമെന്നതാണ്‌ ശരി. ഉടുതുണിക്ക്‌ മറുതുണിയില്ലാതെ പിറന്ന നാടും വിട്ട്‌ മദീനയിലേക്ക്‌ വന്ന മുഹാജിറുകളിൽ പലരും പിൽക്കാലത്ത്‌ അൻസ്വാറുകളേക്കാൾ സാമ്പത്തിക ശേഷിയുള്ളവരായി മാറിയത്‌ തിരിച്ച്‌ പ്രതീക്ഷിക്കാതെയുള്ള അൻസ്വാറുകളുടെ സഹകരണത്തിന്റെ തന്നെ പ്രതിഫലനമായിരുന്നു.


ഇറാഖിലെ പ്രവിശ്യാ ഭരണാധികാരി, ഖലീഫ അലി (റ) വിൽ നിന്നും ഒരു കാര്യം നേടാൻ വേണ്ടി ഹസ്രത്ത്‌ അബ്ദുല്ലാഹ്‌ ഇബ്നു ജഅഫർ (റ) വിനോട്‌ സഹായം അഭ്യർത്ഥിച്ചു. മഹാൻ അലി(റ) വിനോട്‌ ആ കാര്യം സൂചിപ്പിക്കുകയും ഫലമായി കാര്യം സമ്മതിച്ചു കിട്ടുകയും ചെയ്തു. ഉപകാരസ്മരണയായി ഭരണാധികാരി നാൽപ്പതിനായിരം ദിർഹം അബ്ദുല്ലാഹ്‌ തങ്ങൾക്ക്‌ കൊടുത്തയച്ചു. ആ പണം അതേപടി തിരിച്ചയച്ച്‌ കൊണ്ട്‌ മഹാൻ അധികാരിയെ അറിയിച്ചു:


"ഞങ്ങൾ ഞങ്ങളുടെ സൽക്കർമ്മങ്ങളെ വിൽക്കാറില്ല".!!


വല്ലതും തിരിച്ച്‌ ലഭിക്കണം എന്ന് പ്രതീക്ഷിക്കാതിരിക്കുക മാത്രമല്ല തിരിച്ച്‌ ലഭിക്കുന്നത്‌ ചെയ്ത നന്മയെ നശിപ്പിച്ചേക്കുമോ എന്ന ഭയവുമായിരുന്നു അവരെ നയിച്ചത്‌. ഞാൻ ചെയ്തത്‌ കൊണ്ട്‌ എനിക്കെന്ത്‌ നേട്ടം ലഭിച്ചു എന്ന് ആലോചിക്കുന്നതിനേക്കാൾ അത്‌ കൊണ്ട്‌ അല്ലാഹുവിൽ എനിക്ക്‌ വല്ലതും ലഭിക്കുമോ എന്നതിനെ പറ്റി വേവലാതി കൊള്ളുന്നതാണ്‌ സത്യവിശ്വാസിക്ക്‌ ഭൂഷണം. വിശ്വാസിയുടെ ആ നിലയും കടന്ന് അല്ലാഹുവിൽ നിന്നും പ്രതിഫലം ലഭിക്കുമോ എന്നതിനേക്കാളും ഉത്തമമായതും അത്യുന്നതമായ ചിന്തയാണ് സൽക്കർമ്മങ്ങളെല്ലാം സ്രഷ്ടാവായ നാഥന്റെ തൃപ്തിയും പൊരുത്തവും ലഭ്യമാകാൻ മാത്രം ചെയ്യുകയെന്നത്. 

ഒഴുക്കുന്ന രക്തമോ ദാനമായി കൊടുക്കുന്ന മാംസമോ അല്ല അതിനൊക്കെ പിന്നിലെ നിങ്ങളുടെ മനസ്സിലെ ഉദ്ദേശ്യ ശുദ്ധിയായ തഖ്'വായാണ് ദൈവിക സമക്ഷത്തിൽ ഉപകാരപ്രദമായി എത്തുകയെന്ന ആഹ്വാനം നമ്മൾ ആർക്കെന്ത് സഹായ സഹകരണങ്ങൾ ചെയ്തു കൊടുക്കുമ്പോഴും അതിന്റെ പേരിൽ ലഭിച്ച ആളുകളിൽ നിന്നും തിരിച്ചു കിട്ടുന്ന പ്രത്യുപകാരങ്ങളോ നന്ദിവാക്കുകളോ അതുകൊണ്ട് അവരെടുക്കുന്ന ഉപകാരങ്ങളോ നോക്കിയല്ല അല്ലാഹു അതിനെ സ്വീകരിക്കുന്നതെന്നും മറിച്ച് ഏതൊരു കർമ്മത്തിലും അല്ലാഹുവിനെ മാത്രം മുൻനിർത്തുകയും പരിഗണിക്കുകയും ചെയ്യുകയെന്ന തഖ്'വയാണ് പ്രധാനമെന്നുമുള്ള കൃത്യമായ അവബോധം നൽകുന്നുണ്ട്. കഅബയുടെ സമീപത്ത് നേർച്ചയും അറവുമൊക്കെ ജാഹിലിയ്യത്തിലും നടന്നിരുന്നു, ഏക ഇലാഹായ നാഥനിലേക്ക് ഉദ്ദേശിച്ചു കൊണ്ടായിരുന്നില്ലെന്നതിനാൽ തന്നെ അതൊന്നും ഉപകരിക്കുന്നതായി റബ്ബിലേക്ക് എത്തുന്നതുമല്ലല്ലോ.


ആർക്കെങ്കിലും വല്ല നന്മയും ചെയ്യുന്നതിനേക്കാൾ പ്രധാനമാണ് ആ പ്രവൃത്തിയുടെ പിന്നിലുള്ള നിയ്യത്ത് ശുദ്ധവും ഖാലിസുമായി റബ്ബിനെ മാത്രം ഉദ്ദേശിച്ചാവുക എന്നത്. കാരണം ഇലാഹീ പ്രീതിക്കായി ആ നല്ല കർമ്മത്തിലേക്ക് മനസ്സിനെ മെരുക്കി ഒരുക്കിയവർക്ക് അത് ചെയ്യാൻ കഴിഞ്ഞില്ലെങ്കിലും ആ സദുദ്ദേശ്യത്തിന്റെ പേരിൽ നാഥൻ പ്രതിഫലം നൽകുക തന്നെ ചെയ്യും. ജിഹാദിലേക്ക് മോഹിച്ചിട്ടും പലവിധ കാരണങ്ങളാൽ കഴിയാതെ മദീനത്ത് തന്നെയായിപ്പോയ സ്വഹാബികളെക്കുറിച്ച് സമരമുഖത്തേക്ക് പോകുമ്പോൾ ആദരവായി നബിതങ്ങൾ(സ്വ) പുകഴ്ത്തിയതും അവരിലെ സൽക്കർമ്മത്തിലേക്ക് ഉദ്ദേശ്യമുണ്ടായിട്ടും ചെയ്യാൻ കഴിയാത്തവർക്ക് സുവാർത്തയറിയിച്ചതാണ്. നേരെ തിരിച്ച് എത്ര നല്ല നല്ല സഹായങ്ങൾ ആർക്ക് ചെയ്തു കൊടുത്താലും നിയ്യത്ത് ശുദ്ധമല്ലെങ്കിൽ റബ്ബിന്റെ തൃപ്തിക്ക് പകരം അവന്റെ ദേഷ്യവും ശിക്ഷയും തന്നെ ലഭിക്കിച്ചേക്കാം.


നിസ്വാർത്ഥതയും സദുദ്ദേശ്യവും ഇലാഹീ സാമീപ്യവും ലക്ഷ്യമില്ലാതെ പോകുന്ന കർമ്മങ്ങൾ കൃഷിഭൂമിയിൽ വളരുന്ന കളകൾ കണക്കെ ഉപയോഗശൂന്യവും വിളവ് തരാൻ വിതച്ച വിത്തുകളെ പോലും നശിപ്പിക്കാൻ ഉതകുന്നതുമാണ്. ഏവരും എല്ലാ പ്രവർത്തനങ്ങളാലും എന്തുദ്ദേശിക്കുന്നോ അതാണ് ലഭിക്കുകയെന്നറിയാവുന്ന നമുക്ക് അവന്റെ തൃപ്തിയേക്കാൾ വലുതായതൊന്നും ലഭിക്കാനേ ഇല്ലല്ലോ...

നാസർ കൂടത്തായിയുടെ മറപിടിക്ക് മറുപടി

"മഹല്ലുകൾ ശിഥിലമാകരുത്" എന്ന പ്രമേയത്തിൽ കേരള സംസ്ഥാന ജംഇയ്യത്തുൽ ഉലമയുടെ കാലികവും കൃത്യവുമായ ദ്വൈമാസ കാമ്പെയ്‌നും അത് കൊള്ളേണ്ടിടത്ത് കൊള്ളേണ്ട പോലെ കൊണ്ടപ്പോൾ ചിലരുടെ ഉത്തരം മുട്ടിയാലുള്ള കൊഞ്ഞനം കുത്തലും മറുപടി ഇല്ലാതാകുമ്പോഴുള്ള അവസാന വഴിയായ കുപ്രചരണങ്ങളും അധിക്ഷേപങ്ങളും തെറിവിളികളും എമ്പാടും നടക്കുന്നു ഓൺലൈനിലും ഓഫ്'ലൈനിലും. 

കൂട്ടത്തിൽ സമസ്തക്കാരല്ലാത്തവരെ തെറിവിളിക്കുന്നതിൽ ഗവേഷണപരമായ കഴിവുണ്ടെന്ന് തെളിയിച്ച കൂടത്തായിക്കാരൻ ഫൈസിയുടേതായി മറുപടി എന്ന പേരിൽ മറപിടി എന്നുപോലും വിളിക്കാൻ കഴിയാത്ത ഒരു കുറിപ്പ് ശ്രദ്ധയിൽ പെട്ടു. സംഗതി മൂപ്പിലാൻ എഴുതിയതാകാൻ ഒരു സാധ്യതയുമില്ല - കാരണം സാഹിബിന്റെ ഐഡന്റിറ്റിയുടെ ഭാഗമായ തെറികൾ അധികമൊന്നും അതിൽ കാണുന്നില്ല. അത് പോട്ടെ, വിഷയത്തിലേക്ക് കടക്കാം. പത്ത് നമ്പറിട്ട് കൂടത്തായി എഴുതിയതിന് അതെ നമ്പറിൽ മറുപടി:

1) 'സമസ്ത' എന്ന പേര് ആരുടേതാണ് എന്ന തർക്കത്തിൽ ഞങ്ങൾ ഇടപെടേണ്ടതില്ലല്ലോ, 1967 വരെയുള്ളത് സമസ്തയും ശേഷമുള്ളത് ആധുനിക സമസ്തയുമാണ് എന്ന് സമസ്തയുടെ സ്ഥാപകരായ 40 പേരിൽ ഒരാളും അവിഭക്ത സമസ്തയുടെ അവസാന പ്രസിഡണ്ടുമായ താജുൽ ഉലമാ സ്വദഖത്തുല്ലാഹ് മുസ്ലിയാർ(ന:മ:) പറഞ്ഞത് ഓർമ്മയിരിക്കട്ടെ. ആ ആധുനിക സമസ്തയുടെ അവകാശം ആർക്കായാലും ഞങ്ങൾക്ക് സമമാണ്. സിറാജിൽ ലേഖനം എഴുതിയത് കൊണ്ട് മൗലാന നജീബ് ഉസ്താദ് APക്കാരുടെ മെഗാഫോണോ ലൗഡ്സ്പീക്കറോ ആയി എന്ന് പറയുന്നതൊക്കെ മേലെപ്പറഞ്ഞ ഉത്തരം മുട്ടിയതിന്റെ കൊഞ്ഞനം കുത്തലാണ്.

89 ഇൽ എല്ലായിടത്തും മഹല്ലുകളിൽ പ്രശ്നമുണ്ടായപ്പോൾ മഹല്ലുകൾ എല്ലാവരുടേതുമായി ഇക്കാലം വരെ നടന്നത് പോലെ നടക്കണം എന്ന് പറഞ്ഞു കൊണ്ട് 'പീസ് കാമ്പെയ്ൻ' എന്ന പേരിൽ ഇതേ മൗലാന ജനറൽ സെക്രട്ടറി ആയിരുന്ന SYF നടത്തിയ കാമ്പെയ്ൻ AP ക്കാർക്ക് കൊണ്ടപ്പോൾ അവർ പറഞ്ഞതും ഇത് തന്നെ. സംസ്ഥാനക്കാർ ലീഗിനും EK ക്കാർക്കും വേണ്ടി സംസാരിക്കുന്നു എന്നും അവരാണ് സംസ്ഥാനക്കാരെ സ്പോൺസർ ചെയ്യുന്നതെന്നുമൊക്കെ. ഇന്നും മഹല്ലുകൾ സംഘടനാവൽക്കരിക്കാതെ സമുദായത്തിന്റെ പൊതു ഐക്യത്തിന്റെ കേന്ദ്രമായി നിലനിൽക്കണം എന്ന് പറഞ്ഞപ്പോൾ കൊണ്ടത് EKക്കാർക്ക് - അവരിപ്പോൾ പറയുന്നത് സംസ്ഥാനക്കാർ AP ക്കാർക്ക് വേണ്ടി അവർ സ്പോൺസർ ചെയ്താണ് സംസാരിക്കുന്നത് എന്ന്. അഥവാ APക്കാരുടെ അന്യായത്തിനെതിരെ പ്രതികരിക്കുമ്പോൾ സംസ്ഥാനക്കാർ EKക്കാരുടെ ആളെന്ന് APക്കാരും EKക്കാരുടെ അന്യായത്തിനെതിരെ പ്രതികരിക്കുമ്പോൾ APക്കാരുടെ ആളെന്ന് EKക്കാരും പറയുന്നു - ഞങ്ങൾക്കാണെങ്കിൽ ഹഖിനോട് മാത്രമാണ് കൂർ.

2) മൗലവിക്ക് മാത്രം തിരിയും എന്ന് മൗലവിക്ക് തോന്നിയിട്ടില്ല, സംസ്ഥാനക്കാർക്കും. മൗലവിക്ക് മാത്രം തിരിയും എന്ന് മൗലവി പറയാത്തത് നിങ്ങൾ ഇടയ്ക്കിടെ പറയുന്നത് കൊണ്ട് ഞങ്ങൾക്ക് മനസ്സിലാകുന്നത് കാര്യങ്ങൾ മൗലവിക്ക് മാത്രമാണ് കൃത്യമായി മനസ്സിലാകുക എന്ന് നിങ്ങൾക്ക് തോന്നുന്നു എന്നാണ്, അതിന് ഞങ്ങൾ ഉത്തരവാദിയല്ല. ഭരണസമിതി ഇക്കാര്യങ്ങളൊന്നും ശ്രദ്ധിക്കുന്നില്ല എന്നത് കാമ്പെയ്ൻ വിഷയങ്ങൾ അറിഞ്ഞ ജനങ്ങളിൽ SK യുടെ പ്രവർത്തകർ പോലും 'ഇങ്ങനെ ഒക്കെ ഉണ്ടോ' എന്ന് ചോദിക്കുന്നത് കണ്ട ഞങ്ങൾക്ക് മനസ്സിലാകുന്നുണ്ട്. മഹല്ല് ഭരണസമിതി സമസ്തയുടെ കീഴിൽ രെജിസ്റ്റർ ചെയ്യും മുമ്പ് അതിന്റെ നിയമനിബന്ധനകൾ നന്നായി പഠിക്കണം എന്നും വെറുതെ സമസ്തക്കാർ പറയുന്നിടത്തൊക്കെ ഒപ്പിട്ടു കൊടുക്കുന്ന പ്രകൃതം മുതലെടുക്കാൻ ശ്രമിക്കുന്നുണ്ട് എന്നും ജനത്തെ ബൊധീകരിച്ചപ്പോൾ ഗൂഢമായി മഹല്ലുകൾ സ്വന്തമാക്കാൻ ശ്രമിക്കുന്നത് ജനങ്ങൾ തിരിച്ചറിഞ്ഞതിലെ വെപ്രാളമാണ്.


3) മദ്രസ്സകൾ സമസ്തയുടെ ബോർഡിൽ സിലബസ് പഠിപ്പിക്കാൻ രെജിസ്റ്റർ ചെയ്യുന്നതിന് ആരും എതിർപ്പ് പറഞ്ഞിട്ടില്ല, കളവ് പറയൽ നിങ്ങളുടെ സംസ്ക്കാരത്തിന്റെ ഭാഗമാണല്ലോ. നാട്ടുകാർ നടത്തുന്ന മദ്രസകളിൽ സമസ്തക്കാർ അല്ലാത്തവർക്ക് പഠിപ്പിക്കാൻ അവകാശമില്ല എന്നും പഠിപ്പിക്കുന്ന മുഅല്ലിമുകൾ സമസ്തക്കാർ അല്ലെങ്കിൽ അവർക്ക് യാതൊരു ആനുകൂല്യവും നൽകില്ല, അവരുടെ സർവ്വീസ് രെജിസ്റ്റർ പോലും നൽകില്ല എന്ന അന്യായമായ തീരുമാനങ്ങളെ ആണ് ചോദ്യം ചെയ്തത്. പുത്തൻവാദികൾ കയറിക്കൂടി കയ്യേറ്റം ചെയ്യാതിരിക്കാൻ വേണ്ടി മറ്റു സംഘങ്ങൾ ഇല്ലാതിരുന്ന കാലത്ത് 'സമസ്തയുടെ ആശയപ്രകാരം നടക്കണം' എന്നതിന്റെ അർഥം സുന്നികൾ തമ്മിൽ ഭിന്നാഭിപ്രായമില്ലാത്തതും ബിദ്അത്തുകാരുമായി ഭിന്നാഭിപ്രായം ഉള്ളതുമായ വിഷയങ്ങളിൽ സുന്നീ ആശയപ്രകാരം നടക്കണം എന്നാണ്. അല്ലാതെ അത് സമസ്ത എന്ന സംഘടനക്ക് തീറെഴുതിയതല്ല എന്ന് മനസ്സിലാക്കാൻ കോമ്മൺ സെൻസ് മതി.


സംഘടനയുടെ സ്ഥാപനമായി അറിയപ്പെട്ടതോ അതിന്റെ കീഴിലായി തന്നെ ഉണ്ടാക്കപ്പെട്ടതോ ആയ സ്ഥാപനങ്ങളെ പറ്റി ചർച്ചയില്ല. ചെമ്മാട് ദാറുൽ ഹുദയോ ജാമിഅ നൂരിയ്യയോ നന്തി ദാറുസ്സലാമോ എന്താണിങ്ങനെ നടത്തുന്നത് എന്ന് ആരും ചോദിച്ചിട്ടില്ല. നാട്ടുകാരുടെ പൊതുസ്വത്തായ മഹല്ല്, പള്ളി, മദ്രസ്സാ സംവിധാനങ്ങൾ നാട്ടുകാരുടെ തന്നെയായി നിലനിൽക്കണം എന്നാണ് കാമ്പെയ്ൻ പറഞ്ഞത്. ഇയാൾ പറയുന്നത് 'സമസ്തയുടെ ആളുകൾ പിരിവെടുത്താണ്' മദ്രസ്സകളും പള്ളികളുമൊക്കെ ഉണ്ടാക്കിയത് എന്നാണ്!. പൊതുജനം കഴുതയാണെന്നാണോ ഇയാൾ കരുതുന്നത്? ഓരോ മഹല്ലിലും മദ്രസ്സകൾ ഉണ്ടാക്കുന്നതും സംവിധാനിച്ചു കൊണ്ട് പോകുന്നതും മഹല്ലിലെ എല്ലാ സംഘടനക്കാരും സംഘടന ഇല്ലാത്തവരുമെല്ലാം ഒന്നിച്ചാണ്. നാട്ടുകാർ മദ്രസ്സ രെജിസ്റ്റർ ചെയ്യുന്നത് എല്ലായിടത്തും ഉള്ള പോലെയുള്ള സിലബസ് നടത്താനാണ്, അല്ലാതെ സമസ്തക്ക് തീറെഴുതുന്നതല്ല. നാട്ടുകാർക്ക് കാര്യങ്ങൾ വിശദമാക്കി കൊടുക്കുന്നതിനു ഇവർക്ക് എന്തിനാണ് പ്രയാസം? ഉള്ളതല്ലേ പറയുന്നുള്ളൂ, ആ ഉള്ളത് ജനം അറിയുന്നതിൽ ബുദ്ധിമുട്ട് തോന്നുന്നതിൽ എന്തോ ഇല്ലേ?!

4) മഹല്ല് രെജിസ്റ്റർ ചെയ്യാൻ മാതൃകാ നിയമാവലി എന്തിനാണ് ചോദിക്കുകയല്ല കാമ്പെയ്ൻ ചെയ്തത്, മറിച്ച് മഹല്ല് ഒരു സംഘടനയിലും രെജിസ്റ്റർ ചെയ്യാതെ തന്നെ സമുദായത്തിന്റെ ഐക്യത്തിന്റെ കേന്ദ്രമായി നിലനിൽക്കണം എന്നാണ്. സമസ്ത ചെയ്യുന്നത് രെജിസ്റ്റർ ചെയ്യാൻ കൊടുക്കുന്ന മാതൃകാ നിയമപ്രകാരം രെജിസ്റ്റർ ചെയ്തു കഴിഞ്ഞാൽ പിന്നെ നിയമാവലിയിൽ ഉള്ളത് പ്രകാരം മഹല്ലിലെ ജനറൽ ബോഡിയിൽ പോലും സമസ്തക്കാർ മാത്രമേ പാടുള്ളൂ എന്നും നടപ്പാക്കുകയാണ്. ഇത് കാരണം മഹല്ലുകളിൽ അടിപിടി ഉണ്ടാകുന്നു/ഉണ്ടാകും എന്നും അതുവഴി മഹല്ലുകൾ ശിഥിലമാകുമെന്നും. ബിദ്അത്തുകാർ പിടിച്ചെടുക്കുന്നതിനെ പ്രതിരോധിക്കാൻ വേണ്ടി രെജിസ്റ്റർ ചെയ്യുമ്പോൾ ചേർക്കുന്ന "ആശയങ്ങൾ സമസ്തയുടേത് ആകണം" എന്നത് EK സമസ്ത എന്ന സംഘടന എന്ന അർത്ഥത്തിലല്ല സുന്നി എന്ന ആശയത്തിന്റെ അർത്ഥത്തിലാണ് എന്ന് ആർക്കാണ് അറിയാത്തത്? അല്ലെങ്കിൽ EK സമസ്തക്കാർ മാത്രമാണ് സുന്നികൾ, മറ്റു മൂന്നു സംഘടനയും സുന്നികളല്ല എന്നാണോ ഇവരുടെ വാദം എന്ന് വ്യക്തമാക്കട്ടെ.


ആശയം രെജിസ്റ്റർ ചെയ്യുന്നതിന്റെ മറവിൽ മറ്റു സംഘടനകളെ അടിച്ചമർത്തി മഹല്ലുകൾ സ്വന്തമാക്കാനുള്ള ഗൂഢതന്ത്രമാണ് തുറന്നു കാട്ടപ്പെട്ടത്. അതിന് ചൂടായായിട്ടെന്ത്?!. ശംസുൽ ഉലമാ കീഴന ഓറും(ന:മ) ഓറുടെ അണികളും നാട്ടിൽ ഇക്കാലമത്രയും നടന്ന പോലെ ഭിന്നിക്കാതെ മഹല്ലുകൾ നടന്നുപോകാൻ ആഗ്രഹിക്കുന്നവരാണ്. ഓറുടെ കാലത്തില്ലാത്ത സംഘടനാവൽക്കരണം സമസ്ത തുടങ്ങിയപ്പോൾ ഓർക്ക് വേണ്ടി തന്നെ സംഘം പ്രതികരിക്കുന്നു, സമസ്തയുടെ നയവൈകല്യങ്ങൾ എക്കാലവും ഓർ തുറന്നു കാട്ടിയിട്ടുണ്ട്. ഓർ വഫാതായപ്പോൾ ഓർ ഏൽപ്പിച്ചവരും.

5) ഇസ്‌ലാമിന്റെ പേരിൽ പ്രവർത്തിക്കുന്ന ഒരു സംഘടനയുടെ നയങ്ങൾക്ക് ഉദാഹരണമായി തികച്ചും ഭൗതികമായ സംവിധാനങ്ങളെ കാണിക്കുന്ന ഇയാളൊക്കെ ആ സംഘത്തിന് ഭാരമാണ്. ഉപ്പയെയും ഉപ്പാപ്പയെയും പഠിപ്പിച്ച ഉസ്താദ് മുഅല്ലിം ക്ഷേമനിധിയിൽ നിന്നും വല്ല സഹായവും ലഭിക്കാൻ MSRന് വേണ്ടി SK കുട്ടിയെ തേടി നടക്കണം, സമസ്തക്ക് വേണ്ടി പ്രവർത്തിക്കുന്ന ആളല്ലെങ്കിൽ അദ്ദേഹത്തിന് അവൻ ഒപ്പിട്ടു കൊടുക്കില്ല! പലവട്ടം ആ വയസ്സുള്ള ഉസ്താദ് പുറകിൽ നടന്നാലും കൊടുക്കില്ല. അല്ല സാഹിബേ, ഒപ്പിട്ടു കൊടുക്കുന്നതിന്റെ നിയമവശം ആരും ചോദിച്ചില്ല - മറിച്ച് ദീനിന്റെ ഏറ്റവും വലിയ അടിസ്ഥാനങ്ങളിൽ ഒന്നായ അദബ് എന്ന ഒന്ന് നിങ്ങൾക്ക് ബാധകമല്ലേ?! വല്യാപ്പാനെ പഠിപ്പിച്ച ഉസ്താദിന് ഒപ്പ് വാങ്ങാൻ ചെറുമകന്റെ പ്രായമുള്ള കുട്ടിയുടെ പുറകിൽ നടക്കുന്നത് ഒന്നാം ക്ലാസ്സിൽ മദ്രസ്സയിൽ പഠിച്ച അദബ് എന്നതുമായി നിങ്ങൾ എങ്ങനെ കൂട്ടിവായിക്കും! അദബോക്കെ പഠിപ്പിക്കാൻ മാത്രമാണോ? SKക്കാർക്ക് ഇതൊന്നും ബാധകമല്ലേ?


ഓഫീസറുടെ ഉദാഹരവും ഇയാൾക്കെതിരാണ്, ദുരിതാശ്വാസ ഫണ്ട് ലഭിക്കാൻ അർഹത ഉള്ളയാൾ ഒപ്പിട്ടു കൊടുക്കാൻ വേണ്ടി ഓഫീസറുടെ അടുക്കൽ പോയാൽ ഭരിക്കുന്ന പാർട്ടിയായ CPMന്റെ അനുയായികൾക്ക് വേണ്ടി മാത്രമേ ഒപ്പിട്ടു നൽകൂ എന്ന് പറഞ്ഞാൽ എന്താകും കഥ! അതല്ലേ ഇക്കൂട്ടർ ചെയ്യുന്നത്? സിലബസ് സമസ്തയുടേതാണ് എന്നതിനാൽ ഒപ്പിട്ടു കൊടുക്കുക സമസ്തക്കാര്ക്ക് മാത്രം! അവകാശി ആണെങ്കിൽ പോലും ഒപ്പിട്ടു കൊടുക്കില്ല.


6) സർക്കാർ സ്ഥാപനം പോലെയാണ് സമസ്തയുടെ സിലബസ് പഠിപ്പിക്കുന്ന മദ്രസ്സകൾ എന്നതൊക്കെ ജനത്തോട് ഒന്ന് പറയണം കമ്മിറ്റികളിൽ പോയി, അപ്പോൾ അവർ പറഞ്ഞു തരും ബാക്കി. ഇനി വാദത്തിനു അങ്ങനെ എടുത്താൽ തന്നെ അൺഎയ്‌ഡഡ്‌ സ്ഥാപനങ്ങളിൽ പഠിപ്പിക്കണം എങ്കിൽ ആ അധ്യാപകർ ഭരിക്കുന്ന സർക്കാറിലേ പ്രധാന പാർട്ടിയായ CPM ഇൽ മെമ്പർഷിപ്പ് ഉള്ളവർ മാത്രമായിരിക്കണം എന്നോ അങ്ങനത്തെ സ്ഥാപനങ്ങളിൽ സർക്കാർ നൽകുന്ന ആനുകൂല്യം വല്ലതും നൽകണമെങ്കിൽ DYFI ക്കാരന്റെ സാക്ഷ്യപത്രം വേണം, കമ്മിറ്റികളിൽ കമ്മ്യൂണിസ്റ്റുകാർ മാത്രമേ പാടുള്ളൂ എന്നും പറഞ്ഞാൽ എങ്ങനെ ഉണ്ടാകും കഥ! പരിഹാസ്യമായ സമീപനം ആരുടേതാണ് എന്ന് മനസ്സിലാകുന്നുണ്ടല്ലോ അല്ലേ.


7) സ്ഥാപനം ഉണ്ടാക്കുന്നത് നാട്ടിലെ സമസ്തക്കാർ മാത്രമാണ് എന്ന് ജനങ്ങളോട് പറഞ്ഞാൽ അവർ പുച്ഛിച്ചു തള്ളും, എല്ലായിടത്തും മദ്രസ്സയും പള്ളിയും ഉണ്ടാക്കിയത് സംഘടനാ വ്യത്യാസമില്ലാതെ നാട്ടുകാർ എല്ലാവരും കാശെടുത്താണ്. മദ്രസ്സകളും പള്ളികളും നടത്തുന്നത് മഹല്ലിലെ എല്ലാ സംഘടനക്കാരും സംഘടന ഇല്ലാത്തവരും ഒരുപോലെ കീശയിൽ നിന്നും കാശെടുത്താണ്. അത്തരം സ്ഥാപനങ്ങൾ സമസ്തക്കാരുടേത് മാത്രമായി കമ്മിറ്റിയിൽ പോലും മറ്റാർക്കും മെമ്പർഷിപ്പില്ലാത്ത വണ്ണം കയ്യേറുന്ന നിയമങ്ങൾ സഹിതം രെജിസ്റ്റർ ചെയ്യുന്നത് അക്രമവും അന്യായവുമാണ്. സമസ്തക്കാർ മാത്രം കാശ് കൊടുത്താൽ മതി ഇനിമുതൽ മദ്രസ്സയിൽ ശമ്പളം കൊടുക്കാൻ എന്ന് സർക്കുലർ ഇറക്കാൻ സമസ്തക്കാർക്ക് ധൈര്യമുണ്ടെങ്കിൽ അത് കാണട്ടെ.


8) മഹല്ലുകളിലെ ഐക്യവും സാഹോദര്യവും സംഘടനയുടെ പേരും പറഞ്ഞു തകർക്കുന്നതിനെ പറ്റി പറയുന്ന കാമ്പെയ്‌നിൽ പുതിയ സംവിധാനം കണ്ടെത്താനാണ് പറയുക, പ്രശ്നങ്ങൾ ഇല്ലാത്ത വിധം നടന്നു പോയിരുന്ന മഹല്ല് സംവിധാനങ്ങൾ അപ്പടി നിലനിർത്തി എല്ലാവര്ക്കും പ്രാതിനിധ്യം നൽകി അതാത് നാട്ടുകാർ നടത്തിക്കൊണ്ടു പോകുകയാണ്. സംഘടനയിൽ രെജിസ്റ്റർ ചെയ്യുന്നതോടെ മഹല്ല് സംവിധാനത്തിന്റെ പ്രസക്തി തന്നെ നഷ്ടപ്പെട്ട് നോക്കുകുത്തിയാകുകയാണ്. കോഴിക്കോട് ഓഫീസിൽ നിന്ന് വരുന്ന നിർദ്ദേശങ്ങൾ അനുസരിച്ച് മാത്രം തുറക്കുകയും അടക്കുകയും ചെയ്യേണ്ട അവസ്ഥയാണ് പൂട്ടിയിടപ്പെട്ട പള്ളികളിൽ ഉള്ളത്. ഇതൊക്കെ മാറി മഹല്ലിലെ ജനങ്ങൾ ഏകോപിച്ച് സംഘടനാ പ്രശ്നങ്ങൾ മാറ്റിവെച്ച് കമ്മിറ്റികൾ ഉണ്ടാക്കി ഭരണം നടത്തുന്ന പഴയകാല വഴക്കം തന്നെ നിലനിൽക്കണം എന്ന് പറയുന്നത് മഹല്ലുകൾ ശിഥിലമാകാതിരിക്കാനുള്ള മുൻകരുതലാണ്.


9) സംസ്ഥാന രൂപപ്പെട്ട കാലം മുതൽ ഇന്നോളം സമസ്തയുടെ നയവൈകല്യങ്ങൾക്ക് എതിരെ അപ്പപ്പോൾ പ്രതികരിച്ചിട്ടുണ്ട്. 89 ഇൽ എല്ലായിടത്തും പ്രശ്നങ്ങൾ തുടങ്ങിയപ്പോൾ മഹല്ലുകൾ ഇതുവരെ പോയ പോലെ നടക്കണം എന്ന് പറഞ്ഞു 'പീസ് കാമ്പെയ്ൻ' നടത്തിയ സംസ്ഥാനക്കാർ അന്നത്തേതിന് സമാനരീതിയിൽ പള്ളികൾ പൂട്ടുന്ന രീതിയിൽ പ്രശ്നങ്ങൾ ഇരുവിഭാഗവും തമ്മിൽ ഈയടുത്തായി കൂടുതലായി തുടങ്ങിയപ്പോൾ അതിന്റെ മൂലകാരണമായ EK സമസ്തയുടെ മഹല്ല്, പള്ളി, മദ്രസ്സ തലങ്ങളിലെ സംഘടനാ വൽക്കരണത്തിന് എതിരെ സംസാരിക്കൽ അനിവാര്യമാണെന്നും അല്ലെങ്കിൽ എല്ലായിടത്തും പ്രശനങ്ങൾ കൂടുതലാകുകയും മഹല്ലുകൾ ശിഥിലമാകുകയും ചെയ്യും എന്ന് തിരിച്ചറിയുകയും ചെയ്തപ്പോൾ കാമ്പെയ്ൻ നടത്തി. ആവശ്യത്തിനനുസരിച്ചാന്ന് സംസ്ഥാനക്കാർ ഇടപെടുക. അനാവശ്യമായി പരസ്പരം ചെളിവാരി എറിയാൻ സ്റ്റേജ് കെട്ടുന്ന പരിപാടി സംസ്ഥാനക്കാർക്കില്ല.


10) നല്ല തമാശയാണ് മൂപ്പിലാൻ എഴുതി വിട്ടത്. വന്ദ്യരായ മൗലാനാ രാമന്തളി തങ്ങൾ(ന:മ:) വഫാത്താകുന്നത് വരെ കാത്തിരുന്നത്രെ! ഡിസംബർ 27ന് ജംഇയ്യത്തിന്റെ സുവർണ്ണ ജൂബിലി പ്രഖ്യാപന സമ്മേളനത്തിൽ കാമ്പെയ്ൻ പ്രഖ്യാപിച്ച അന്ന് അരമണിക്കൂറോളം സംസാരിച്ചത് ബഹു: തങ്ങളാണ്. സംസ്ഥാന എന്ന പ്രസ്ഥാനത്തിന്റെ ഹഖിനോടുള്ള കൂർ വ്യക്തമാക്കി ഹിമ്മത്തോടെ എന്നത്തേയും പോലെ സംസാരിച്ചാണ് അവിടുന്ന് പോയത്. കൊടുവള്ളിയിൽ നടക്കാനിരുന്ന പരിപാടിയിൽ അവിടുന്ന് പങ്കെടുക്കാൻ വേണ്ടി നോട്ടീസ് വരെ അടിച്ചതുതുമായിരുന്നു. മഞ്ചേരി നടന്നതും സമസ്തക്കാർ ഇപ്പോൾ ക്ലിപ്പിട്ടു പ്രസംഗിക്കുന്നതുമായ മൗലാനായുടെ പ്രഭാഷണം നടന്നത് ജനുവരി 2നാണ്. അവിടുന്ന് വഫാത്തായത് ഫെബ്രുവരി 1നും!. മൗലാന വിഷയം വ്യക്തമാക്കി പ്രസംഗിച്ചു ഒരുമാസം കഴിഞ്ഞാണ് അവിടുന്ന് പിരിഞ്ഞത്. അവിടുന്ന് ജനറൽ സെക്രട്ടറി ആയ മുശാവറ ദീർഘമായ ചർച്ചകൾക്ക് ശേഷം തന്നെയാണ് ഈയൊരു കാമ്പെയ്ൻ നടത്താൻ തീരുമാനിച്ചത്.


ജംഇയ്യത്തിന്റെ സെക്രട്ടറിയും ശംസുൽ ഉലമാ കീഴന ഓറുടെ(ന:മ:) ശേഷം നാദാപുരം മുദരിസുമായ കെ.കെ കുഞ്ഞാലി ഉസ്താദ് മുതലക്കുളത്ത് പറഞ്ഞത് പോലെ നജീബ് ഉസ്താദിലൂടെ ജംഇയ്യത്തുൽ ഉലമ പറഞ്ഞ വിഷയങ്ങൾക്ക് മറുപടി പറയാൻ കഴിയാതായപ്പോൾ കുപ്രചരണം നടത്തുന്നു എന്ന് മാത്രം. ആകെക്കൂടി സംസ്ഥാനയുടെ കാമ്പെയ്ൻ കൃത്യമായി മർമ്മത്തിൽ തറച്ചു എന്നും അതിന്റെ പേരിലുള്ള പിടയലാണ് ഇക്കാണുന്നതൊക്കെ എന്നുമാണ് വ്യക്തമാകുന്നത്. ആൾ കുറഞ്ഞാലും സമ്പത്തും സൗകര്യവും കുറഞ്ഞാലും ന്യായത്തിനും ഹഖിനും വേണ്ടി സംസാരിക്കുന്നവരുടെ ശബ്ദത്തെ അല്ലാഹു സഹായിക്കുമെന്നതിന് ഇനിയെന്ത് തെളിവ് വേണം!. 

മഹല്ലുകൾ മുസ്ലിം സമുദായത്തിൽ ബാക്കി നിൽക്കുന്ന ചുരുക്കം ഐക്യത്തിന്റെ കേന്ദ്രമാണ്, അതിനെക്കൂടി സംഘടനാ വൽക്കരിച്ചു പിടിച്ചെടുക്കാൻ നോക്കുന്നത് ജനം തിരിച്ചറിയുക തന്നെ ചെയ്യും. ഐക്യത്തിനും സമുദായ നന്മക്കും വേണ്ടി സംസാരിക്കുന്ന മൗലാനയെ പോലുള്ള ഉഖ്‌റവിയ്യായ ആലിമീങ്ങളെ തെറിവിളിക്കുന്ന സംഘടനാ സംസ്ക്കാരമാണ് ഇവർ വളർത്തുന്നത് എന്ന് സമൂഹം മനസ്സിലാക്കുന്നുണ്ടല്ലോ...